膽量挑機24之東京迪士尼恐怖傳說

又到咗星期六晚嘅膽量挑機時間。
今晚繼續同大家講吓日本嘅都市傳說!
 
 
唔知大家鍾唔鍾意米奇老鼠呢?去日本旅行時,又會唔會去埋東京迪士尼玩呢?
你地又知唔知有關東京迪士尼嘅恐怖都市傳說呢?
 
入場人數同離場人數唔一樣
曾經某段時期,東京迪士尼嘅入場人數同離場人數唔一樣。
當時,就有小朋友被綁架嘅傳聞。
聽講,小朋友一個人去廁所時,就會被拐走,做人口或器官販賣。
 
幽靈公館真係有鬼
玩鬼屋,個環境咁暗,根本唔知自己見到嘅係人定鬼。
之不過,當你行到去長走廊個書櫃果度,見到一個表神好哀怨嘅細路仔,就恭喜哂你喇!
因為,果個真係鬼嚟!
亦都有傳聞話,只有係休館嘅時候,先會見到呢個「細路仔」。
 
 
小小世界嘅怕寂寞鬼仔
每當小小世界要維修時,係出口處,人偶細路仔就會對你講「你走喇?」「你留低啦」
唔知係呢隻鬼仔佢怕寂寞定係想勾魂呢?
 
 
驚魂古堡見鬼方法
喺古堡入面,當見到鏡時,就對住自己揮手,自然就會見到鬼!
又或早搭電梯時,唔受規矩企喺左邊,而企喺右邊嘅話,就會有靈異事件發生。
 
員工喺地下秘密通道枉死
傳聞,為咗方便員工出入,迪士尼喺地底興建秘密通道。
但係由於迪士尼太大,令到員工經常蕩失路。
有員工因為搵唔到出口,最後喺地下通道死咗。
 
白花祭亡靈
喺海盜世界曾經發生人命傷亡意外,之後一直發生靈異事件。
有唔少去玩嘅旅客都會見到死咗嘅女鬼,於是,有人提議係出口處擺放白花。
神奇地,由擺放白花開始,就無咗傳出見鬼。
 
 
嚟緊暑假,大家會唔會去日本呀?
如果會嘅,就去吓東京迪士尼,睇吓見唔見到鬼!
定係,大家已經去過東京迪士尼,亦都有經歷同我分享呢?
下星期六晚再見~ Bye Bye你條尾~ Bye Bye~