【自駕遊秘笈】你準備好喺落雪,結冰及溶雪下揸車未?

近幾年都有香港人喺日本自駕遊出現死傷意外,特別係喺冬天嘅北海道。
車長希望各位準備冬天自家遊嘅大家睇完呢篇文章會更加了解冬天開車要注意嘅地方,盡量減少意外發生啦!
 
大部分香港人都無喺落雪、路面結冰及溶雪情況下揸過車,
所以車長並唔建議任何香港人第一次冬天去北海道及東北就長時間自駕遊。
最好就第一次先試租1日去訓練每一程車唔好多過一小時,如果覺得自己係唔適合落雪,結冰及溶雪下揸車的話就要放棄!
無問題的話先至租第2日,直到自己熟習架車點樣喺落雪、結冰及溶雪下操作先開始長時間自駕遊!
唔好勉強自己,命仔緊要!
 
先講裝備,其實有分租車公司提供嘅裝備,同你自己應該要有嘅裝備。日本租車公司通常好多選擇,一定要租車公司提供嘅裝備有:
4WD(四輪驅動)嘅車、雪呔、雪鍊同小型雪刮鏟
 
呢幾樣都可能要收費,但係無咗4WD(四輪驅動)嘅車、雪呔同雪鍊而落雪時行車等同自殺行為!記住命仔緊要!
 
翻譯返日文畀大家
4WD四驅:四輪駆動 よんりんくどう yonrinkudou
雪呔:スタッドレスタイヤ すたっどれすたいや sutaddoresutaiya或者スノータイヤ すのーたいや suno-taiya
雪鍊:タイヤチェーン たいやちぇーん taiyachin
 
總言之萬一租車公司無提供4WD、雪呔同雪鍊的話絶對唔好妥協
租車公司無提供的話寧願搵第二間租車公司!
 
而自己應該要有嘅裝備有:
防滑厚手套:滑り止め手袋(最好有埋防水,約1000円)
除冰噴霧:解氷スプレート(約600円)
小型雪鏟套裝:スノーブラシ ショベルセット(個人會買多用途個種套裝包雪鏟同雪刷,仲有手柄,約2000円)
LED燈:LED灯(約1000円,買可以戴喺頭上面嘅,千祈唔好用手機當照明,手機係用黎求救用!)
暖包:使い捨てカイロ(約300円有10個,車長發現日本暖包係最好用嘅功具,有保暖,除冰雪同防結冰之用途,所以會買多少少,車長就平均1日用5個)
 
所以車長習慣就係拎車之前買定甚至帶定去,或者拎車之後立即去買。
(仲有車長架私家車入面仲有過江龍(駁電用)、2條特別大毛巾(落坑用救車用)、5L油(後備)、2L沙(打滑時加強摩擦力)、磚頭或大又扁石頭一舊(上雪鍊用小工具或泊斜路用)、緊急維修工具同泊車用三角車止二個,只不過去得遠租車時就無必要買)
 
再講講喺落雪、結冰及溶雪下駕駛時要留意嘅事項,主要有十樣:
 
第一:
落雪過灣時唔好刹車,只能鬆油門。要刹車只可以入灣前刹車!由於過灣時内外車輪速度有少許不同,但刹車力度左右就一様,所以落雪過灣刹車個吓就非常容易打滑!
 
第二:
保持比正常3-4倍車間距離,普通道路的話保持3倍距離,高速道路的話保持4倍距離以上!因為前面有事起上黎你仲可以多幾秒時間去作出反應,例如第1個方法會打滑就用第2個方法(例如扭呔去避開前車)!
 
第三:
輕油門,輕刹車同盡量用低波!大力油門容易打滑,大力刹車易鎖死車輪(落雪ABS好易失效)就會打滑,所以最好盡量用低波行車增加牽引力。
 
第四:
車速保持比正常時速低20%,日本普通道路車速上限係50KM/H,自己行車就唔好高過40KM/H。高速道路車速上限係100KM/H,就唔好高過80KM/H。(不過大雪時高速道路車速上限係降至約60KM/H,個陣就唔好高過48KM/H),而上咗雪鍊嘅車係唔可以行高過50KM/H。上高速道路要除返呀!(否則條雪鍊會斷)
 
第五:
萬一要過火車平交道,速度仲要低啲,平交道前停一停嘅時間要等多幾秒確認平交道對面無車或者夠位令你架車離開火車軌範圍先起步,起步個吓打滑就唔好格硬黎!直接停低再起步。而車頭正式入咗火車軌範圍果一刻起,絶不能停車!只能向前行,直至車尾離開火車軌範圍。就算前面有車阻住都不能停車,要搵方法離開火車軌範圍。
 
第六:
留意日出日落時間,日出日落前後約60分鐘係最危險嘅時間,路面上最容易結冰,仲有日出日落時嘅陽光反射喺雪上面係非常刺眼。(仲有橋上面同隧道出口附近都好容易結冰,最好保持低速行駛)
 
第七:
停埋一邊時,留意積雪/雪堆入面有無排水渠同防撞欄!積雪時最易遮住睇唔到!
 
第八:
自己行錯路而同個GPS有相差時,盡量慢駛後盡快停埋一邊(唔好急停,後面會停唔切就撞埋黎!),盡快搵方法回頭U Turn盡量唔好等GPS向反方向修正,因為GPS俾你第一條路永遠係最易,同埋唔會教你回頭U Turn。修正咗嘅GPS路線成日會老點你行啲小路,夏天就好啲,最多可能畀條窄路你,勉強地都過得到,冬天畀條幾呎深嘅雪路你就真係企喺度被困!所以車長個人會開多個電話GPS+Google Map,甚至前一日睇一睇Google Map有無封路同睇下啲路口位置,至少有個印象先!
 
第九:
要留意現在時間係咪慢過自己Plan定嘅時間,係的話就要減少之後去嘅行程,千祈唔好追時間,人一心急就易出意外
 
第十:
如果要到機場還車,可以的話請盡早出發,因為又要入油,又要還車,免得還咗車又趕不到飛機,冬天落雪嘅日子還車用嘅時間會多少少。如果坐早機的話,最好安排早一日還車,再住機場附近嘅酒店。
 
下面段片係教點様上雪鍊同除雪鍊
 
泊車要留意嘅事項
第一:
優先泊係非露天車位
 
第二:
選擇車位唔好係近路口同灣位,因為其他車都好可能過灣打滑,無啦啦畀人撞就無謂啦。
 
第三:
車頭一定要對住行車路,冬天時電池好易失效,人地要過電畀你都易啲。
 
第四:
留意雪入面有無排水渠,防撞欄同障礙​物!積雪時最易遮住睇唔到!
 
第五:
要將水撥打直豎起,否則水撥會積雪結冰!
 
第六:
喺斜路/斜位泊車必須要有車止!車長見過有車係溶雪後再結冰之下,車轆下嘅冰唧起咗條車呔,架車就咁跣咗落斜路底。
 
第七:
車長個人會放二個暖包係車内一晩,最好放係駕駛位窗邊對落個扶手同錶板個遮光上面(不過如果要泊10個鐘以上就唔好咁做!因為暖包失效之後車外會結冰)
另外車長仲會打開車頭蓋,係電池附近放多一個暖包(千祈唔好放係電池表面,而有引擎保護蓋就放係保護蓋右邊,有70%車用電池都會放係右邊),因為係極度寒冷之下,電池會失效,咁就著唔到車。不過記得著咗車後要拎返出黎!
 
第八:
平時泊車的話,大家一定會拉手掣(Hand Brake/Parking brake)但係太凍的話,手掣係有機會凍結失靈,到時放唔到手掣就邊度都去唔到。所以泊車個陣揸自動波的話入P波,棍波的話入R波就可以。(喺斜路/斜位泊車必須要有車止
 
第九:
車上積雪一定要清理好,先至好開車!萬一行車時因為你架車無清雪而跌咗雪或冰落黎傷咗人或物,要負上刑事同民事責任!
 
第十:
著咗車後一定要試刹車,車長會喺停車場以5KM/H左右行2個圏試刹車,喺寒冷天氣之下個刹車好易凍結失靈。出到大馬路先發現就大件事!
 
 
車長個人會買多少少暖包原因係,暖包用黎溶冰雪係好用過除冰噴霧同小型雪鏟。特別係水撥同刹車凍結,直接貼喺凍結咗嘅設備上4-5分鐘就可以!仲有上雪鍊同除雪鍊時用黎貼係手套上暖手及除雪鍊上嘅冰。
 
車長成日同車長夫人講,車除咗係運輸工具外,對於愛揸車人士嚟講亦係一種樂趣,但唔小心的話,車就會成為兇器!
因為車長亦有朋友因交通意外走咗。所以一講到揸車,就會捉得好嚴,對於揸車,一定要安全第一!雖然車長份人平時求求其其!
 
呢篇文章會長咗少少,但係都係車長咁多年得黎嘅經驗!
希望大家喺冬天自駕遊玩得開心之餘,最緊要平平安安返黎!