膽量挑機32之廁所裡的花子

又到咗星期六嘅膽量挑機時間。
前幾日寫咗篇關於日本十大恐怖電影,唔知你最鍾意邊部電影呢?
當中嘅《鬼娃娃花子》,你又知唔知真實版本係點呢?
今集膽量挑機就要同大家講……
 
廁所裡的花子
 
花子本身嘅外表打扮就同小丸子好似,年約5歲嘅小朋友。
一個好似小丸子咁可愛嘅細路女點解會變成怨靈呢?
 
 
究竟花子係點死???
網上有幾個版本,一一講出嚟,等大家諗下邊個可能性最大。
 
1‧花子去廁所時,突然心臟病發,失救而死。
 
2‧花子去廁所時,學校發生火災,花子被困走唔到而活生生被燒死。
 
3‧喺福島縣嘅小學圖書館,花子企喺窗邊,失足從高處墜下而死。
 
4‧花子長期被爸爸虐待,最後被虐打而死。
 
5‧花子被追殺,逃跑到學校三樓廁所第三格,但被追殺者發現而遭殺害。
 
6‧花子發現班主任在校內飲酒,班主任被校方革職後,於廁所內捉走花子,強灌花子服食大量安眠藥。花子被帶到草叢被強暴致死,再被棄屍於廁所內。
 
我就覺得最尾嗰個版本最似真,但咁多年嚟,都無人能夠證實真偽。
而喺日本唔同縣嘅學校都傳出喺廁所遇見花子嘅恐怖事件。
 
 
【東京都】喺女廁嗌「花子」三次,就會聽到把聲回應你「做咩呀?」。如果過咗下午4點,當你講「花子,對唔住呀!」,就會聽到「唔緊要。」
 
【神奈川縣】喺女廁嗌「花子」或者喺男廁嗌「洋介」,三秒內唔逃跑嘅話,就會被殺死。
 
【埼玉県】喺女廁第四格,敲門十五次之後,講句「花子,我地一齊玩吖!」,就會聽到「好呀。」
 
【大阪府】當喺女廁嗌完「花子」,再敲門,就會聽到把好淒冤嘅聲「好危險㗎!唔好呀!」
 
【山形縣】當去完廁所出嚟照鏡洗手,嗌「花子」,而聽到有回應時,如果發出類似好驚好厭惡嘅聲音嘅話,就會發生不吉嘅事情。
 
【岩手縣】喺第三格廁所入面嗌「第三嘅花子」,就會有隻非常蒼白嘅手從屎坑伸出嚟抓你。
 
【岐阜縣】喺女廁嗌咗「花子」三次,就會聽到「係。」
 
 
周圍都話見到花子,唔通花子識分身術!?
明明只係聽到聲,又無睇到嗰樣,未必係花子吧?
我就覺得可能係地縛靈就真!
地縛靈即係人或動物死後其亡魂被束縛於某個地域範圍內活動,由於心願未了,積慮怨氣,留在人間。當了咗心願之後,就可以升天,唔再受束縛咁離開。