【話你知】吉野家另類點餐法

唔知點解,食過日本嘅吉野家之後硬係覺得日本吉野家好似好食過香港嗰啲咁,搞到去日本諗唔到食咩好就會自自然走咗去幫襯。
 
日本應該亦有好多人同我一樣鍾意食吉野家,因為一上網Search「吉野家 裏メニュー」,(即係唔喺吉野家Menu上嘅料理),就出咗好多當地人嘅點餐心得,今次為大家做咗個少少嘅整合,咁大家下次去就可以試吓係咪真係Work喇~
 
1. 多洋蔥 → ねぎだく(negidaku)
 
 
吉野家啲洋蔥煮到?哂入哂味,根本就係牛肉飯嘅精萃之一,喺日本原來可以叫佢畀多啲㗎喎!相對地,唔鍾意食洋蔥可以叫走洋蔥「ねぎ抜き(neginuki)」,咁佢就會一條洋蔥都唔畀你㗎啦~
 
=================
2. 淨洋蔥 → ねぎだけ (negidake)
 
 
原來真係會有人鍾意食洋蔥到走牛肉,定係點餐嗰個人唔鍾意食牛肉呢?點呢個要留意返,佢同「多洋蔥」只係差最後嗰個音,多洋蔥係「ku」,淨洋蔥係「ke」,小心一叫錯就一塊牛肉都冇得食㗎啦!
 
=================
3. 牛肉放底 → 肉下 (nikushita)
 
 
牛肉丼飯見唔到牛肉都係第一次!原來咁點法係有原因嘅,話說點餐嗰個人話次次去食牛肉飯啲飯都沾滿哂啲牛肉汁,食唔到米飯原來嘅味道,所以就叫店員幫佢將牛肉放底,咁就又食到冇沾到汁嘅白飯,又食到肉汁豐富嘅牛肉喇!
 
=================
4. 超多汁 → つゆだくだく (tsuyu dakudaku)
 
 
叫多汁大家應該都識,喺香港應該都有試過,但呢個超多汁version你又點睇?啲汁直情多到浸過哂啲飯,好誇張!
 
=================
5. 多啲肥肉 → とろだく (torodaku)
 
 
吉野家用嘅牛肉本身都有少少肥,不過有人就係鍾意啲牛肉越肥越香,特登叫店員盡量㨂啲肥啲嘅。而如果唔想要咁多肥肉嘅就可以講「とろぬき (toronuki)」,咁店員就會盡量揾啲瘦啲嘅牛肉畀你㗎啦~
 
其他仲有好多奇奇怪怪同實用嘅點菜方法,例如:
 
6. 淨蛋黃 → 黄身だけ (kimidake)
7. 沖淡啲味噌湯 → お湯割り (oyuwari)
8. 想食凍嘅飯 → つめしろ (tsumeshiro)
9. 淨係要半份飯 → かるいの (karuino)
 
大家有機會去日本吉野家嘅話不妨試吓,不過記住唔好喺lunch hour啊dinner time嗰啲時間去試喎,為咗你一個阻住後面就唔係咁好啦~