膽量挑機21之多摩湖陰魂不散池塘

又到咗星期六晚嘅膽量挑機時間喇~
 
上次我貼咗我一個人去吉祥寺猛鬼公園靈探嘅相,有網友話發現張相有d嘢。
 
 
初時,我以為網友整蠱我,想嚇吓我。
但網友好認真話張相,我個頭同手指之間,見到嘢!!!
咁我就再仔細咁睇張相,當堂嚇咗一跳!等我圈俾大家睇睇!!!
 
 
大家見唔見到呀?係個細路仔嘅樣!
見到係齊蔭嘅細路仔,兩隻眼望住我,面向我嘅方向,之後掹大個口。
我諗起咒怨入面個俊雄!!你睇吓!!
 
 
放咗俊雄張相係隔離,而家係咪好清楚見到個男仔樣呀?
我喺上一篇膽量挑機都講「我一直都不自覺咁望向湖中間,硬係感覺有人望住我咁,想我望過去咁。於是,我就即刻影返張自拍!睇吓影唔影到咩嘢~」
我而家終於明白點解喇!嘛…明明傳聞話呢到係見到無頭嘅女鬼,但點解而家……=.="
 
睇嚟我呢一次嘅一人靈探成功咗!
喇!張相我真係無做過任何改圖執相!美圖秀秀都無呀!張相係100%堅過石堅!
 
呢單嘢,我同咗LikeJapan車神講,之後車神就同我講咗個關於池塘嘅鬼故。
而地點位於東京都東村山市嘅多摩湖町2丁目!
 
 
首先,從地圖上可見,多摩湖真係一個湖嚟,仲好大!
而隔離有個公園叫做都立狹山公園,入面有個池塘,就係有隻鬼公仔果到喇。
 
 
喺大正14年(1925年),有個叫たっちゃん(Tacchan)嘅十歲小學生,係池塘附近玩玩吓,失足跌咗落池塘入面。
當時,有兩個游水好叻嘅少年見到,就落水救人。
 
 
好不幸地,救人不成,三人一齊遇溺死亡。
而且,三人嘅屍體一直沉係水底,無浮返上水面。
傳聞,當地人好努力搵佢地三人嘅遺體,但係都係搵唔到。
 
 
明明係一個好風平浪靜嘅池塘,點解たっちゃん會遇溺,連游水好叻嘅兩個負責救人嘅少年都浸死埋,仲要連屍都搵唔到,成件事太多疑點。
而本身叫做「宅部池」池塘,因為呢件事之後,多咗另一個名「たっちゃん池」,亦都整咗個警告牌避免再發生意外。
 
 
自此之後,每當夜晚經過池塘,路人都會見到一隻白色嘅手伸出湖面。
不過,好多人都認為,呢隻手並唔係たっちゃん隻手,亦都唔係兩個少年嘅手,而係其他存在係池塘嘅鬼魂嘅手。
亦都有唔少人話過,當經過池塘時,都會聽到少年嘅喊聲。
 
有人係廿幾年前去果到靈探,當行到去池塘附近位置時,聽到有把聲係池塘中間傳出,「快d走呀!」
由於一行六人都同時聽到,無可能係聽錯,所以佢地就即刻跑走。
 
 
傳聞,對住個湖中間嗌たっちゃん嘅話,會聽到好大聲嘅牛蛙叫聲。
亦有傳,白色嘅手伸出嘅位置,平時係無魚會游過去。
 
照咁睇,就似係本身個池塘有鬼想搵替身,於是たっちゃん就成為目標,之後落水救人嘅兩個少年都無辜地成亡魂。
喺池塘中間伸隻白色嘅手出嚟嘅並非三人所為,係其他嘅鬼想搵替身。
而三人雖然已經死咗,但係都唔想其他人同佢地一樣,於是就用喊聲嚇人走,又或者直接叫路人快d離開。
 
希望たっちゃん同另外兩個少年都得到安息,亦希望呢個池唔會再有意外發生。