輕鬆穿越日本!!點都要去一次嘅傳統街道

去日本除左買野食野之外,當然唔少得影靚相啦!要影相呃like就一定要有個靚景先得,我知,我都知日本是但邊到影都好靚,但黎黎去都係五光十色嘅大都市,個個都咁影見到都悶啦!而家就教你,要呃到like就一定要搵傳統嘅日本景先夠特別,咁除左京都邊到先有?即刻睇啦!
1. 吹屋ふるさと村(岡山県高梁市)
 
呢個吹屋ふるさと村,係由一排棗紅色嘅小屋並列而成,屋頂嘅紅色配合環境四周圍嘅綠色大自然顯得特別有風味。
 
佢喺昭和49年(1974年)被岡山県嘅ふるさと村認定,喺昭和52年(1977年)正式受認定為國家嘅重要傳統建造物群保存地區。
 
 

呢到全部屋仔都係棗紅色系,可以的話喺呢到過一晚夜,一朝早起身散下步,一定係洗滌心靈嘅最佳方法。

2. 倉敷美観地区(岡山県倉敷市)
 
倉敷市位於岡山県南部。因為相中嘅呢D傳統白色小屋實在比人一種回到古時日本嘅感覺,所以非常受歡迎,有好多日本人都會專程去懷一懷舊。

呢到就好似主題公園咁靚,但係果到其實係有普通市民生活,並唔係一個完全嘅遊客區,所以個感覺更加似穿越左,又或者好似活左電影嘅世界裡面咁。

呢到咁完美,係一個治癒到人心嘅空間。即使只係用半日時間去行一行,相信己經會沉醉當中。
3. 角館武家屋敷通り(秋田県仙北市)
 
「武家屋敷通り」係我呢到之中最鍾意嘅景點。點解?因為佢四季都各有特式而且超級靚!!!有幾靚呢就自己睇相啦,反正就正到我想即刻買機票去啦。
春天係櫻花,夏天係綠油油,秋天係紅葉,冬天係雪景,反正四季都有唔同特式,包你時刻有驚喜!
4. ひがし茶屋街(石川県金沢市東山)
ひがし茶屋街位於浅野川嘅岸邊,由江戶時代就有茶屋街呢個名。

佢被譽為係小京都,因為佢同京都一樣處處都散發住古香嘅氣息。由金沢駅行一分鐘左右就會到呢個以「ひがし茶屋」而出名嘅明治初期就建築落黎嘅重要傳統建造物群保存地區。

佢就好似京都嘅祇園咁,但係就比祇園更親切,亦都有好多賣石川傳統工藝品,金箔化粧品等等嘅手信店。影完相仲可以行陣街添呀!
5. 奈良井宿(長野県塩尻市)
奈良井宿係江戸時代,用黎連結江戸同京の都嘅重要街道,佢由上町・中町・下町三個街區而構成,直到而家都一直保留住濃厚嘅日本色彩。

喺二月果時仲會有「Ice Candle」祭,喺古老嘅街道中放上蠟燭,大家自己幻想下個畫面,我諗都真係靚到講唔到野。
點呢睇完有無即刻想去嘅衝動呢?我認為日本傳統嘅景色依然係最吸引嘅,雖然我都好鐘意去大都市,感受呢個地方嘅現代感,都傳統果一面先至係每個地方自己最獨特,最無可取替嘅特式丫嘛!