膽量挑機30之日本銀仙

又到咗星期六晚嘅膽量挑機時間。
踏入農曆七月,即係鬼節,電視成日播鬼片。
最近睇咗套電影講碟仙,咁我就上網同睇書,發現原來日本都有類似嘅嘢!
 
こっくりさん​(銀仙)
 
 
係日本學生好流行玩嘅嘢,其實真係同碟仙差唔多。
不過請嘅並唔係「鬼」,而係請「稻荷神」,亦即係我地所稱嘅「狐仙」。
 
準備︰
1‧ A4白紙一張
2‧ 筆一支
3‧ 10円硬幣一個
4‧ 一張大枱
 
方法︰
1‧ 係A4紙頂部左右分別寫上代表Yes嘅「はい」同代表No嘅「いいえ」,而係中間就畫個鳥居以便召喚こっくりさん。
2‧ 寫上日文五十音同0-9數字。
 
畫完之後大約個樣應該係咁……
 
3‧ 將10円硬幣放落鳥居位置,所有人伸出食指按實個10円。
4‧ 開始召喚,不停念出呢句「こっくりさん、こっくりさん、どうぞおいでください。もしおいでになられましたら、『はい』へお進みください」(讀音︰Kokkuri san、Kokkuri san、Douzo oide kudasai。Moshi oideni narare masitara、「Hai」e osusumi kudasai)意思係「狐仙、狐仙、請來吧。如果來了的話,請進入「Yes」。」
5‧ 要不停念果句說話,直至個10円真係行入「はい」嘅位置,先可以開始問問題。有機會周圍行吓先都未定!但記得唔好甩咗!隻食指一定要痴實個10円。
 
 
6‧ 無問題問,想結束對話時,就要講「鳥居の位置までお戻りください。」(讀音︰Torii no ichi made omodori kudasai)意思係「請返回鳥居嘅位置。」
7‧ 當10円行返入鳥居位置時,大家要向狐仙道謝,講句「ありがとうございました」(讀音︰Arigatou gozaimashita)意思就係「多謝」,然後大家先可以縮返隻手指。
 
注意︰
 
當個10円離開鳥居後,唔好擅自縮手,否則,會激嬲狐仙。
 
 
唔好質疑狐仙嘅存在,同樣都會得罪狐仙。
一定一定要好有禮貌咁向狐仙問問題,因為傳聞狐仙都係好小氣㗎。
狐仙係比較調皮,所以有機會唔肯返入鳥居,要請求好幾次先會肯乖乖離開。
 
有機會未必係請到狐仙,而係普通狐狸嘅鬼魂,亦都可能係附近嘅遊魂野鬼假扮狐仙。
而且,有機會被上身……
所以,玩銀仙之前,諗清楚先。
 
傳聞……
 
喺好耐以前,曾經有3男1女放工後喺公司到玩銀仙,但係4人都唔太相信,玩完之後就咁將工具放埋一邊就返屋企。
第二日返工,其中一個男人無返工,咁上司就覺得有d奇怪,於是決定放工就去個男人嘅屋企睇吓發生咩事。
點知,去到門口,發現無鎖門,當上司入屋時,就見到個男人訓咗係地下,而且已經死咗,無咗心跳呼吸。
上司好驚咁望屋內環境,並無打鬥痕跡,但係就有好多狐狸毛係地下……
 
有網友話記得曾經係朝早新聞睇到有關玩銀仙嘅報導。
話4名男女中學生喺班房玩銀仙,全員死亡,死因不明。
而當時新聞亦都再三提醒大家唔好玩銀仙,係好危險嘅事。
不過呢位網友之後同大家講起,大家都話唔記得有呢單新聞。
究竟係真定假呢?係呢位網友製造恐慌講大話?定係真有其事,只係日本封鎖消息呢?
 
有網友就喺小學個時,喺午飯時間就同幾個男同學一齊玩銀仙。
當佢地請銀仙離開時,個10円都係停留係「いいえ」,試咗好多次都係咁。
直到午飯時間結束,要上堂喇,大家都縮開咗手。
就係呢一刻,傳嚟巨響!班房附近嘅水管突然爆裂。
網友到而家都好記得當時情境,感覺大家都激嬲咗銀仙。
不過,好好彩,佢地無任何死傷。
 
雖然印象中嘅狐仙係咁靚仔!!!但係,要知道往往現實嘅係有出入……
所以,唔好諗住玩銀仙一定可以召喚到靚仔狐仙出嚟!!!
 
「召喚靚仔狐仙出嚟,之後一齊生活」呢個情節只有係動畫先會有!只會喺二次元發生!
雖然我都好想,但真係大家FF好喇!
大家真係唔好一時貪得意去試!始終,真係玩命!!!
 
我都係建議大家乖乖地去稻荷神社,拜吓稻荷神,許吓願。
我就唔會玩銀仙喇!就算俾我召喚到狐仙,都唔係咁好,堂堂一個神樣俾我好似審犯咁問問問。
如果撞岩日子,係可以供奉稻荷神,上前獻上真榊(まさかき),即係平時見到喺神棚上嘅葉子,以示尊敬及謝意。
我試過一次,感覺同稻荷神好有緣>w<
你地有無試過供奉稻荷神呀???