金,全部都係金!整對屬於自己嘅金筷子!

來到郵輪嘅第三日旅程,我哋到達位於石川縣嘅金沢市。叫得金沢, 就知道製作金箔係當地一個重要嘅產業喇,到處都可以搵到「金」嘅蹤跡。今日就帶大家去參觀一間金箔工場同埋如何親手自製金筷子喇!
 
▼呢間「金箔屋SAKUDA」早喺1919年已經開業,擁有细腻且深奥嘅金箔制造技術。產品方面亦都好多元化,有食品、素材、工藝品、化妝品等等。
 
 
▼整間店都充斥住黃金嘅氣息,一眾素材背後嘅照片清楚列出金箔嘅製造過程。
 
 
▼當然唔少得其他飾品,不過行完一樓嘅飾品區,千其唔好忘記上埋二樓。因為上面有一間黃金瓷磚嘅洗手間,一定可以令你大開眼界。(洗手間唔方便拍攝,真實環境等你哋自己發掘喇)
 
 
▼店舖嘅另一面可以見到師傳好專注咁製作金箔同幫唔同飾品上金嘅過程。由於金箔輕薄易破,所以師傳除咗眼明手巧之外,真係少啲定力都唔得㗎!
 
 
▼睇完師傳示範,就到我地落手做喇!金箔工場入面有提供唔同類型嘅工作坊,而今次我哋就選擇整一對金筷子。工具就如圖中所示非常簡單。教我哋嘅師傳亦懂簡單英語,不過其實基本上佢會示範每個程序俾你睇,之後跟住做,所以完全唔駛驚會唔明白。
 
 
▼揀好自己心儀嘅筷子款式之後就可以正式動工喇!每人會獲分一條膠紙,之後貼出你想要嘅花紋(遮住嘅部分唔會上到金箔)
 
 
▼完成之後,師傳會幫你上一層膠水,大約等十五鐘就可以準備上金箔喇(左面係製成品)
 
 
▼除咗間條基本款,你仲可以發揮自己無限嘅創意,好似Emily咁,就自製咗一對獨一無二嘅款式。
 
 
▼等啲膠差唔多乾咗之後,就上金箔喇。放好筷子後將佢卷起就可以,不過唔好見我講得好似好簡單,其實金箔好易斷開,所以整嘅時候都要非常小心。
 
 
▼最後一個步驟就係拆膠紙喇!如果你係製作間條款式嘅話,呢個步驟可以十秒內完成。不過由於Emily對筷子有好多點點嘅形狀,所以要逐粒撕落嚟之餘又唔整爛其他金箔,結果要出動師傅幫手先可以完成。所以話要靚幾時都係要付出代價嘅XD
 
 
後記:其實每次去旅行,都好喜歡參加唔同類型嘅工作坊。因為可以親身體驗同了解當地嘅文化,比起淨係Shopping購物更加開心。(當然兩者可以並存喇)所以建議大家嚟到金沢不妨試下製作一對屬於自己嘅金筷子喇!
 
 
【金箔屋SAKUDA】
地址:石川县金泽市东山1丁目3番27号
電話:+81-(0)76-251-6777 
時間:9:00 ~ 18:00
官網:http://goldleaf-sakuda.jp/cn/