藤子・F・不二雄博物館 多啦A夢我嚟啦!

「叮噹」正名做「多啦A夢」都已經唔知過咗幾多個年頭,之不過我仍然成日忍唔住叫佢做叮噹(唔小心透露咗年齡)><
一句「你睇!叮噹嚟啦!」唔知喚起咗幾代人嘅童年回憶(而家D細路淨係識「冬甩個爸爸」!)
不過今日我地唔講「你睇!叮噹嚟啦!」,而係掉返轉話「叮噹!我嚟睇你啦!」先啱~
冇錯,今日我終於的起心肝,千里迢迢由都心去登戶再去到川崎市嘅「藤子・F・不二雄博物館」~
 
由都心去「藤子・F・不二雄博物館」其中一個最方便嘅方法,就係先搭車去新宿,轉小田急線去登戶站,再係站出面轉巴士去到博物館門口~(係呀已經係最方便㗎啦……大約1個鐘左右啦)
大家亦都可以選擇喺向ヶ丘遊園駅/JR南武線宿河原駅行路過去博物館慳返程車錢,不過最近天氣真係夏日熱辣辣,如非必要都唔會建議大家行15分鐘過去……
而且,重點係,㗎巴士係印晒老師嘅作品係上面,好盞鬼㗎!(除咗依架白色款另外仲有款藍色㗎
 
一上到車,連啲坐位都印晒公仔,禁鐘落車個掣都變晒Q太郎個樣㖭!真係未到埗先興奮~
 
大家拎住再換票證入去(最後再教大家買飛),姐姐們就會換2張入場劵比你~
入場劵有好多好多種唔同樣㗎!抽到一張多啦A夢,lucky!
喺依到你會收到一個語音導航機,有中文、英文、仲有「子供用日文」比大家揀~
如果你都係同mika一樣,只係識得半桶水日文嘅留日菜鳥,好推薦大家用小朋友嘅日文版本!
有小遊戲玩仲有bonus track!
 
 
場刊地圖都有中文(可惜係簡體),方便唔識日文嘅大家!
 
 
入到去即刻放低啲行李再出發去玩!
 
2點入場,飯都未食,即刻上餐廳朝個聖先!我點咗個卡邦尼意粉,對眼係芝士嚟㗎!仲有一舊可羅(コロ助)可樂餅(食晒字!)~
 
飲品有咖啡、士多啤梨奶、朱古力等等~但係大家係冇得揀上面個款係邊個角色㗎!好在多啦A夢嘅出場率都好高吓啫!
 
如果你叫咗飲品,就會附送一個杯墊比你~好開心啊!
 
講到要打卡呃like就一定要叫依舊記憶麵包……啊唔係,應該係記憶西多士先啱!
不過乘數表我已經冇問題,有得揀的話比較想將啲日文生字影晒上去www
 
食完就入去長覽館啦!我覺得依個展覽實在係令我喜出望外!
本身我以為只會係得啲普通漫畫睇,但原來有更多更多更多!
其中一個最令我印象深刻嘅,就係將叮噹入面各個角色嘅映象,投射上實物漫畫上面互動,介紹漫畫嘅繪畫過程~
真係好好好得意啊!
 
 
 
依個展其中一部分係關於「大雄的日本誕生」嘅故事(唔多唔少都有幫新劇場版賣廣告嘅成分www)
 
 
另外仲有老師嘅工作室比大家睇!一抬頭見到有咁多咁多書真係不得了地震撼啊!
 
睇完展覽就嚟到依個漫畫閣!有好多漫畫任睇,大家都好努力地瘋狂刨書www
 
另外一邊有各式各樣嘅小遊戲玩~
 
例如依個~
 
仲有超巨形扭蛋機~另外仲有巨形平板電腦遊戲之類~~~
 
大家唔好睇漏依個大約15分鐘嘅小劇場啊!雖然冇字幕,不過同行友人係1粒日文都唔識嘅情況下都睇得明,所以我相信係冇問題嘅!
 
睇完室內,就去室外影相打卡!依個最受小朋友歡近嘅景點係中午時份人頭湧湧,建議大家5點左右先上去影相,唔洗係咁比人攝鏡嘛~
 
點解明到恐龍仲可以咁開心,比我就走夾唔抖啦!可能我睇得太多侏羅紀啦……
 
隨意門!!!!!!我要撲入去啦!!!!!
 
仲有唔知點解冇人幫襯嘅叮鈴(多啦美)~
 
差啲口快快叫錯咗伊莉莎伯(熱愛《銀魂》的朋友們你懂的)!係Q太郎之啱~
 
天台餐廳隔離有間菓子屋~入面有啲野係地下個間shop冇㗎!
 
記憶麵包造型多士~勁得意啊!做手信自用都一樣咁正~
 
 
仲有大盒裝box set㖭~
 
 
多啦A夢波波綿花糖~
 
仔細啲睇,啲通心粉係多啦A夢同啷啷型㗎~
 
曲奇餅仲印住一格格嘅漫畫係上面㖭~
 
睇完天台嘅菓子屋,落返去地下最後血拼~
 
 
差啲以為自己仲係展覧館哈哈~
 
卡通精品當然唔少得大大細細嘅公仔啦~
 
我最鍾意依個初登場叮噹公仔!好好好好得意啊!
 
多啦A夢and friends~
 
當日嚟個陣做緊胖虎Fair(冇見一排靚仔咗喎),有好多好多胖虎野!
 
我見到最多人買嘅就係依啲飾物啦!夾住隻竹蜻蜓係頭到周圍玩的確好頂癮~
如果想帶住嚟玩,就記得嚟買咗先好去參觀啦~
 
有冇人可以答我,點解連File都可以咁靚!(特別係米色個個!我已經用緊啦哈哈)
 
依到都有食物類手信㗎!有啲仲係上面冇㖭~
 
 
 
最後想同大家分享依啲非常精美嘅曲奇!可惜係非賣品啦,如果唔係我都想帶返屋企啊!
 
*以下係買飛教學
大家記住記住記住,「藤子・F・不二雄博物館」係必須要提前買飛嘅!
大家要去Lawson嘅售票機揀買ticket,再揀「藤子・F・不二雄博物館」買飛~
 
 
㩒入去之後會叫你揀日子,如果平日早幾日買都仲有,但如果係星期六日去就要早啲買啦!
好啦,重點係,你一定要揀一個入場時間,時間淨係有10點、12點、2點同4點4個時間揀,揀咗時間之後,你一定要係指定時間嘅半個鐘之內入場,唔係就作廢㗎啦~雖然有限入場時間,但係就冇限到出場時間嘅,大家唔洗怕趕時間睇唔切~
 
跟住揀人數、入名同個人資料就搞店!
 
買完之後就會出咗依張飛,拎住佢去收銀到比錢~然後就會出咗依張入館引換劵~入場個日記住要帶啊~~~~
 
 
點呀,係咪其實都唔係好複雜呢?信我啦!真係好值得去~~~~~
下次再同大家介紹其他好玩嘅博物館~(估吓我會帶你地去邊哈哈~~~)