【食乜好】東京站勁誘惑駅弁

「駅弁」即係喺車站買到嘅便當,對於要搭長途車嘅日本人嚟講可以話係旅途中不可或缺嘅必須品。
 
而由於東京係一個大站,有「新幹線」同「在來線」等唔同線路連接日本各地,車程閒閒哋都幾個鐘,所以喺東京站範圍自自然有好多唔同款式嘅駅弁,等乘客喺旅途中都可以享受到優質美食。
 
不過如果唔想騰嚟騰去物色駅弁,推介你地去一個地方,就係位於JR東京站入面一樓中央通路嘅「駅弁屋 祭」,入面有來自日本全國各地嘅駅弁,總共有成170款咁多,每一個賣相都相當吸引,下次行過就算唔係要搭長途車都可以買返酒店做宵夜~
 
 
1. ひっぱりだこ飯 ¥1,000
 
 
呢個係神戶超出名嘅明石章魚便當,喺神戶嗰邊出名到想食就要先預約,如果去到舖頭先諗住買基本上係唔會買到嘅,不過喺呢度當然係唔同講法啦,輕輕鬆鬆就買到,爽!
 
呢個便當最特別嘅地方係用瓦樽嚟裝,連樽身都刻咗隻章魚喺度,好精緻!樽入面除咗有章魚之外,仲有海鰻同季節性蔬菜。飯已經事先調好味,章魚好爽口,所有食材嘅口感同味道都好match,難怪喺神戶咁搶手!
 
一打開個蓋就見到好大隻章魚等緊我食佢落肚!
 
個瓦樽都幾靚,如果個行李箱仲有位就帶埋佢返香港做紀念啦。
 
======================
2. はらこめし ¥1,000
 
 
係咪好難想像佢地竟然用三文魚籽嚟做便當食材呢!呢個便當來自宮城,放喺米飯上面嘅係以醬油同味醂煮烹煮過嘅三文魚同埋粒粒都又圓又飽滿嘅三文魚籽,啲三文魚佢地仲好細心咁事先剝咗塊皮,食嘅時侯啖啖肉,好滿足啊~
 
淨係睇幅圖都覺得都覺得好好食啦!好想快啲打開佢!
 
======================
3. 越前 かにめし
 
 
嘩!你睇吓呢個便當啲蟹肉多到!呢個蟹肉便當來自福井縣,喺昭和36年,即係55年前就開始存在,當時仲係用瓦兜嚟裝,後來隨住時代嘅進展先變成而家嘅蟹型膠盒。
 
唔好以為個飯淨係舖滿蟹肉就完成,其真個飯底製作一啲都唔馬虎,加咗松葉蟹蟹膏、內臟等炮製,所以淨係食啲飯你都會食得出海鮮嘅鮮味,加埋上面舖到滿一滿嘅松葉蟹蟹肉,每一啖都充滿蟹嘅鮮味,食到一啖接一啖咁停唔到口啊!點算!
 
紅色包裝好易認好顯眼。
 
未打開個盒係人都會知你呢個係蟹便當
 
======================
4. 米沢牛炭火焼特上カルビ弁当 ¥1,500
 
 
一般嚟講有肉嘅便當一凍咗就會唔好食,但呢個特上牛肉便當就完全冇呢個問題,唔係熱辣辣都仲一樣係好好味!佢地用嘅係米沢牛,每一塊都係由專人用人手切開,感覺好矜貴,經過炭火燒烤之後秘製醬汁滲哂入啲牛肉入面,好正!
 
個包裝都做得好靚,有啲唔係好捨得掉添......
 
======================
5. 平泉うにごはん ¥1,000
 
 
到最後一個啦,呢個係來自岩手縣嘅海膽三文魚籽便當,海膽已經事先整熟咗同調過味,口感比生海膽硬少少,亦都冇咁Creamy,係另一種海膽獨有嘅風味,不過咩風味都好,想像吓喺漫長嘅車程入面可以食到碗海膽飯真係好幸福!!
 
海膽飯有2款可以㨂,另一款成碗都係海膽,想食多啲海膽可以㨂呢款。
 
======================
 
店方用便當模型整咗個便當牆,即使係模型,點解我都會覺得好似好好食?!
 
舖頭由朝早5點開到夜晚11點,真係幾點過嚟買都冇問題!
 
店入面有個駅弁廚房,會不定時製作熱辣辣便當,一拎出嚟就會馬上被搶購一空,所以睇見工作人員有所動作就好準備定過去攞返個啦!
 
認住呢間「駅弁屋 祭」,真係食足一個星期便當都唔會厭啊!你話如果公司附近有嘅話幾好呢......
 
======================
 
駅弁屋 祭
地址:東京都千代田区丸の内1-9-1
電話:03-3213-4352
營業時間:05:30~23:00
休息日:無