難波某超猛嘅BC電器舖點止係災場,重係刑場、亂葬崗!?

各位網友好,休息咗一日都冇俾啲咩奇怪野襲擊,應該都可以繼續寫落去。上集就提講有關連鎖電器舖「BC」,同埋佢前身嘅P百貨發生過嘅靈異傳聞(未睇過或者唔記得左上集「超震撼!! 難波著名連鎖電器舖其實係關西靈異重災區!」內容嘅朋友請即穿過傳送門睇睇! 當然睇咗嘅都歡迎入去睇多次,當支持下點擊XD)。係咪好過癮呢? 為咗唔想大家睇得太過癮(打還打唔好打面!),今集決定同大家講.歷.史!
 
 
相信有睇過新東方不敗嘅POST,或者早兩日睇完小編個POST自己去搵資料,應該都知道,呢啲靈異事件係來自1972年5月13日發生嘅一件大災難「大阪千日百貨火災」(千日デパート火災),事件導致118人死亡,81人受傷,是為日本樓宇歷史上最大的慘事,而家就嘗試簡單講下發生過咩事。
 
 
事件發生於當晚10點左右,火災原因一般人都會係同你講「一個喺三樓偷偷煲煙嘅電器技工冇處理好枝煙頭」(嗱,之後啲野開始就係冇之前講過啦XD)。
 
不過按照調查報告,其實當時證實咗嘅只係喺三樓發現咗煙頭,而因為當時三樓有改裝工程進行中,所以先有「一個喺三樓偷偷煲煙嘅電器技工冇處理好枝煙頭」嘅講法。其實係有可能係其他人走落三樓煲架。
 
 

而喺各種原因嘅「配合」之下,一場世紀慘劇就發生啦。首先係由於防火閘、扶手電梯嘅防火隔板由於沒有關閉(見圖中紅圈),火勢喺漫延到2同4樓時(見圖),引發出大量毒煙,沿住電梯槽同煙囪直上到7樓。

 
 
由於當日係星期六,7樓的夜總會「Playtown」當時有大量人客,加上停電冇電梯嘅關係,於是就有96人在7樓大堂,或嘗試逃生時死喺5-7樓嘅梯間,另外亦有24人從電梯跳落街,但最後有22個因全身挫傷或頭蓋骨骨折死亡(所以5-7樓後梯、廁所、同電梯係最猛嘅地區)
 
 
 
 
小編日間走去現場留照,冇遇過任何事,係唔見咗一、兩個諭吉。大家不妨睇下有冇見到啲我見唔到嘅野。留意牆上嘅宣傳應該係街外人貼的,應該同現場大廈無關。
 
 
 
 
事後,日本政府規定,凡百貨大樓必須安裝火災自動報警系統、自動滅火裝置、排煙裝置和設置避難層。
 
 
 
可是,點解一個貼近難波跟心齋橋會嘅旺區會係關西有數嘅靈異災區呢(其實旺角嘅新_大廈位置都好旺,還不是...)? 其實BC電器舖坐落嘅位置,連同旁邊嘅黑門市場,其實自大坂夏之陣後直至明治時就一直被起用為安葬及火化遺體嘅千日墓地和黑門刑場。
 
而1972年發生,震撼全日本嘅「大阪千日百貨火災」,其死亡人數118人傳聞更加和刑場時代處決嘅人數完全一致!
 
咁即係原來之前重有刑場﹖唔好意思,刑場之前佢重係亂葬崗添! 成個傳說可以追到返去1615年,當時日本已經係戰國晚期,而且嗰一年該區重係戰區添,那就是著名嘅大坂夏之陣,當年嘅5月7日,松平忠直的越前軍勢攻入大阪城,內應趁勢放火,大阪城也在此役中化為灰燼
 
 
而由於當時死亡人數由於太多,即使以火化方式處理屍體,亦用了一千日才完成(亦有一說係僧侶需要誦經千日,才能超渡亡魂),於是當時的「難波村墓所」(即後來嘅「千日墓地」),就有了「千日前」這個名字。而有趣的是,傳說大阪一帶的火完全救熄,同處理屍體係同一日,即係5月13日。
 
 
 
 
其實早在「難波村墓所」嘅時代,出於風水需要,是故意將出入口置於「裏鬼門」的方位,作為生死陰陽交界。而喺幕府時代,千日前一帶繼續被用來做刑場和墓地,即係黑門刑場同千日墓地,而堺筋的黑門就是「裏鬼門」的位置,即今日黑門市場嘅入口。當時屍體就係經黑門進入千日的葬場火化的。
 
1885年的地圖,千日墓的位置就是今日BC的位置。
 
而處刑的地方就是黑門的左手面,傳說嗰個刑場總共處決了118人,所以先有火災死難人數同處決人數嘅講法。
 
黑門刑場
 
 
現已搬遷到阿倍野的一對石雕像
 
最後,直到明治維新年代,刑場和部份墓地移到今日嘅大阪市營南靈園(阿倍野斎場),空出地方構建新市區,才變成今日遊客必到嘅千日前商店區。時至今日,BC北側的搬貨入口仍可見到為以往死去嘅先人所建嘅光明地藏尊同慰靈碑……
 
 
下集(如果有,老土啲都係睇反應啦)FA_FA講咩詭(暫稱,重有個詭字唔係打錯字),將會同大家講GAME!(冇鬼,好似係...)