膽量挑機7之池袋猛鬼酒店

又到左星期六晚既膽量挑機時間~
 
前幾晚同架仔朋友Y君傾計,當佢知道我住池袋時,就同我講左個關於池袋既鬼故……
Y君話幾乎所有日本人都知果到好猛鬼,而佢自己都唔敢夜晚經過。
我問點解,Y君話因為好易撞鬼,有唔少朋友夜晚經過果到,之後見到鬼。
唔知點解聽完,我係勁興奮,仲問Y君一唔一齊去,哈哈
Y君係咁講「無理!無理!」,仲話打死都唔去喎XDDD
 
究竟係邊到呢?就係池袋太陽城王子酒店!
 
 
唔知有無朋友住過呢間酒店呢?定係你而家住緊?哈哈哈
 
Y君話無日本人會住呢間酒店,因為出哂名猛鬼,只有唔知既外國人先入去住。
我問點解咁猛鬼,之前發生過咩事?係咪殺人事件?
Y君話係好耐之前,池袋太陽城王子酒店既位置係二次大戰時期,甲級戰犯既「巢鴨刑務所」!
 
 
日文得半桶水既我唔太明Y君up咩,之後Y君做左個割頸既動作,嚇到我即刻摸實自己條頸=0=
 
係東池袋中央公園,就有個紀念石碑,希望死去既人得到安息~
 
 
其實同香港果d「喃嘸阿彌陀佛」石碑差唔多作用吧!?
 
因為含冤而死既人太多,所以死後不能安息,就變成冤鬼……
所以酒店既外觀都好似個墓碑咁,聽講係希望可以鎮壓d鬼……
 
 
嘛…d鬼邊有咁易呃丫…太天真太傻了吧!?= ="
 
傳聞,住係14樓以下既話,撞鬼既機會係大好多。
話住14樓以上,高d係安全d,但係點解呢?
我都唔知呀,我估可能係d鬼懶得上咁高去嚇人掛!?
 
不過,就連係果到打工既人都撞過鬼~
話有晚係到執緊鋪時,聽到走廊有d腳步聲。
但因為當時同緊同事傾緊計,所以就唔為意,只係覺得有d凍凍地。
突然聽到背後傳黎步操既聲音。
而且,愈來愈近~愈黎愈近~~
當佢擰轉身望時,望都見唔到……
不過因為知道呢到猛鬼,所以都急急腳收鋪閃人。
 
唔…唔知點解真係想去果到附近行下,睇下係咪真係會撞鬼~
去唔去好呢?心大心細緊~~
 
=====我是低B分隔線=====
 
已經出左下集!膽量挑機8之我已到池袋猛鬼酒店!