膽量挑機20之吉祥寺冤魂搵替身公園

又到咗星期六晚嘅膽量挑機時間喇!
前幾日因為做嘢關係,去咗吉祥寺。
 
 
講到吉祥寺,不得不提井之頭恩賜公園,有個大大嘅湖俾大家坐船仔玩吓遊船河,又有個動物園可以睇吓動物,仲有個龍貓美術館感受吓藝術氣息。
我真係好鍾意一個人行公園,貪空氣夠清新,又可以靜靜地一個人諗吓嘢。
平時都係日頭去行公園,但由於當日做完嘢已經入黑喇,就諗唔知井之頭公園有無靈異事件發生過呢?
上網一睇,嘩!原來都幾猛㗎喎!
 
喺1994年,清潔工人於公園內發現屍體,但係只得零碎肢體。
警察喺公園內進行搜索,於多處地方搵到其餘嘅肢體部分。
但係直至而家,仍然未搵得返屍體嘅頭部……
之後,公園就經常傳出鬧鬼事件……
 
當時,我心諗,不如一條友仔行入公園靈探啦!
於是,我就即刻GOGOGO!
 
公園嘅入口位,要行樓梯落去,由燈火明亮又人氣旺盛嘅街道瞬間變成昏暗陰森又人煙單薄嘅公園,反差極大。
一落到公園,右手邊就有條小路,但係極之陰森,望落就好似電影入面,行入去就去咗異空間咁。
 
 
無視呢條小路,繼續一路直行,就會見到公園嘅告示牌。
 
 
唔睇唔知,原來井之頭公園已經有99年歷史,下年就係100周年喇!
由於唔知到時嚟唔嚟到,於是,影返張「到此一遊」先,順便證明係我自己一個人親身到公園!!!
 
 
好,咁都睇睇個公園有咩睇先~~
 
 
成隻龍貓係到,唔知點解覺得有d陰森。
三鷹之森美術館,一直都好想去,可惜仲未有機會。
 
之後就一直行,無耐就到咗橋口……
 
 
網上流傳,有一隻著白色長裙嘅無頭女鬼會先喺橋中間出現,向你招手,引你行去橋度。
當你行到橋上時,就見到無頭女鬼喺湖中間出現,再次向你招手,想引你跳入湖入面。
動機好明顯,就係無頭女鬼要搵替身……
 
 
當我行時,都有幾個人來回咁行,仲有一對情侶俟住條橋嘅欄杆,係到談情。
我就諗,如果女鬼突然係湖面伸手捉女仔對腳,想拉個女仔落水時,唔知個男會點呢?係會走人定係救個女仔呢?
下意識咁望落欄杆……
 
 
係小腿以下高度嘅欄杆位置,滿佈蜘蛛網,仲有唔少體型大過手指公嘅蜘蛛係到爬嚟爬去。
可能因為咁,大大增加呢到嘅陰森,明明應該係一個幾浪漫嘅地方。
 
唔知係心理影響定係咩嘢影響我呢!?
我一直都不自覺咁望向湖中間,硬係感覺有人望住我咁,想我望過去咁。
於是,我就即刻影返張自拍!睇吓影唔影到咩嘢~
 
 
就咁睇張相,應該無嘢啩!?
喇!如果你見到有咩嘢,唔洗同我講㗎XDDD
 
另外,傳說講呢個湖受到詛咒……
好多情侶都會嚟呢到坐船仔二人世界……
但原來當情侶踏上船時,就已經得罪咗天神弁財天!
弁財天係好出名嘅女天神,傳說呢個湖係屬於佢嘅,而佢妒忌心好強。
所以,當見到情侶係湖到坐船仔時,就會將情侶拆散!
聽講,有唔少情侶真係坐完船仔之後無耐就分手……
 
 
第日,當我同㗎仔拍拖時,絕對唔會嚟呢到坐船仔!!!
寧得罪小人莫得罪女人!何況唔只係女人!係女天神!!!
我都係影張「到此一遊」算喇~
 
 
呢張相,好清楚見到身後欄杆位置滿佈蜘蛛網,你都咪話唔驚呀!
真係超誇張呀!!!我都唔明點解會有咁多㗎!!!
點解清潔工人唔清理一吓蜘蛛網呢?有無人可以解答到我???
 
 
當我行完條橋,再回頭望返過去……就覺得條橋真係好陰森…
於是,我都係快快閃人好喇…因為真係感覺好唔舒服……
 
總結,今次,鬼就見唔到,但係就感覺好唔自在,而且個公園真係好陰森……
相比起上野公園,我深夜去行時,我係感覺好寧靜好舒服。
但係井之頭公園,我行果時,只係夜晚7點左右,已經覺得好不安…有種危機感……
 
好啦,下星期六晚同樣時間仍然有膽量挑機!下次見!Bye Bye你條尾~