膽量挑機29之成田機場怪談

又到咗星期六晚嘅膽量挑機時間!
可能之前講猛鬼嘅地方,大家都未必會去!
今次呢,就同大家講一個去東京嘅話,有一半機會都會去嘅地方!
 
成田機場
 
唔知大家有無試過太夜到成田機場,無車出去市區,又或者太早要到機場,所以就係機場附近嘅酒店住一晚呢?
以後落嚟,就要同大家講一個關於成田機場附近一間酒店嘅靈異事件。
 
=====
 
有一個日本絲打喺十幾年前,參加咗個海外遊學團。
由於佢同同團嘅學生住嘅地方距離成田機場太遠,於是要前一晚喺成田機場附近嘅酒店住一晚。
呢一間酒店,非常非常之殘舊,但無辦法,一定要住喺度,只好將就吓。
 
 
個一晚,佢地食完飯,就去咗其中一個團員嘅房到玩,佢嘅同房因為太眼訓,就一早返咗房訓。
玩吓玩吓就已經半夜三點,咁佢都返房訓。
 
一訓落床就已經訓著咗,但係無幾耐,廁所傳嚟沖涼聲。
佢就好努力對抗睡魔,睜開眼望,見到同房訓係隔離床,間房得佢兩個訓,咁究竟係邊個喺廁所沖緊涼呢?
其他團員又無呢間房嘅鎖匙,無可能入到嚟㗎喎。
愈諗就愈覺得唔對路,雖然佢好好奇,好想起身入廁所睇吓係邊個,但係佢實在太攰,唔想理咁多就繼續訓。
 
 
到咗第二日,成班團員一齊講返琴晚嘅事,原來其他團圓都俾鬼壓,起唔到身……
呢次之後,佢都唔敢再入住成田機場附近嘅酒店……
 
=====
 
有無試過喺成田機場無車出市區,要搭的士呢?
如果有,就要聽吓以後呢一個故事……
 
=====
 
有一個大肚婆由成田機場搭的士出市區返屋企,但由於司機嘅疏忽造成交通意外,害大肚婆流產。
司機個腦海一直重復住大肚婆嘅淒厲喊聲「俾返個BB我呀……」
 
 
後嚟,司機入咗精神病院接受治療,可惜,無幾耐就自殺死咗。
過咗一排,大肚婆忘記咗司機嘅事,又有咗BB,仲好順利咁生咗BB出嚟!
 
大肚婆好開心咁抱住BB,就係呢個時候聽到把聲「你睇…我俾返個BB你喇……」
呢把聲係司機把聲!大肚婆諗返起個次交通意外……
 
=====
 
有好多時,拎住好重嘅行李時,都唔會想搭扶手電梯,直接搭lift。
但你有無諗過如果搭搭吓lift,去咗第二個空間點算好?
 
=====
 
曾經有位空姐夜晚搭lift時,落咗去B2個層,但係一打開門,出面四周漆黑一片,而且四面得牆,一度門都無。
一陣寒意傳到空姐,覺得唔係幾對路,正當空姐係咁禁制關門時…
「救我呀…救我呀…救我呀……」一把好幽怨嘅聲音喺佢耳邊響起……
但明明架lift只得佢一人……
 
 
=====
 
唔知大家聽完呢幾個故事,會唔會去成田機場時就諗返起呢?
下星期六繼續有膽量挑機!