【食乜好】放題¥980?東京激安料理5選!

日本有咁多好野食,但你又識唔識捐窿捐罅搵又好味又平到笑嘅激安美食呢?今日同大家分享我嘅私藏,教大家以最少嘅成本享受最多嘅美食!GOGO!
 
 
1. ¥100鍋物@味一番
 
 
呢間味一番嘅¥100鍋出名到上哂電視,因為份量絕不欺場,足夠3至4個人食用,如果4個人去食,一個人先¥25,真係難以置信!
 
¥100嘅鍋物有2款可以㨂,有肉鍋同貝鍋,入面除咗主角嘅貝殼類同牛肉,仲有好多其他配料,例如雞肉同疏菜,加埋秘製湯底,好難相信呢個鍋只係要¥100!
 
喺門口就會見到呢個牌,每枱限叫一鍋。
 
肉鍋
 
除咗鍋物,呢度都有好多唔同野食,例如呢個生蠔,睇見都流口水。
 
うまいもんどころ 味一番
地址:東京都江東区亀戸2-25-3
電話:03-3637-3950
營業時間:11:30~13:00、17:00~22:40
休息:星期日
 
=====================
2. ¥200咖喱飯@原価率研究所
 
 
平時喺日本食個咖喱飯¥500走唔甩,但呢間店嘅咖喱飯只係¥200!點解佢地會賣到咁平呢,正如佢地個店名一樣,因為佢地想將料理貼近原價出售。而因為要減低成本,店舖入面亦冇咩裝修,只有簡單嘅枱同摺椅。
 
味道方面,入口微辣,都幾香,本地人就話好似食到以前學生便當嘅味道,好懷舊喎,最有趣係間舖嘅slogan,「一般的な飲食店での『おいしさ』ではなく『普通の味』を研究して作られた」,即係話佢地唔會同一般餐廳一樣一味只研究美味真締,而係將一大家熟悉嘅味道呈現出嚟,都係嘅,如果唔係日本人又點會覺得呢個便當充滿兒時味道吖~
 
店內只有簡單摺枱摺椅
 
如果想豐富啲可以加¥100加芝士。
 
原価率研究所 竹ノ塚店
地址:東京都足立区東伊興3-4-16
電話:03-3855-2722
營業時間:11:00~20:00
休息:無
 
=====================
3. ¥30 A4級燒肉@治郎丸
 
 
有冇試過突然好想快速地食燒肉?嚟呢度啦!呢間店舖以立食為主,每個位都有個細細哋嘅爐仔,自己燒自己食,由於企位set哂喺counter位,所以師傅係會見到你一舉一動嘅,只要你烤肉手法不當,佢就會忍唔住出手幫你,可能仲會吟你幾句,好搞笑。
 
呢度一定要點只需¥30嘅A4級牛肉,唔好以為平野冇好,牛肉嘅油脂分布都幾平均,入口仲好juicy?!
 
當日有咩肉㨂都寫哂出嚟,不過就得日文
 
counter好清楚可以睇到每種肉個名,唔識日文唯有認住個名,再對吓餐牌睇價錢
 
企位唔係好多,企滿哂人超熱鬧,氣氛勁正!
 
治郎丸
地址:東京都新宿区歌舞伎町1丁目26-3
電話:03-6380-3292 
營業時間:11:00~翌5:00
休息:無
 
=====================
4. ¥980 45分鐘燒肉放題@新宿食肉センター極
 
 
喺日本食燒肉想¥1,000有找真係發緊夢!呢間舖頭係燒肉、內臟專門店,食材都係來自國內,大家可以食得好安心。
 
嚟呢度食野要識㨂時段,最抵食就係夜晚11點打後嘅宵夜時段,¥980就可以食到45分鐘嘅燒肉放題,食足45分鐘都咪話唔飽!深夜時段有3個set可以㨂,有得食雞肉、豬肉同內臟,㨂好set之後食完一round可以無限添加,呢餐宵夜真係好邪惡......
 
咁大個極字,唔會睇漏眼啦~
 
佢地叩宵夜時段做深夜lunch,由晚上11點到凌晨2點,宵夜啱哂!
 
嘩你睇啲顏色幾誘人!真係去旅行先有得咁放縱!
 
卸)新宿食肉センター極
地址:東京都新宿区歌舞伎町2-10-5 1F
電話:03-6380-2963
營業時間:16:00~翌9:00
休息:無
 
=====================
5. ¥10 鰤魚壽司@無名壽司店
 
 
呢間壽司店開咗年幾左右,到而家仲未有一個正式嘅店名,所以當地人都就咁叫佢無名壽司店就算。
 
入到嚟緊係要食佢地最平嗰個鰤魚壽司啦,佢地用嘅鰤魚都係野生嘅,所以味道都好鮮甜,¥10一粒真係抵食到爛!不過咁平當然係有條件㗎,就係一定要點返杯野飲,同埋每人只限點10件鰤魚壽司。
 
如果唔想淨係食鰤魚壽司咁悶,店內都仲有好多其他選擇嘅,例如吞拿魚、玉子、三文魚籽、甜蝦壽司等等,價錢比其他壽司店平少少。
 
間舖其實好近代代木站,但因為間冇名嘅關係,講真有少少難搵。
 
雖然話本日限定,但呢個牌好似日日都會痴喺度,唔好咁快就搣走佢啊!
 
入面主要以立食為主,坐位就只得2個。
 
除咗鰤魚壽司店內仲有好多其他款式,呢一碟先至大概¥630,係咪好抵!
 
啤酒¥380
 
名前のない寿司屋
地址:東京都渋谷区代々木1-35-1
營業時間:17:00~
休息:不定休