膽量挑機31之淺草寺恐怖傳說

又到咗星期六晚嘅膽量挑機時間喇!
相信好多人去東京旅行,都會去淺草!
去得淺草,就一定會去淺草寺!
 
 
好多人都知淺草寺係拜觀音嘅。
但係,淺草寺嘅恐怖都市傳說,你又知唔知呢?
 
求籤求到「凶」時,你會點做?
 
 
話說,大約喺十年前,有人同朋友一齊去咗淺草寺到求籤。
自己就求到「大吉」,當然開心啦。
不過,朋友就求到「凶」,咁就唔信邪咁求多次,點知都係「凶」。
朋友又再求,都係「凶」,死都唔信咁邪再求,但都係「凶」。
連續四次求籤都求到「凶」,朋友好無奈咁嗌走人。
正當佢地落樓梯時,朋友突然失足碌落樓梯,個頭撞咗落梯級邊位,搞到係咁流血。
由於朋友流血過多,就打電話叫救護車。
喺等待期間,途人都被當時情景嚇親,紛紛走上前問有冇事。
結果,朋友個頭縫咗十幾針。
 
其實求籤係求神明俾指示自己,而唔係為求「大吉」而求。
同一個問題求籤咁多次,根本就係唔相信神明。
正所謂「佛都有火」,唔相信神明,唔尊重神明,神明點會唔嬲?
所以,記得下次求籤求到「凶」時,唔好再求籤喇!
應該好好咁睇清楚籤文所寫嘅注意事項,因為全部都係神明俾你嘅指示嚟。
 
行過見到慰靈碑,你會點做?
 
上年,有一對姐妹因為學校旅行而去咗淺草寺觀光。
而一向靈力極高嘅妹妹喺淺草寺行行下時,就話要過去紀念「東京大空襲」死難者嘅慰靈碑度參拜。
當時,姐姐就諗,可能因為前幾日睇電視講「東京大空襲」,所以妹妹就想去嗰度。
 
 
(註︰「東京大空襲」即係第二次世界大戰時,美國對日本首都東京進行嘅一系列大規模戰略轟炸。是次造成逾10萬人死亡,其中絕大多數為平民。)
 
兩姐妹一同走到慰靈碑前參拜,姐姐就轉身離開,但係眼見妹妹一直企喺嗰度,未有意欲離開咁。
姐姐就嗌妹妹,點知妹妹口震震咁講「我個背脊好重呀……行唔郁呀……」
見好似有啲唔對路,姐姐行返上前,見到有啲類似線香嘅粉末,而且係好多隻小朋友嘅掌印咁印咗喺妹妹個背脊度。
於是姐姐即刻拍走嗰啲粉末,問妹妹有無好啲。
妹妹變得好虛弱咁話要食小丸子紅豆湯,姐姐就扶住妹妹離開,去搵小丸子紅豆湯。
後嚟,姐姐諗返起,每次妹妹遇上靈異事時,都話要食小丸子紅豆湯。
當妹妹食完之後,都會即刻變返好精神,無晒事咁。
 
 
有人就話因為啲鬼仔鍾意食甜嘢,所以食咗小丸子紅豆湯就會無事。
亦都有人話豆可以驅鬼,所以食咗之後,就可以去除體內嘅邪氣。
我就覺得慰靈碑都係避之則吉好啲,唔好刻意上前參拜。
 
 
睇完今集膽量挑機之後,唔知有冇嚇親你,令你有啲唔想去淺草寺呢?
無論去邊間神社或寺廟,求唔求籤,求到「吉」定「凶」,都係神明俾你嘅指示。
我次次有疑問,唔知點做好時,都會去神社求籤。
而每一次,我都會按神明嘅意思去做事,的確係會有驚喜事發生,又或者令原本情況唔樂觀嘅事有轉機。
記住,心誠則靈。