膽量挑機2之日本無人鬼車站

上星期既心靈寫真頂唔頂得順?
今晚就要同大家講一單真人真事,仲上過新聞。
後黎,仲成為網絡上最心寒既都市傳說。

件事發生係2004年1月8日……
當事人「葉純」係日本2ch論壇上既一個post同網友講自己去左一個無人既車站「きさらぎ駅」(如月站)……

以下為留言內容…正常字體為網友留言…藍色粗字體為當事人葉純留言……
(註︰以下所有圖片為示意圖)

「可能係我錯覺…但大家可以聽聽我講野嘛?」

「好!請講!」
「發生咩事呀?」

「我而家坐緊架私鐵,但感覺好似怪怪地……」

「嗯嗯。」

「我坐左20分鐘都未埋站,平時5分鐘左右,最長都係7-8分鐘就埋站架喇。除左我之外,得5個乘客,但佢地都訓緊覺。」

「你係咪其實已經落左車架喇?」
「會唔會係你搞錯左,搭左特急電車呀?」
「坐左快速電車呀嘛?」

「可能好似你地咁講,我可能搭錯車掛,等多陣再睇下點啦。如果再有d咩奇怪事發生既話,我再搵大家商量。」

「去車頭或者車尾既車長室到睇睇啦。」

「感覺好似有排都未停車呀,我去車長室到睇睇先。」
「車長室既窗遮住哂,完全睇唔到入面。我坐既係往靜岡縣既私鐵呀。」

「試下敲窗丫。」

「敲左窗喇,但都係無人應呀。」

「睇唔睇到電車外既環境呀?有無類似經過既車站名?」

「出左隧道後速度開始慢落黎,但平時坐係唔會入隧道架…呢架係從新浜松出發既電車黎架。」
「有車站喇!似乎會停站呀!」

「你唔會諗住落車呀嘛!?」

「而家停左係如月站,從來都未聽過,我落唔落車好?」

「落車睇睇囉。」
「直接坐到終點啦!」
「你係坐幾點既電車架?」

「我落左車喇,係無人既車站。我坐既電車好似係23點40分個班車。」

「如月車站?上網查唔到有呢個車站名喎。下!?你坐左成個鐘頭車?」

「諗住坐回程車,但係車站搵唔到時間表。頭先坐黎果架電車仲係到,我係咪應該上返車?」
「係我打緊字既時候,電車開走左喇。」

「附近有無住宅呀?天氣好凍呀,小心身體呀。」

「我出車站去睇下有無的士坐啦,多謝大家。」

「唯有咁啦,小心d呀。」
「我好懷疑係呢個鐘數既無人車站附近可以咁易搵到的士坐咩?」
「然後,葉純就成為二次元世界既居民喇。」

「唔好提的士喇,呢到附近咩都無呀!點算好呀?」
「我打電話返屋企,但父母都唔知如月站係邊。佢地話搵完地圖再過黎接我,我好驚呀。」

「其他乘客呢?得你落左車咋?」
「我都上網查過,都係搵唔到叫做如月站既車站。你肯定你係新浜松附近?我再搵搵。」

「我搵唔到電話亭,其他乘客都無落車,而家得我一個人。個站名真係叫如月站架。」

「我查到…應該係寫做鬼…讀做如月……」
「鬼車站!好得人驚呀!!!」
「如月站既前一站同後一站係咩名呀?無理由無寫架?」

「無寫呀……」

「沿住鐵路行返去啦!」
「如果而家跑,應該追到頭先架電車!」

「我而家一路沿住鐵路行,一路等父母既電話。我岩岩用GPS查過我既所在地,結果ERROR。我好想快d返屋企呀。」

「唔理真又好,假又好,大家都幫葉純諗下辦法啦!」

「附近真係咩都無,只見到草原同山咋。但係,沿住鐵路應該返到去既,我會努力,多謝大家幫手。」
「就算被人認為係假都唔緊要,再遇到問題既話,可以再搵大家商量嗎?」

「無問題!總之小心d呀!」
「無問題~注意手機電量,係而家唯一既救命工具黎。」
「不如就咁係車站等天光仲好啦。」

「爸爸打電話黎問左d問題,但都係唔知我係邊呀……爸爸叫我報警,雖然個心有d抗拒,但都係要打電話去求救……」

「咁夜一個人等天光?」

「打左110喇…但俾人當惡作劇鬧左一餐……」

「直接等頭班車啦!」
「車站附近係點架?有無d咩呀?」

「係好遠既地方傳黎太鼓咁既聲…我已經唔知點算好喇……」

「總之返去車站先啦!」
「下!?太鼓聲!?」

「我真係驚到唔敢擰轉頭望,雖然好想返去車站,但我真係唔敢擰轉身。」

「跑呀!千其唔好擰轉身呀!」
「千其唔好返車站!會被帶走!總之先跑去隧道!」

「係身後聽到把聲,『喂~係鐵路上面行好危險架~~』,以為係車站職員,一擰轉身望,見到一個單腳既阿伯企係距離大約10呎既地方,之後就消失左。我而家真係驚到唔敢郁……」

「都叫你唔好回頭望架啦!快d跑啦!」
「一定係響鐵路上俾電車車死既單腳阿伯!」

「我已經走唔郁喇…d太鼓聲比頭先愈黎愈近……」

「總之等到天光!天光就唔洗驚!」

「我仲係到,雖然頭先跌倒,個傷口仲流緊血。但我唔想死呀!」

「加油呀!」

「我出左隧道喇!前面好似有個人企左係到呀!真係好多謝大家!」

「葉純,等等呀!唔好過去呀!」
「危險呀!停呀!」

「搞到大家咁擔心,個人好親切咁話揸車送我去附近車站呀!果到好似有商務旅館,真係好多謝大家呀!」

「真係咁親切?唔覺得好恐怖咩?」
「呢個人好危險!點會呢個鐘數仲係鐵路附近架?一定係岩岩埋完屍體之後俾葉純見到!快d走呀!」
「葉純落車呀!」

「架車好似去緊山邊,點睇都唔似有停車既地方。果個人已經唔同我講野喇。」

「葉純!快d報警呀!快d呀!」

「手機就快無電喇…我搵緊機會走…果個人由頭先開始就口up up……」

之後,就再無葉純既留言……

如果巴打絲打唔怕死既,不如下次去日本,就去呢個叫「きさらぎ駅」(如月站)既車站。
 

回覆