【視覺味覺五感多重享受】必食超罕貴燒牛肉丼飯3選!

燒牛肉丼飯同牛肉丼飯完全係兩回事,雖然牛肉丼飯都好好食,不過如果畀我揀,我一家揀粉紅粉紅睇見都知嫩口嘅燒牛肉丼飯,一篤爛個蛋黃,蛋黃醬滲透每一片牛肉嘅超治癒嘅視覺效果,真係諗起都想即刻食返碗!
 
日本有好多店舖都食到燒牛肉丼飯,以下落嚟係東京市可以食到嘅幾間,間間都極度吸睛,真係引死人!不過想食都唔係咁易,因為人地每日都限量供應,要食最好等佢一開門就入去食。好在呢3間開店時間都唔算太早,要食到難度唔算太高。
 
 
1. 雲丹ローストビーフ丼@Gottie's Beef ¥1,680
 
 
Gottie's Beef嘅燒牛肉丼飯個賣相做得超靚,好可惜一日只賣10客,要食唯有等佢開門就入去食啦。見到店員拎住個飯行埋嚟嘅一刻,勁想叫佢行快兩步,快啲放低個飯畀我食!
 
呢個燒牛肉丼飯比較特別嘅地方係,蛋黃嘅周圍圍咗一圈海膽,當你一篤爛個蛋黃,啲海膽就會瞬間沾滿蛋黃汁,再睇住充滿海膽味嘅蛋黃汁流入啲半熟嘅牛肉入面,呢一刻到底應該係要食海膽先定係牛肉先,好難揀添......
 
食燒牛肉丼飯最期待就係將個蛋黃篤穿嘅呢一刻!
 
沾滿咗蛋黃汁嘅海膽係咪極度吸引呢!好少會用熱嘅飯送海膽食,今次沾蛋黃汁嘅食法唔單止令海膽更加creamy,飯嘅熱度更加令海膽嘅香氣逼哂出嚟!
 
跟住當然要試吓個主角啦!牛肉勁幼嫩,越咬越有肉香,最緊要係夠軟,完全冇硬柴柴嘅感覺,正!
 
終極嘅食法緊係全部野加埋一次過放哂入口啦!肉嘅香甜、海膽嘅香濃,都一次過畀蛋黃汁提升哂出嚟,好唔捨得咁快就食完,真係人間極品啊!
 
Gottie’s BEEF 池袋西口
地址:東京都豊島区西池袋1-38-5 セイコービル2F
電話:050-7576-4080
營業時間:11:30–15:00、18:00-23:00
休息日:無
 
===================
2. ユッケ風のローストビーフ丼@牛肉問屋 和 ¥980
 
 
一般嘅燒牛肉丼飯嘅牛肉都係一塊塊咁切件上,但呢個就係切粒上。牛肉偏生,不過呢個做法反而更突出牛肉本身嘅滑溜口感,表面輕輕咁用火燒過,油香被迫哂出嚟,加埋一大隻蛋黃同大量嘅蔥,徹底撈混之後雖然個賣相同一般食開嘅燒牛肉丼飯好唔同,但口感同味道都更加豐富,非常值得一試!
 
因為加入咗洋蔥、蔥花、蛋黃、海苔、芝麻等唔同材料,撈混咗之後米飯吸收哂所有食材嘅精華,個飯真係異常地好食!
 
喺未完全撈混之前當然要就咁試吓沾滿蛋汁嘅牛肉啦!咁樣食牛肉真係勁香滑,加埋洋蔥嘅微辣刺激,一路食真係會好似傻咗咁不停講好好味~
 
撈混哂之後個樣確實係冇咁吸引,同埋略嫌蛋黃汁唔夠多,好在有大量蔥花搭救,成個飯先唔會越食越乾。
 
牛肉丼屋 和 ららぽーと立川立飛店
地址:東京都立川市泉町935-1 ららぽーと立川立飛 3F
電話:042-512-5129
營業時間:10:00~21:00
休息日:不定休
 
===================
3. 肉山のローストビーフ丼@GINZA STEAKバル DAIGO ¥2,000
 
 
呢個燒牛肉丼飯都係限定款式,一日得10客,好矜貴。未入舖頭已經望到門口個燒牛肉丼飯menu,當刻嘅感想係「係咪真係有咁靚啊」。坐低落完5分鐘倒個飯就到喇,嘩真係好靚,好似仲靚過門口張相!每塊牛肉都呈粉紅色嘅誘人狀態,油脂文理分佈得非常平均,一望就知係好野!
 
呢個飯個主角係黑毛赤身和牛,牛肉本身嘅肉香已經非常濃郁,所以蛋黃汁除咗令牛肉更加濕潤之外作用不太大。
 
店入面有來自熊本「豊前屋本店」嘅馬肉刺身醬油,加少少芥末點牛肉嚟食原來仲好味,啲味道好夾!
 
食到尾如果已經食哂啲牛肉但仲有飯剩,不妨叫多隻生雞蛋用嚟拌飯,加少少刺身醬油撈混佢又係一道極之好味嘅絕世美食!
 
GINZA STEAKバル DAIGO
地址:東京都中央区銀座5-1 銀座ファイブ B1F
電話:03-6274-6929
營業時間:11:00~22:00
休息日:12月31日~1月1日