膽量挑機28之猛鬼夏祭

又到咗星期六晚嘅膽量挑機時間!
夏天已經到咗,日本各地都開始舉行夏祭!
講起夏祭,大家都會聯想到著住浴衣去玩撈金魚勾水球等等!
 
 
但係,大家又有無諗過去夏祭都好易撞鬼?
正所謂「愈安全嘅地方就愈危險」!
 
 
唔好諗住夏祭咁多人,就咩都大丈夫!
分分鐘撞鬼去咗異世界,你都唔知呀!
 
 
 
蕩失路
 
 
有位住福岡嘅日本巴打仲讀緊大學時,因為無朋友得閒陪佢,唯有一條友去夏祭玩啦。
一個人去夏祭可以玩得d咩吖?所以,玩咗無耐就決定返歸。
當佢打算返屋企時,就見到有個細路仔好似蕩失路。
於是就問「你爸爸媽媽喺邊呀?」
個細路無出聲,一直低頭。
巴打就再問「係咪爸爸媽媽叫你自己一個人嚟玩呀?」
眼見細路仔好可憐咁,巴打就將頭先贏返嚟嘅小禮物同零食送俾個細路。
之後,巴打就決定送個細路返屋企。
點知,行吓行吓,去咗墳場!!!
 
 
個細路終於開聲「哥哥,多謝你呀。」
然後就跑咗入墳場入面消失咗……
 
 
 
 
誤闖異世界
 
 
有三位日本巴打齊齊去咗個好大嘅公園到睇煙花,一邊食嘢一邊吹水。
煙花放完,其中一個巴打嘅哥哥揸車嚟接佢地。
原本諗住返屋企,但睇完煙花覺得唔係幾夠喉,於是就決定去附近嘅猛鬼橋靈探。
 
 
四個男仔超興奮咁喺車上開到音樂好大聲,勁high咁唱歌。
點知…負責揸車嘅哥哥就發現有d唔對路「咦?呢度喺邊度嚟㗎?轉左?」
三位巴打可能太high,無理到哥哥,繼續唱歌。
隔咗一陣,哥哥又話「唔係喎,呢度究竟喺邊度?無路牌嘅?」
三位巴打見到哥哥面有難色,再望望車外周圍,除咗街燈之外,咩都睇唔到。
 
 
 
哥哥提議「我真係唔知呢度喺咩地方,不如我揸車U Trun出返去好無?」
由於三位巴打都係路痴,就梗係聽哥哥講啦。
但係,當架車U Trun返出去時,明明行嘅時間多過頭先,但係風景就無變過。
大家你眼望我眼,一粒聲都唔敢出。
突然,架車死咗火,行唔郁!
 
 
之後就開始聽到d古怪聲,明明周圍都無人,但就聽到好似有一大班人喺度講嘢嘅聲。
呢個時候,佢地好似俾鬼壓咁,個身完全郁唔到。
哥哥就大聲叫,終於郁得返,咁就試吓撻車匙!
但係,架車都係唔郁!
 
 
佢地四個就齊齊大嗌「同我離開架車呀!」
之後,哥哥再撻車匙,架車終於著返!
唔理三七廿一,開行架車,飛車咁逃離!
點知,突然喺T字路位撞到電柱,佢地就暈咗。
佢地諗返轉頭,明明揸車出發去個時,都無經過T字路位。
所以,佢地都諗係咪去咗異世界……
 
 
 
 
睇完呢兩個靈異事件之後,唔知大家仲夠唔夠膽去夏祭呢?
我呢?就一定會去!
嘛…無論信唔信有鬼都好,各位巴打絲打去到日本參加夏祭時,玩還玩,唔好周圍去!
始終人生路不熟!安全至上!
Tags: