膽量挑機25之沖繩的士靈異事件

又到咗星期六晚嘅膽量挑機時間。
 
暑假,除咗去東京玩之外,有唔少人都會去陽光與海灘兼備嘅沖繩!!!
熱天,就梗係會飲返兩杯㗎啦!
但係飲酒咗,要搭的士返酒店時,就要小心喇。
因為,喺沖繩搭的士係好易撞鬼㗎!!!
 
以下落嚟就係安田先生喺沖繩搭的士嘅撞鬼經歷。
 
話說,有日,安田先生返咗婆婆屋企探婆婆,盡吓孝道。
飲多幾杯就醉醉地,當安田先生想返屋企時,婆婆話「我覺得個心唔係幾舒服,你拎d鹽返去。」
安田先生就話「吓!?唔洗啦!」
但婆婆就堅持要安田先生帶住d鹽走,於是安田先生只好聽話。
就係咁,拎住d鹽,搭的士返屋企。
 
 
途中,安田先生醒起自己只得一萬円紙幣,於是就同咗的士司機講。
咁司機就話「咁就麻煩喇,我都無咁多散紙。你等我一陣,我去唱錢。」
講完之後,司機就停車,落車走咗去。
安田先生望望出面,停車位置竟然喺猛鬼餐廳附近。
再望吓四周,無咩民居,亦唔見有便利店。
只有好多樹,而且街燈都無,只係靠的士嘅車頭燈照明。
 
 
呢一刻,安田先生好希望司機快d返嚟。
突然!!!有個人影出現喺車前面,但係睇唔清楚佢個樣,只見到戴紅色呔。
安田先生諗一諗,司機係著白色恤衫,無戴呔㗎!佢唔係司機!!!
呢個人突然衝埋嚟,係咁拍打車門!
安田先生即刻鎖實車門,但係出面果個人仲係不停咁拍門!
安田先生望過去,見到……
原來頭先望到紅色嘅嘢唔係呔嚟㗎!係條脷!!!
 
 
「呀!!!!!」安田先生終於醒咗。
司機拍拍佢問「你有無事呀?」
安田先生望望周圍,見到的士內變到好凌亂,而且婆婆俾佢嘅鹽撒到周圍都係。
 
然後,安田先生將所有事同司機講。
司機即刻面青口唇白,好驚咁話︰「其實,最近有同事喺附近吊頸自殺死咗……」
 
 
鹽究竟有咩用呢?唔知?
肯定未睇我之前篇膽量挑機15之去日本靈探做足準備!
快d去睇吓啦!入面講有咩可以辟邪保平安㗎!
 
下星期六晚同樣時間有膽量挑機同大家一齊月光光心慌慌!
Tags: 

回覆

X chance的圖片

話説一年前有位住沖繩日本朋友收工時撘尾班車,當時人唔多,見到一個女人不停左擺右擺咁對住每個座位停一下,直到見到我朋友時只能扮冷靜咁當見唔到。發生地點係一個叫『宜野灣』既地方,有機會去試下。

X chance的圖片

係由上車位一路行,個頭左攞右擺對住每一個座位停一下,一直行到我朋友見到。

X chance的圖片

咁就不得而知喇……不過宜野灣的確有好多怪事

X chance的圖片

日本太多喇,不過幻覺比較多