【食乜好】東京超滿瀉絕品料理5選

有冇試過因為道料理太過好食,食到見哂底都仲未夠喉?
生咗大食積嘅你地有福啦,今次將會為你地介紹5道喺東京食到嘅超滿瀉絕品料理,我敢寫包單,今次一定係你一生中覺得最飽足嘅一餐!
 
1. かぶ丼@くいしんんぼうがぶ (¥1,300)
 
 
呢碗牛肉飯係呢間餐廳嘅名物,牛肉舖到滿哂都不特止,仲垂哂出去個碗出面添!店方話呢碗飯嘅肉有180g重,數一數足足有成50塊牛肉,真係好誇張啊。啲牛肉睇落雖然好似乾柴柴,但其實師傅火侯掌握得好好,每一塊都係呈現粉紅色,食落口超級JUICY,加埋啲胡椒粒吊味,肉味更加突出!留意返,呢間餐廳每日都有超多人為咗呢碗牛肉飯而嚟,所以好早就會賣哂,有心嚟食就記得早少少啦!
 
喺武蔵小山站行5分鐘倒就會見到呢間舖㗎啦!
 
如唔想試多幾種唔同肉,可以點呢個「五種の肉ちらし」,肉量一樣係好驚人!
 
くいしんぼう がぶ
地址:東京都目黑區目黑本町 3-7-9
電話:03-5722-1766
營業時間:11:30~13:30、18:00〜21:30
休息:星期六
 
=================
2. 大炭燒豚丼@豚野郎 (¥900)
 
 
點個大豚丼,一上枱又係會嚇一嚇,¥900竟然可以食到咁大碗豚肉飯,仲要每塊豚肉都係厚切同味道唔錯夠香濃,肉汁又豐富,真係好難得,如果呢間野香港都有,我諗女士們呢一世都唔使諗減肥!
 
餐廳喺3樓,為咗大豚丼而嚟嘅話直上3樓就得啦~
 
食物選擇其實只得豚肉飯㨂,不過如果想再豐富啲可以加隻蛋,半熟蛋撈埋落飯度食美味度爆燈!
 
豚野郎
地址:東京都韆代田區神田駿河檯 2-6-15
電話:03-3219-9322
營業時間:11:00~23:00
休息:星期日
 
=================
3.船上めし@いろり家 (¥2,480)
 
 
 
呢間舖頭已經畀好多日本雜誌介紹過,因為佢地嘅三文魚籽丼又係好誇張,師傅會一路叫「YOSHO!YOSHO!」一路係咁將啲三文魚籽舀喺飯上面直到舀到瀉為止,鐘意食三文魚籽真係會愛死呢一度!食嘅時候可以淋啲醬油上去,再用筷子將大量三文魚籽連飯放入口,幾十粒三文魚籽同一時間喺口入面爆開,個種鮮味真係好食到呢......
 
舖頭平日開到凌晨4點,想宵夜嘅話呢度都唔錯。
 
炉端焼都係佢地嘅拿手料理,用嚟送酒一流!
 
いろり家 東銀座店
地址:東京都中央区銀座3-11-11銀座参番館2 B1
電話:050-5799-2791
營業時間:星期一至五 18:00~04:00、星期六、日及公眾假期 17:00~23:00
休息:不定休
 
=================
4.こぼれウニのブランマンジェ@ビストロ向日葵 (¥1,600)
 
 
呢間舖頭可以話係比較少人知,都係一啲去慣去熟嘅本地人先知呢個位原來有間咁正嘅小店!杯仔入面裝住嘅係好Creamy嘅奶凍,而上面就係一大堆海膽,個量係正常份量倍!試一啖,估唔到海膽同奶凍嘅味道同口感都幾match,不過如果俾我㨂,我都係鐘意用海膽嚟送飯多啲~
 
舖頭唔係好大,旅客比較少,通常都係本地人比較多。
 
店內以和式洋風料理為主,亦有提供酒精飲品畀食客飲返杯。
 
ビストロ向日葵
地址:東京都新宿区新宿3-11-6 エクレ新宿ビル 1F
電話:03-6380-4913
營業時間:18:00~23:00
休息:星期二
 
=================
5.はみ出しうな丼@うなぎ仙見 (¥3,000)
 
呢個鰻魚丼嘅鰻魚已經長到放唔哂入個碗度,又大塊又厚肉,最緊要係店方喺烹調方面做得好好,將條活鰻蒸完再燒,入口做到外脆內軟滑口感,加上自家製秘製醬汁,2塊咁大塊嘅鰻魚都會好快KO哂!
 
由於呢度係鰻魚料理專門店,所以除咗鰻魚飯之外,仲可以食到其他唔同嘅鰻魚料理,例如鰻魚嘅內臟串燒等等。
 
等食嘅時候可以見到師傅喺度密密燒鰻魚。
 
うなぎ仙見
地址:東京都大田区大森中2-2-1
電話:03-3764-2707
營業時間:11:30~14:30、17:30~21:00
休息:星期三