膽量挑機17之怨魂不散公園

又到咗星期六晚嘅膽量挑機時間。
 
相信有唔少人都鍾意去行公園,享受果一份寧靜、安逸。
但係又有無人知道,一入黑,公園就係另一個世界呢?
愈安全嘅地方就愈危險!
 
今晚,就同大家講有關公園撞鬼嘅事件。
當然,主角並唔係我,而係4個日本高中生……
撞鬼嘅公園就係……
 
夏の雲公園
 
呢個公園,曾經係好受歡迎好多人去玩嘅地方。
但係有一年,一個5歲男仔為咗要執返自己嘅膠波而衝出馬路俾車車死。
自此,呢個公園就開始傳出鬼故,變得愈嚟愈少人去玩。
 
 
話說,係幾年前,有4個高中生去呢個公園到靈探。
佢地分成兩組,A君同B君一組,C君同D君一組。
咁A君同B君就覺得有d口渴,就一齊行開咗,去便利店買嘢飲。
得返C君同D君喺公園到等,由於已經夜深,唔好話公園,就連附近,人影都無隻!
咁C君就開始淆底,同D君講︰「好靜呀,不如我地講吓嘢吖,好驚呀!」
就係呢個時侯,突然聽到一把細路仔聲︰「我個波飛咗出去呀!」
C君同D君都嚇咗一跳,你眼望我眼。
C君︰「你聽唔聽到呀?」
D君︰「聽到呀!」
之後,又再傳出果把細路仔聲︰「我個波飛咗出去呀!」
今次,仲好大聲,好似千里傳音咁,周圍都聽到……
咁岩,A君同B君就返嚟,C君同D君將呢件事同咗佢地講,4人決定返屋企。
第二日,佢地返到學校,同較fd嘅師兄講,於是個晚,師兄同幾個同班同學又去公園靈探。
結果,師兄佢地又聽到果把細路仔聲……
後嚟,愈嚟愈多同學去靈探,都聽到果把細路仔聲。
甚至,有人話見到有個膠波係馬路不停咁彈吓彈吓……
 
 
相信果個小朋友無心嚇人,只係佢唔知自己死咗,每晚不停重覆又重覆死亡經過。
希望果個小朋友早日安息。
 
呢個公園,我都好想去,但係由淺草站出發去光が丘站,要坐成個鐘頭車呀。
真係好遠呀!嘛…睇吓有無時間去啦~
當然,睇吓你地啦!你要識做呢~繼續支持我呀!
我已經開咗個人專頁一段日子喇,你like咗未呀?https://www.facebook.com/fuhai0w0/
如果喺一星期內,姐係5月13日前,夠500個like嘅話,我就去呢個公園,直播靈探俾大家睇!!!
講得出做得到!去唔去得成靈探,就睇你喇!!!
 
下星期同樣時間22時59分繼續有我新東方不敗同大家講日本鬼故!