膽量挑機27之日本跳樓聖地

又到咗星期六晚嘅膽量挑機時間!
 
上星期就講咗個都市傳說關於電話亭,今次,就要講日本嘅自殺聖地!
如果有睇開膽量挑機嘅話,應該記得我之前介紹過日本自殺森林!http://www.likejapan.com/guts5
自殺森林就係吊頸自殺,而今集就同大家講跳樓聖地--高島平団地!
 
 
喺東京都板橋區嘅高島平駅同新高島平駅之間有住咗大約二萬人嘅地方--高島平団地!
70年代(昭和40年時期)開始有人入住,曾經一度人口密度好高。
 
 
隨著時代變遷,日本人口老化問題嚴重,已經有至少兩間學校荒廢。
不過,令居民搬走嘅最大原因係……
至今,已經有超過100人跳樓自殺身亡!
而且,經常傳出鬧鬼事件!!!
 
 
自殺聖地
喺1977年4月,有三父子一同跳樓自殺死,高島平団地就有「自殺聖地」嘅別稱。
直至1980年,已經有超過133人跳樓自殺死……
1980年1月至7月14日期間,已經有19人跳樓……
同年7月24日,日本新聞亦有報導此事。
 
 
日本政府當局就有關跳樓自殺問題嚴重而作出相對操施,封鎖頂樓,一般人不得進入。
另外,亦於3樓以上樓梯位置安裝窗花以防有人係其他樓層跳樓自殺。
 
 
 
雖然,跳樓人數的確減少,但係自殺問題仍然在存。
因為,亦有不少人選擇於梯間或屋內吊頸自殺。
 
不幸的404室
 
 
直至2004年3月26日,一對年老夫婦於屋企吊頸自殺。
年老夫婦死去超過三星期,由於屋內傳出屍臭味,隣居報警求助,警察入屋後先揭發事件。
經調查後,原來呢對年老夫婦過往亦曾多次自殺。
曾到自殺森林--青木ケ原樹海吊頸自殺,亦曾於屋內放煤氣自殺,兩次自殺不遂而被救。
據聞呢對年老夫婦沉迷賭博性質彈珠機,不停借錢,政府當局界入替兩人辦理破產手續。
 
 
期後,呢對年老夫婦因為借唔到錢而決定於浴室內吊頸自殺。
 
搵替身
 
 
一直以嚟,唔少居民夜歸時,都曾經見到有「人」喺天台跳落嚟!
有位日本巴打細個曾經住喺高島平団地,有晚同爸爸同叔叔一齊返屋企時…
叔叔不經意咁望向天台,然後就衝上樓梯。
而爸爸就即刻上前拉住叔叔,問佢做咩事!
叔叔就話見到有個人企喺天台準備跳樓,爸爸同巴打都話見唔到天台有人。
叔叔就堅持話見到有人,爸爸就問叔叔見唔見到果人嘅樣係點。
叔叔諗咗一陣,頭先企喺天台個人係無樣㗎!!!
爸爸就話有類似「搵替身」嘅「朋友」會迷惑路人。
先令路人見到天台有人影,以為有人喺天台要跳樓自殺,
引路人上天台,再迷惑路人跳樓自殺,
所以,爸爸再三警告巴打無必要唔好望上天台,亦唔好上天台。
 
 
聽聞,而家已經好少日本人喺高島平団地住!
有唔少喺中國人同低收入外國人入住。
 
如果,打算喺日本留學或工作,揀地方落腳之前,記得查清楚果度會唔會係「自殺聖地」呀。