【試食報告】唔係呱！去到日本仲食薩莉亞？

唔講你唔知（可能你知）…薩莉亞係日資公司開嘅，後來擴展業務先去到新加坡、香港、上海、北京、廣州同台灣開分店，賣點係平、靚、正！

而我最鍾意薩莉亞嘅地方就係佢所有嘢都細細碟，咁就可以嗌多幾款唔同嘅嘢食，啱哂貪心嘅我！但另一方面，我曾經係薩莉亞一路食，一路聞到啲奇怪氣味，直頭想反胃，自此之後我就冇再去食過喇。

今次嚟到日本廣島，我就應大家嘅要求，一嚐日本薩莉亞喇！點解佢哋想我試食？好簡單姐！大家去到日本自自然然會食啲地道嘢，點會想試薩莉亞吖？！就算你想，你同行嘅另一半都唔會俾喇！係咪先？哈哈

裝潢同香港薩莉亞基本上冇咩分別

飲品吧有好多選擇（190Yen任飲唔嬲）

我揀咗野菜果汁，感覺上幾健康，100%果汁（佢話）

薩莉亞Menu，同香港有啲唔同，偏向日本口味，例如有咖喱飯、半熟蛋等等，部分係季節限定！如果你留意到價錢，佢地價格係比香港低，肉醬飯299Yen、Pizza通通399Yen。

由於我係一個人去，叫嘅嘢食唔多，揀咗一啲大路嘢，整體味道唔錯。（有冇留意雞翼係有5隻？多過香港1隻！仲大隻啲添）

食飽飽之後比我發現，原來平日會有套餐優惠，500Yen有9款唔同嘅餐揀！日日食都唔怕厭啊！

感想：同香港薩莉亞相比，日本薩莉亞略勝一籌，但驚喜就唔大，個人嚟講就最鍾意食雞翼同+190Yen嘅飲品吧。另外我仲見到有湯吧！但就只限星期一至五，我就無緣試喇。如果你下次去日本好多日，食日本菜又食到悶悶地，諗唔到食咩好，就去薩莉亞試下喇，唔洗煩吖嘛！

薩莉亞－廣島本通商店街
地址： 〒730-0031 Hiroshima Prefecture, Hiroshima, 中区紙屋町2丁目3−26
電話：082-545-6730
營業時間：10:00–02:00