膽量挑機23之日本恐怖殺人電郵

又到咗星期六晚嘅膽量挑機時間。
 
今晚唔講鬼故,講個日本都市傳說俾大家聽。
 
即使Whatsapp同Line再普及,但仍然會有用email嘅時侯。
垃圾電郵,相信大家都收唔少。
但係,如果你收到以下呢個電郵,你會點做呢?
 
 
「因為一次交通意外,我無咗對腳。
我本身就好少朋友,真係好少。
りんちゃん(Rin-chan)係我嘅好朋友,但佢係我休養期間,
同第二個人做咗好朋友,之後仲同我鍾意嘅男仔拍拖。
我唔會原諒佢!
我唔會原諒佢!
我唔會原諒佢!
我憎死りんちゃん(Rin-chan)!我要殺死佢!!!
不過,無可能……因為我無腳行路……
 
我好想要對腳!
如果喺10個鐘頭內,無轉發俾20個人嘅話,我就斬咗你對腳落嚟!
所以,你明白點做未?
我相信你,你會做我嘅朋友㗎嘛?你會幫我㗎嘛?
 
如果無轉發俾10個人嘅話,搭正夜晚12點,我就會嚟斬你對腳!
當我出現喺你面前時,唔洗驚呀!
我知道你而家驚到眼濕濕想喊㗎!
邊個阻止我,我就殺邊個!!!
殺死你!
殺死你!
殺死你!
 
 
曾經有人回覆我,要阻止我,結果……
石川朋美,38歲,住神奈川県川崎市,屍體被發現時,
無咗對腳,眼珠都無埋,心臟都挖咗出嚟,對手都無咗一半。
 
我係講真㗎,無呃你。
如果你唔信嘅,可以打090xxxxxxx呢個電話問㗎。
你以為呢個係普通垃圾電郵?
如果你唔轉發,就會見到一對好恐怖嘅眼望住你!
 
 
只要你會轉發俾10個人,我就當你係朋友,唔會傷害你!放心啦!」
 
雖然,喺網上,d人話呢件事係假,但當收到呢個電郵時,唔驚就假!
唔知你有無收過類似嘅電郵呢?我就好好彩,未收過。
收到嘅話,你會點做呢?
無視?定轉發?定回覆阻止?
 
下星期六晚繼續有膽量挑機~