膽量挑機18之預告死亡嘅水井

又到咗星期六晚嘅膽量挑機時間喇!
 
哈哈哈!我個鬼樣嚇死你未?XDDD
 
上星期就去咗原宿附近嘅千駄ヶ谷トンネル到靈探!唔恐怖~~~
雖然有好多人係到嚇我,留言叫我望向後面,又話見到我身後有白影甚麼的!!!
 
你地真係好鬼衰,成日嚇鬼我!我唔驚lo!!!
大不了死!死咪死!死咗返嚟搵你地之嘛!!!
 
不過,都好多謝有巴打絲打留言俾我,叫我小心d~
其實,當我第一次行隧道時,我無太大強烈感覺,可能因為當時行緊嘅路上,有露宿者係到,陽氣旺盛。
 
你睇!我地個時笑住咁唱歌,就知完全唔驚啦!
 
但係,當我第二次行,我行另一邊,無露宿者,氣氛有所不同。
我抬頭望隧道頂部時,見到有不少樹藤由上面墓地伸延到隧道天花,再有一條又一條嘅絲吊落嚟。
 
 
當夜風吹過時,d絲隨風搖擺,多一份陰森感覺。
 
然後,係我行出隧道無耐,我見到大家留言叫我回頭望,咁我就回頭望。
我就見到係隧道口兩條行車線中間,有個好似安全島咁嘅地方,有個黑影。
 
雖然影唔到,但係我親眼見到!!!
 
當我定一定神,再望過去時,就唔見咗個黑影。
 
果一刻,令我諗起之前同大家講呢到嘅傳說,
「話衝出隧道之後,再回頭望,女鬼就喺隧道口到消失咗!」
 
可能有人未睇過靈探段片,大家可以喺到睇返!
開頭比較長,因為我地迷路XDDD
 
可能大家唔知呢到嘅鬼故,應該未睇之前嘅膽量挑機!
有興趣知多d呢到嘅鬼故就即入︰http://www.likejapan.com/guts16
 
向大家講完靈探報告之後,講返今晚嘅主題!
嘛…相信好多人都怕死吧!?人知常情!
當然,亦有唔少人都好想知自己幾時會死,想預知未來。
如果,真係有咁嘅機會,俾你預知幾時會死,你敢試嗎?
今晚,就為大家介紹位於高野山嘅奧の院!入面有一個能夠預知死亡嘅水井!
 
姿見の井戸
 
 
係好耐以前,呢一個井,曾經好受歡迎,因為當時有人身患重病,去到搵弘法大師救佢。
當時,弘法大師指住姿見の井戸就話「你飲咗山神嘅水之後,個病就會好返。」
咁個人飲完井水之後,真係好快就好返。
於是,呢個水井被稱為「薬井」。
 
之不過,到咗江戶時代,就有好多不同版本嘅傳說流出。
 
傳說一…
如果烏低身望落個井到,當你見到自己個影時,不出三年就死於非命。
不過,有一對夫婦都曾經一齊望過倒映,但係三年後仍然平靜咁過日子。
 
傳說二...
如果烏低身望落個井到,見到自己嘅倒映,咁恭喜你,你會好長命。
相反,如果見唔到個倒映,咁代表你好短命,好快死。
 
傳說三...
如果烏低身望落個井時,掟石仔落去井入面,再望泛起漣漪嘅水面,見到自己嘅倒映,咁就會好快死。
甚至,有機會睇到自己幾時死,點樣死法,死時個樣係點......
 
傳說四…
有人夜晚去靈探時,就烏低身望落個井到,見唔到自己嘅倒映,但係見到一個女仔嘅倒映。
唔知係咪貞子呢?哈哈哈。
呢件事係網上傳出,於是好多人都係深夜時份先去靈探!
希望可以睇吓個倒映係自己定係其他「人」?
 
 
有唔少人都因為好奇,唔信邪而望個井,又掟石仔落井入面。
但係到最後,佢地有無死於非命或好快死呢?就唔知道喇!
你呢?敢唔敢去果到,烏低身望落個井呀?