【都市傳說】不存在的車站---キサラギ駅 (下)

尋日講到有個獨腳阿伯叫停咗樓主,今日繼續講埋落去。
要睇返尋日講咗咩,可以click返呢度
 
以下開始無責任簡單翻譯,紅色文字係樓主嘅留言。
 
422: 2004/01/09 02:09 
「喂!你行喺路軌上好危險喎!」我以為係工作人員叫我,望返轉頭見到個獨腳阿伯企咗喺度,同我距離有10米倒,轉頭就唔見咗,我已經驚到郁唔到啦……
 
435: 2004/01/09 02:13 
我行唔郁啦,太鼓嘅聲音好似越來越近
 
492: 2004/01/09 02:35 
我打咗電話返屋企,阿爸好似幫我報咗警,太鼓嘅聲音越嚟越近啦
 
516: 2004/01/09 02:45 
我已經行到去隧道口,隧道叫「伊佐貫」,我打算穿過隧道,等我平安通到過去我再話畀大家知
 
586: 2004/01/09 03:20 
我遇到個好好嘅人話車我去附近車站,佢話嗰度附近有間商務酒店,今晚真係唔該哂大家
 
588: 2004/01/09 03:21 
佢話會車你去邊?你問吓嗰個人目的地叫咩名?
 
606: 2004/01/09 03:29 
開咗目的地叫做比奈,不過我覺得冇咩可能
 
623: 2004/01/09 03:37 
架車好似入緊山,點睇附近都好似冇位泊車,同佢講野佢都唔應我
 
627: 2004/01/09 03:40 呢種時間仲喺街應該都唔係咩好人啦!
631: 2004/01/09 03:41 快啲報警啦,呢個可能係你最後一個留言啊
 
635: 2004/01/09 03:44
我手機就快冇電。我都覺得唔係好對路,我會搵機會走,嗰個人由頭先開始就不停自言自語講啲好奇怪嘅野。以防萬一,呢個係我最後一個留言。
 
而當晚,樓主亦都冇再出嚟留過言。
 
不過就喺7年後,樓主突然出現話自己無事。至於當晚發生咩事,佢就話當晚佢一直等機會逃走,突然架車就撞咗,個司機仲唔見咗。然後突然有另一個男人走出嚟同佢講呢度好危險,叫佢快啲走。跟住喺糊裡糊塗嘅情況下樓主一邊喊一邊跑離現場,到佢擘開眼,就已經有個車站出現喺自己面前,爸爸媽媽仲喺度等緊佢添。
 
最離奇嘅係,嗰一刻已經係2011年,父母竟然無特別問佢到底發生咗咩事,只係默默咁帶佢返屋企。
 
成件事到底係真係假已經成為咗一個迷(個人就覺得假假哋),最令人難相信嘅係點解佢一出返去就會見到父母等緊佢?唔通佢父母日日都喺度等佢等足7年?終於等到嗰刻點解父母可以咁冷靜?
 
不過我覺得最恐怖嘅唔係誤闖一個未知嘅車站,而係凌晨3點幾上陌生人車,畀佢車自己唔知去邊,如果係我,我一定唔夠膽。
 
如果係你,你又會點揀?