【貝遊日本】奈良景點推介-若草山睇超靚日落

▼奈良呢個地方相信大家第一時間都係諗係鹿,我同大家一樣,頭2次去奈良都只係為左見鹿仔同佢地影相,但其實奈良都有好多靚嘅景點,當中包括"若草山",一個我非常喜愛嘅地方!
 
▼若草山係一座高約342米嘅山麓,位於東大寺同春日大社之間,有2個入口處,分別係南北入口,北入口就近東大寺,南入口就近春日大社,一路上就會有指示牌指示若草山嘅位置。
 
▼南入口位置
 
▼若草山都有好多鹿仔
 
▼入山係要比入場費,150YEN一個人,入場時間為早上9點-下午5點;不過注意返,最後入場時間為下午5點但並非5點就要離開若草山,只要你5點前入到去就可以逗留幾耐都得,不過夜晚係好黑的,所以都建議日落後就離開!
另外冬天係唔開放嘅,今年2016嘅開山日期就係由3月第3個星期六至12月第2日星期日。
 
▼若草山係分左一重目,二重目同三重目;三重目係最高嘅山頂。
到達山頂三重目嘅時間約需要1小時,但好多人都話一重目嘅景觀比三重目更靚,因為三重目好多地方都被遮擋,所以我只係以一重目為目標,如果鍾意行山嘅朋友就可以挑戰埋二三重目啦!
 
▼一入到去就見到一大遍草地同好多鹿仔
 
▼呢道啲鹿仔比喺奈良公園嘅鹿溫馴好多,見到人係完全一定視而不見嘅MODE,淨係專注食草。
 
▼咁我就同啲鹿仔影返幾張合照啦
 
▼好多鹿PATPAT
 
▼呢道真係好舒服,非常空曠,又有大草地又有好多鹿,不過注意返一開始呢段草地有好多鹿屎,想坐低影相就要小心啲揀位置XD
 
▼同鹿仔影完相就開始上山啦,南入口入到去,靠近右邊位置就有一條小徑比你上行,都幾花體力架!
溫馨提示:記得買定足夠飲品,因為上到去係冇野飲買的!
 
▼上一重目淨係需要行2段斜路,大約20分鍾左右就上到去,你問我辛唔辛苦,我覺得還可以,佢的確係幾斜,但好在時間唔太長,所以我覺得怕辛苦嘅人都唔駛驚!
 
▼如果想再上嘅話就繼續行,但我就到達一重目就足夠啦
 
▼若草山一重目,眼前嘅景像真係好靚,整個奈良市一覽無遺,重點係冇乜人,成個山頭就好似我玩晒咁係一個想休閒放鬆嘅好地方!
 
▼我上到去嘅時間係4月時份差唔多5點半,太陽慢慢咁落山,如果大家想睇純藍天嘅話就要早上嘅時間黎啦!
 
▼等緊日落嘅期間就影返幾張HYPER相先,因為我實在太鍾意呢道,所以開心到跳起同埋注意返呢道都幾大風~
 
▼太陽開始跌落去啦,真係無敵靚,好難想像一個咁靚嘅地方周圍仲要係冇乜人好感動~
 
▼又要CHOK返張相先
 
▼完全唔想離開
 
▼呢到除左每晚有日落同夜景睇之外,春天仲會有櫻花,秋天會有紅葉,一定又會喺一個非常靚嘅景像!
而呢道喺每年1月第4個星期六仲有個好出名嘅火燒山祭!
 
《若草山》
地址:奈良縣奈良市春日野町若草157
入場費:150YEN
開山時間:0900-1700