【重新開幕】池袋「Sky Circus」・遊玩觀景無難度

話說上次玩完台場嘅VR發覺意猶未盡,知道池袋都有得玩VR,梗係即刻去試下啦!
 
 
經過一年翻新重新開幕嘅Sunshine City展望台「Sky Circus」除咗可以俾大家係離地251米嘅地方欣賞東京全景之外,佢仲加入咗好多唔同嘅玩樂元素。
 
佢總共分咗7個區域,每個區域都各具特色,其中最搶眼嘅就係近期大熱嘅VR裝置啦!即刻同大家介紹下。
 
 
 
1)Sky Circus Tent
 
一入場嘅時侯,職員會帶領你去到一個小劇院嘅地方,企係度欣賞一段4D動畫。係短時間之內感受天晴到落雨再到暴風雨嘅變化。不過由於呢度唔可以拍照,所以大家到時可以親身體驗下啦!
 
 
 
2)天空251
 
一離開劇院就會見到呢個充滿「波波雲」嘅地方。
 
 
其實你已經正式進入展望台嘅範圍,有好多唔同嘅觀景位置,仲有指示話俾你知唔同嘅景點分佈。
 
 
我地係一大早十點左右到達,相信如果係夜晚嚟睇嘅話,景色會更加靚。啱晒情侶上嚟Sweet Sweet睇夜景
 
 
 
3)鏡之世界「カレイドスケープ」
 
話明鏡之世界梗係有好多形形色色嘅鏡係度啦,自戀狂要注意,真係會忍唔住係咁照㗎,哈哈!(女仔係咁㗎啦
 
 
 
不過相信最多人鍾意亦最熟悉嘅就係呢個「哈哈鏡」啦!反正係日本減肥唔成功,唯有轉做極速增肥啦,肥肉就是這樣鍊成的
 
 
當你以為無咩野睇嘅時侯,再行前少少就會有職員帶領你進入一個小房間。裡面會有一連串嘅夢幻燈光秀俾你留影。時間大約幾分鐘左右,而最大嘅好處係佢會分流俾人入去,咁你影相之餘就唔駛驚俾人瘋狂攝鏡啦 
 
 
見到好多人係度聞幅牆,我就行過去睇下啦,原來係七彩繽紛嘅萬花筒!對上一次睇萬花筒已經係好多年前嘅事,今次睇番唔知點解覺得好有治癒嘅感覺。
 
 
呢舊「光纖雲」掃落去唔單只有唔同顏色,仲會有聲出㗎。
 
 
而呢把遮,一開始我捉住佢嘅時侯以為咩都無。但隨住畫面變化,會突然好似落雨咁,你可以感受到把遮係度震動,好似親歷其境一樣。最抵死係,佢除咗落雨,仲會落音符㗎 
 
 
 
4)Sky Bridge
 
終於嚟到最重頭嘅環節「TOKYO BULLET FLIGHT」同埋「SWING COASTER」啦!我係香港見到佢嘅宣傳短片嘅時侯已經好想玩。
 
「TOKYO BULLET FLIGHT」玩法係帶上VR裝置後,再進入呢個發射筒入面,之後你就會開始係未來嘅東京街頭入面摸擬穿梭。職員仲特登問我,平時會唔會玩過山車,因為其實佢有啲似過山車,可能會有少少驚。而我嘅答案係…我唔玩過山車㗎
 
 
你會係東京入面嘅唔同景點穿插,好似玩到中途我就見到自己穿越雷門。因為佢會不停來回衝上衝落嘅關係,所以都有返一定嘅離心力,但對比真正嘅過山車始終都比較輕鬆。所以如果平時無玩開過山車嘅朋友,我覺得都可以挑戰一下。
 
 
如果真係好驚嘅話,就可以試下玩「SWING COASTER」雖然佢都係類似過山車嘅形式,不過相對上就輕鬆好多好多啦!但時間所限,一定要我揀一個我就會選擇玩「TOKYO BULLET FLIGHT」多啲。
 
 
「TOKYO BULLET FLIGHT」「SWING COASTER」都需要另外再購票,分別係600円同400円。而每張入場券只限玩每個遊戲各一次。當日我地唔好彩有一部發射機壞咗,所以要玩就差唔多要排一個鐘左右,不過鞦韆就可以即刻玩,所以大家要有心理準備啦!(可在遊戲區域旁購票)
 
 
5)Sky Party
 
嚟到最後一個遊戲區域,係呢度你可以體驗俾龍捲風捲走,同埋出雷電攻擊其他人。(我地就係度自High咗一陣
 
 
旁邊仲有影相位,係咪好似跌入咗漩渦咁哩
 
 
 
6)Cafe Quu Quu Quu
 
行到最後就可以見到呢個Cafe區域,裝修簡約,而最大嘅特色係你可以選擇窗口位置,咁就可以邊食野邊享受埋東京嘅全景。
 
 
Cafe入面除咗主食,仲有三文治同Donut呢啲輕食類提供,賣相都非常精美。
 
 
佢仲會不時推出期間限定Menu,好似我地去個陣就係呢個「帳篷咖哩飯」啦。
 
 
個人覺得係度玩完一輪如果攰攰地,係度點番杯野飲或者一份甜品嘆下,順便欣賞埋個景色都幾寫意。
 
 
7)Sky Circus Shop
 
入得嚟,又點少得佢嘅紀念品區域哩?商品類別都幾多,好似文具,零食,擺設,公仔,精品等等!而佢嘅商品亦都保持「Sky Circus」嘅夢幻特色,大部分都好「Bling Bling」同埋好可愛
 
 
臨走前你仲可以將自己係度影嘅相上傳到佢地嘅Facebook,大約兩分鐘就可以見到自己出現係上面㗎啦!
 
 
後記:其實我本身已經好鍾意池袋呢個地方,每次去親都一定會去Sunshine City,但上展望台就真係第一次。總括黎講都係一個非常唔錯嘅景點,唔只位置方便,而且仲有得睇有得玩。玩完仲可以落番商場繼續Shopping或者食個飯!
 
時間方面,如果只係純觀景,相信一個至個半小時都夠。但如果玩埋遊戲,因為要排隊嘅關係,可以多加半個至一個小時會比較穩陣。如果下次我再有機會上去,我希望可以係度欣賞夜景,感覺好浪漫,啱晒情侶啦
 
 
購票方法:
 
1)現場購票
 
你可以選擇係B1門票服務處購票,販賣時間為9:30-20:50。(由地下道行過嚟一入商場門口就可以見到
 
 
 
2)上網購票
 
你亦可以選擇網上購票,先選定日期,就可以見到唔同嘅售票情況。
 
 
點選你所需嘅門票數量。
 
 
最後再可以你嘅個人資料,由上至下順序  1)你嘅名/Nickname  2)你嘅出生年月日  3)你嘅性別  4)你嘅電郵或電話  5)再次輸入電郵或電話
 
 
之後你就可以進入付款嘅程序,但留意番訂購後如果要取消將會收取100円嘅手續費。
 
 
票價:
 
以下為各類別票價。記住每張門票只可以購買兩款遊戲各一張。雖然現場都有遊戲券可以購買,但如果上網預訂開最好就買埋遊戲券,咁就唔駛驚到時無得玩啦
 
 
【Sky Circus】
地址:東京都豐島區東池袋3-1-1 Sunshine 60
時間:10:00-22:00
 
 
 
「送禮物時間」
 
今次就準備咗送自己個心心…呀唔係,係呢個Sky Circus限定「心心糖」俾大家。未知幾時有假去旅行,未去到Sky Circus嘅朋友就可以邊嗒糖邊睇Blog頂住癮先啦
 
 
 
1. 讚好LikeJapan Facebook
2. 註冊成為LikeJapan網站會員
3.瀏覽此博客文章時,點選左方的「分享博客文章」以獲得分享連結
4. 會員可透過各大社交平台及討論區分享連結網址,LikeJapan會統計每條連結的點擊次數,會員也可於博客頁面左方查閱點擊排行榜。
5. 截止時間內的分享連結點擊次數愈多,獲獎機會愈大。如有會員的分享點擊數目相同,將根據系統紀錄最快達到該點擊次數的參加者得獎。
詳細玩法亦可參考此頁
*如有任何爭議,LikeJapan將保留最終決定權。
 
 
遊戲截止日期: 
2016年6月21日