超震撼!! 難波著名連鎖電器舖其實係關西靈異重災區!

坐落於難波嘅一間7層高大型連鎖電器店,小編姑且稱呼佢做BC電器店吧。相信應該很多遊客嘅荷包都有喺嗰度壯烈犧牲啩。不過,嗰度除咗係有名嘅血拼地區外,其實重係長期盤踞於關西十大,號稱大阪最猛之一嘅靈異地點。
 
同地點不斷傳出靈異傳聞
 
自從1972年發生震撼全日本嘅「大阪千日百貨火災」後,該地段就不停傳出詭異傳聞,甚至連今日BC的前身,源自法國春季一樣的百貨公司(下稱P百貨)都淪為靈異重災區。對於靈異事件連續發生,大部份人歸咎於火災做成嘅怨念太重,亦有人好似小說『殘穢』一樣,推理是由千日百貨地建築地區嘅前身:黑門刑場的亡靈吞併火災的冤魂坐大,甚至有人翻查記錄,發現「大阪千日百貨火災」嘅死亡人數,同刑場時代處決嘅人數同樣係118人!我哋而家一齊睇下佢地遇到過啲咩野。
 
有關大阪千日百貨火災,可參考以下新聞片:
 
 
話說現有的中文網路資源都有好幾個關於BC嘅傳聞,但其實佢地好多都係發生在P百貨年代的,這裡就綜合講下現有中文資訊有/冇提及過的傳聞。
 
P百貨的傳聞
千日百貨(圖片來源:隣の心霊スポット / 千日デパートの呪い)
 
1
有經常去P百貨嘅OL透露,明明店內照明正常運作,但有時總係會有一刻會覺得四周忽然變暗咗。另外一樓廁所最後一格長期禁止進入,而且經常有被監視的感覺。百貨內不知為何鏡子多得很奇怪,而且有傳聞有人見過鏡內有現實不存在的「人」跑過……
 
2
有曾經在P打工嘅女學生表示返新兼職冇耐,有次當公司關門後,員工們如常按指示開始進行補貨同更換折扣牌等工作,當時間去到10點左右……
 
「火燭呀!火燭呀!」一把陰暗嘅女聲透過公司的廣播系統傳遍整棟公司,女學生好驚想即刻逃走,但主管卻表示「不要理會」,而冇幾耐廣播就停咗啦。事後佢先知原來久唔久就會有類似的廣播,而且每次都係唔同嘅聲線,甚至有試過是一把女仔聲在哭住求救,於10點左右這個火災發生時間……
 
3
當年P公司係有一個相對上奇怪的習慣,就是員工必須在放工時間一齊離開公司,所以如果當時P公司放工時總係一大群人一齊放工。傳說係因為曾經有幾個員工試過單獨OT後就從此下落不明。
 
4
這個傳聞其實都頗常見於各大華文討論區,話說有位仁兄曾做過送貨員,有一次曾送貨到8樓嘅畫廊(由於而家該大廈8樓係做100日圓店同脫毛,所以估計都係P百貨年代嘅事。),當時在8樓冇人嘅男廁會聽到女性嘅聲音。
 
BC年代的傳聞
 
P百貨嘅經營因赤字問題而於2000年12月31日結束營業,取而代之嘅就係連鎖電器舖BC。不過靈異傳聞卻冇因為易手而停止。
 
1
來自全日本靈能者聯盟,曾經指日本會在2020年後沉沒的ひょうたん良老師,2001年,即BC開張當年便曾指自己在3樓見過有7-8隻巨大的靈體能量正在合體當中(唔知角川拍貞子VS伽耶子時有冇參考過),而當中有的靈體,更加有超過100年嘅歷史。
 
佢重指出呢股可構成靈災(唔知瀬川初創作時有冇參考佢)嘅力量係令P百貨同之後嘅公司都做唔長嘅原因,重話BC都會一樣喎。當然而家嘅BC都重係一間好旺嘅分店……
ひょうたん良老師發表嘅未來透視(來源:http://www.uranai.gr.jp/yashiro.html)
 

 

 
2
據稱BC開業前就曾經已經係靈異事件續出,包括工人電梯經常有人單獨搭電梯時唔知點解被爬傷。而由施工到開業後,晚上都會聽到「呯」的一聲巨響好像有人從高處墮下一樣。另外,經常有員工及遊客會在樓梯或廁所內等沒有人的地方無故被絆到甚至推跌,另外亦有指有員工在5-7樓的梯間見過逃跑或掙扎的人會直接穿牆消失。
 
3
中山市朗老師
 
呢個都算經典同比較可信的傳聞,因為主角係「新耳袋」作者中山市朗老師,有次同一位女編輯喺BC旁的一間壽司舖傾野。途中,身後嘅自動門突然自動打開,女編輯呆了一呆,睇到店舖最入嗰個位坐咗個睇起嚟似從事風俗業嘅女仔。不過,廚師卻始終冇理過佢,冇奉茶、亦冇任何招待。
 
中山原本想重啟對話,同時間卻聽到女編輯突然慘叫咗一聲,然後佢身後嘅自動門自己打開、關閉。
 
嗰個女人唔見左。
 
雖然中山老師本人冇留意,不過女編輯似乎見證咗女性由入嚟到出去成個過程。廚師似乎見到女編輯嘅表情,於是就走埋嚟搭嗲:「客人你都睇到?冇辦法啦,呢度係千日前嘛。」

4

除左久唔久會有人目擊的士未上客就開走外,的士司機亦都經常中招。藝人岡八朗就曾轉述的士司機上田信次在BC電器店嘅經歷。
「唔好意思,我個仔急病呀! 急住要去萩之茶屋!」
 
由於睇起上嚟好危急,上田就立刻俾油直奔國道26號,好快就到咗萩之茶屋附近。呢個時候,後面突然傳來燒焦味…
 
「呢位客人,車上係唔可以食煙…」佢邊講邊轉身,發現後座已經一個人都冇。
 
5
圖文無關
 
還有一個是在華文網路上都幾出名。話說由於千日百貨嘅死難者集中喺7樓,因此在BC開業前就曾作大規模嘅「針對性工作」,包括設置大量鏡子、淨靈祠等。另外重有嘅就係為咗防止怨靈大規模往下遷移,於是就將5-6樓上落嘅電梯位置對調…
 
當然,有去過呢間電器店嘅朋友,相信都會發現:根本冇對調啊〜〜〜不過咁,上落嘅電梯位置係有對調嘅,不過係喺B2同1樓之間。
 
因此,電梯位置對調其實重有另一個版本:因為喺起難波一帶的地下街時,就在大約B2樓的位置發現大量屬於千日百貨前身:黑門刑場嘅白骨,對調B2同1樓之間嘅電梯,會唔會係為咗抵禦嚟自地下嘅怨靈呢?
 
今日就先同大家講住發生喺呢度嘅城市傳聞,下集將會講解有關呢片土地嘅演變,睇下會唔會好似『殘穢』咁愈掘愈多野……(望下檯底有冇鬼…)