返工壓力大?等《尼采老師》打救你!

唔知各位有無追開日劇呢?冬季日劇都已經慢慢步入收尾階段,季初既時侯相信大家都對唔同既作品例如都抱有唔少期望!各位今季既最愛又係邊套呢?會唔會係由有村架純主演既追憶潸然(いつかこの恋を思い出してきっと泣いてしまう),又或者有深田恭子,三浦翔平同藤岡靛演出既拜託請愛我(ダメな私に恋してください)呢?
 

 

以上呢兩套筆者都有睇,但最近由網友票選《最讓人失望的冬季日劇》竟然兩套都有入選(唔係掛!?),而追憶潸然入選第二名既既原因似乎唔少都因為劇中所帶來憂鬱既情感…
都係既!明明已經星期一,仲要人睇完個心再沉一沉,確實可以理解XD

 

儘管有唔少自己追開既作品有入選,但筆者對佢地既愛依然唔會改變!但如果要講到自己私心最鍾意既一套日劇,筆者就會揀一套比較特別既作品,因為每星期做完野返到屋企好多時侯都只係想鬆一鬆,想笑下,唔想再用咁多腦又或者再添煩惱!而今季有別於追憶潸然時而沉重既劇重,《尼采老師》正正係筆者同各位近排倍感壓力既各位需要既作品!

 

 

《尼采老師》原本係一部漫畫作品,故事內容係源自一位係Twitter名為「松駒」的便利店店員,佢將一位綽號為「尼采老師」既同事既搞笑經歷所分享上網;而呢一位「尼采老師」之所以被冠上著名哲學家(仲要係後期痴左線既哲學家)既所言所行非常唔簡單,當中看似胡說八道但卻又好似好有道理既發言都令唔少工作人士,尤其係服務業人士倍感共鳴,係幽默描寫呢位「尼采老師」經歷既同時,亦都帶出左服務業所需要面對不合理既真實一面,最後瀏覽人次更突破300萬,成為網絡大熱!

 

 

可能好多人都會好好奇點解該位同事會被稱為尼采老師,相信大家都有聽過一句由真.哲學家尼采所講過既一句名言—「上帝已死」;而呢一位同事竟然好九唔搭八地用呢一句名言去回答「客人就係神啦!」既斥責…如果筆者係個客人的確駁唔到…因為相信自己已經被嚇跑!

 

 

可能有人會將呢一套真人劇集同原著漫畫比較,老實講筆者自己都唔太喜歡將二次元既作品還原為由真人演出既劇集,但呢一套「尼采老師」實在係一個例外,雖然漫畫同劇集睇到既笑位可能係一樣,但有趣既地方卻完全唔同—除左漫畫原有既笑位之外,今次真人劇集各種既元素唔單止保留左呢啲好笑既位置,仲添上左唔少有趣既地方!而家就等筆者為各位係唔劇透既前提下介紹一下啦!

 

還原度高的演員

首先靚仔間宮祥太朗相信唔使筆者多講,佢其實已經出演過唔少由漫畫改編既日劇架啦!有睇過不良仔與眼鏡妹,七田君與七魔女等作品既讀者相信都對間宮祥太朗呢位男優唔會陌生。而今次由佢所演出既尼采老師實在令筆者覺得好配合!佢總能夠以poker face講出一句又一句「震撼」而又爆笑既台詞,佢簡直就將漫畫當中既反差原全呈原出黎XD

 
 

 

然後又點少得由SKE48畢業既松井玲奈呢?佢係「尼采老師」呢套作品入面飾演深愛主角既塩山楓,故事中佢單止需要背出一大堆九唔搭八既水蛇春台詞,更需要搭合角色「痴女」性格造出各種「形象崩壞」既舉動!有唔少觀眾都因此話佢演技好,筆者認為單係佢放膽既演出已經值得大家稱讚!
真係唔可以睇少女優既實力…
仲有片睇添:
 

 

豁出去的顏藝
有唔少人擔心真人劇會無辦法造出漫畫中既喜劇效果,但原來真人劇演起上黎趣味性唔止無減,而且仲大增!當中最令筆者深刻既一個又一個誇張得黎又好到位既顏藝!每次筆者見到各種莫名其妙既顏藝都會忍唔住笑左出黎!

 

演員偷笑埸景
老老實實,筆者都認為自己笑點有返咁上下高,有時有啲埸景的確唔太笑得出,但當你見到劇中一眾演員自己都忍唔住偷笑既時侯,自己就好唔爭氣地笑左出黎!其實都可以理解,劇中既舉動實在太…「特別」啦,正常人係無可能會咁做,演員見到對手做出啲咁奇怪既動作笑都係人之常情,而我往往笑既位就係係見到佢地忍唔住偷笑既時侯!

 

 筆者睇個時基本上係跟住佢地一齊笑XD

故事以尼采老師及擔當吐糟役既普通店員松駒為主軸,以便利店為背景所發生既一件又一件爆笑趣事為題材,而劇集亦都有各種奇奇怪怪既角色,等大家保持住新鮮感!想知故事仲有咩有趣既角色,想跟尼采老師學習下點應付無理既顧客,又或者只係想放完學放完工鬆一鬆,相信尼采老師呢套作品都會好岩你!