膽量挑機33之日本校園怪談(上)

又到咗星期六嘅膽量挑機時間。
話咁快暑假就結束要開學喇~
今晚就同大家講下……
 
日本校園怪談
 
怪談一︰13級樓梯
傳說喺一間好舊好舊嘅高中教學大樓,
曾經有個男同學同老師發生口角,一心想報復,夜晚就靜雞雞返學校,諗住放火燒咗成間學校。
喺放心期間,被巡樓嘅老師發現,男同學見事敗,立即逃跑。
點知,跑樓梯時企唔穩,從高處墜下,頭骨爆裂,當場死亡。
 
 
自從之後,就傳出樓梯於日間係12級,但於夜晚數時係13級。
當然,有同學唔信邪,夜晚走返學校,行樓梯時數下有幾多級樓梯。
有個男同學數到第12級樓梯時,發現第13級樓梯出現!
 
 
男同學膽粗粗企上第13級樓梯,之後就見到有個黑洞出現眼前。
黑洞入面有好多人,一步一步咁行近佢。
正當佢想擰轉身逃走時,發現一個無咗半邊頭嘅男學生叫佢一齊入黑洞入面玩。
仲話黑洞係壞學生嘅天堂……
男同學就好似被迷惑咗咁走入黑洞,無咗出返嚟……
傳說,只有壞學生喺夜晚數樓梯時先會見到第13級樓梯。
 
怪談二︰裂口女
1979年,「裂口女傳說」於日本各校瘋傳,一度引起大眾不安,更有學校曾經就事件一度被迫停課。
傳說,裂口女本身係一位大美女。
可惜,喺整容時,因為醫生噴喺頭嘅定型噴霧太臭,裂口女周身郁。
結果,醫生就唔小心剪到佢兩邊嘴角。
被毀容嘅裂口女一怒之下將醫生殺死。
但因為佢個嘴裂得太大、太恐怖,被路上嘅民眾當成妖怪而遭射殺身亡。
 
 
傳說,於傍晚時間,長髮及腰,身穿白色大褸、紅色裙同用口罩遮住口鼻,手拎大鉸剪嘅裂口女會喺學校門口出現。
然後就問學生︰「我靚唔靚呀?」
學生答「靚」嘅話,裂口女就會除低口罩再問「咁樣仲靚唔靚呀?」
 
 
如果學生答「唔靚」嘅話,就會被裂口女將學生帶走,之後殺害或食落肚。
 
 
如果學生唔答而逃走嘅話,裂口女會追殺佢。
聽講,裂口女好驚定型噴霧,所以學生拎定型噴霧出嚟狂噴裂口女,就可以擊退佢。
 
怪談三︰預知未來嘅魔鏡
喺0時0分0秒嘅時候,某間學校有一塊三面鏡,只要你企喺鏡中間,就能夠睇到未來嘅自己。
 
 
曾經有個女仔真係試咗0時0分0秒照鏡,見到未來嘅自己個樣係點。
第二日起身刷牙洗面時,發現鏡入面嘅自己係嗰個未來嘅自己嚟,嚇到佢跌坐落地下。
當佢企返起身,再照鏡時,鏡入面嘅自己就變返正常嘅自己。
當時,以為係自己眼花睇錯。
有一日下午去廁所,佢再自己,今次鏡入面嘅自己老咗三十年!!!
之後,每一次佢照鏡,都發現鏡入面嘅自己又老咗。
同時間,佢都發現自己身體好似衰老緊。
有一日,佢死咗,死亡原因係身體機能衰老。
 
 
另外,傳說喺黑色星期五(13日嘅星期五)0時0分0秒,會見到惡魔喺鏡入面。
深夜2點照鏡,就會見到自己死時個樣。
3時33分33秒,企喺鏡前,可以見到自己嘅結婚對象。(我好想試!!!)
4時44分44秒,企喺鏡前,就可以進入異世界……
 
我表示,我超想試照鏡嗰個方法!!!我好想睇下自己嘅結婚對象係邊個!!!
其實仲有幾個校園怪談!下集膽量挑機再同大家講埋落去!