【食乜好】去北海道食激正豪華海鮮丼!

 
就到冬天啦,又係去北海道玩雪嘅時候!除咗玩雪,最開心就係可以食到又唔貴又新鮮嘅海鮮丼,真係好味到日日食都唔會厭。想去啲地道啲嘅舖頭我有好介紹,以下落嚟呢5個海鮮丼唔知會唔會成為你更想去北海度嘅一大原因呢?
 
 
1. 自選三色丼@Kikuyo食堂
 
 
呢間舖勁出名食海鮮丼飯,本店同支店開到中午就會收舖,如果你唔係早起一族但又好想試吓,可以嚟呢間位於函館bay美食俱樂部入面嘅分店,因為佢地有lunch menu,咁就唔使晨咁早走去食。不過要留意,因為呢間店勁出名,lunch hour出面一定會排哂長龍,想食好野就要做定心理準備!
 
最多人點嘅係呢個自選三色丼,¥1,680就可以喺海膽、三文魚籽、帆立貝、蟹肉、蝦、鮭魚入面揀3款,好抵食!仲有,佢地lunch同dinner同一樣價錢,所以大家想晏奏去又得,夜晚去又得。
 
店方好貼心,為小朋友特設兒童menu,¥500有得揀三文魚籽、蟹肉同鮭魚,份量比正常細少少,啱哂小朋友個胃仔。
 
間舖都幾大,有20個COUNTER位同56個正常座位,不過一到lunch同dinner時間都係會瞬間爆滿!
 
きくよ食堂 ベイエリア店
地址:北海道函館市豊川町12-9 函館ベイ美食倶楽部
電話:0138-22-1994
營業時間:星期一至五 11:30~15:00、17:00~23:00;星期六、日及公眾假 11:00~15:00、17:00~23:00
休息日:星期二
 
=================
2. 勝手丼@釧路和商市場
 
 
勝手丼即係自已拎住兜飯喺魚市場入面逐檔行,睇啱邊樣餸就話畀老闆聽,等佢將餸倒入自己個飯度,好處係海鮮嘅組合完全冇限制,鍾意食咩就揀咩!
 
呢個釧路和商市場同函館朝市、札幌二条市場被評為北海道3大市場,由於呢度好近釧路駅,所以好受遊客歡迎,個個嚟到就買盒飯揸住周圍兜,揀餸揀得好開心。不過唔係間間舖都可以幫你整勝手丼,目前只係有7間舖整得到。
 
大大隻字寫住勝手丼,真係遠遠都睇到。
 
認住白飯「ごはん」呢個字,買咗個飯就可以出發去揀餸啦!
 
食材全部都明碼實價,想要哟咩指一指畀老闆睇就得。留意每間舖個份量同價錢都有少少唔同,可以行多幾間再決定~
 
釧路和商市場
地址:北海道釧路市黒金町13-25
電話:0154-22-3226
營業時間:07:00~17:00
休息日:不定休
 
=================
3. 特選9色海鮮丼@Posei Don
 
 
呢個¥2,100就有蝦、 帆立貝、吞拿魚、三文魚籽、海膽、三文魚、蟹肉等等食材嘅9色丼可以話係坊間少見,係呢間舖頭嘅必點menu,所以嚟到一定要試!呢個丼已經連續2年獲得最想食大賞,緊係啦,一次過就可以食哂9種唔同海鮮,仲要款款都好新鮮好鮮甜,識食緊係食呢啲啦!
 
室內環境好舒服,有榻榻米位同普通座位。
 
另外佢地亦有限定嘅¥500丼,有海鮮漬丼、火炙三文魚丼、海鮮納豆丼等總共有7款,份量同味道都好正常,簡直係窮人恩物!
 
 
 
 
小樽ポセイ丼 堺町総本店
地址:北海道小樽市堺町4-9
電話:0134-61-1478
營業時間:10:30~18:00 
休息日:無
 
=================
4. Omakase海鮮丼@魚屋の台所
 
 
成日覺得食親omakase就好易出事,你睇!出事啦!呢個¥3,000嘅omakase海鮮丼有成15到20種海鮮喺入面,疊到成座山咁高,全部都係師傅挑選嘅新鮮貨色,所以樣樣都好鮮甜超正!如果唔想食哂海鮮先食飯,可以請店員攞隻碟俾你裝開啲刺身先~
 
呢個超多料嘅丼飯都好吸引,¥1,500有吞拿魚、魷魚、三文魚籽、三文魚,嫌唔夠仲要以再加¥1,200加海膽添!
 
呢間舖仔一啲都唔大,住滿人嘅時侯都會覺得有啲迫,不過氣氛就好好,好熱鬧!
 
海鮮処 魚屋の台所 二条市場 
地址:北海道札幌市中央区南2条東2丁目 小西ビル1階 
電話:011-251-2291 
營業時間:07:30~17:00 (食材賣完就會收舖,要去趁早)
休息日:不定休
 
=================
5. 元祖任性丼@滝波食堂 
 
 
滝波食堂位於三角市場入面,唔止係一個可以食到海鮮丼嘅地方,仲係一個賣海鮮嘅地方,所以如果未諗到想食咩的話可以去佢個海鮮檔睇睇有咩新鮮好料,不過小心,你可能會越睇越揀唔到,因為樣樣都好想食......
 
講返個元祖任性丼,¥2,000倒就可以喺三文魚籽、海膽、蟹肉、蝦等等嘅食材入面揀3款,雖然未至於超級抵,不過就真係超級新鮮,真真正正食游水嘅即劏海鮮!
 
認住個「わがまま」布廉,入面就係滝波食堂啦!
 
牆上面貼滿哂menu相,要認真篩選真係要少少時間。
 
北のどんぶり屋 滝波食堂 
地址:北海道小樽市稲穂3-10-16 三角市場内 
電話:0134-23-1426 
營業時間:08:30~16:00
休息日:無