膽量挑機16之澀谷猛鬼隧道

又到咗星期六晚嘅膽量挑機時間喇~
 
今晚講嘅地方係澀谷!
可能你第一個反應係「唔L係啩!?澀谷都猛鬼!?」
哈哈哈,我唔係專登想嚇你㗎!只係想你知道咩地方猛鬼,你驚既話就可以避開唔去果d地方~
之前已經講咗大阪、池袋、新宿等等……
開始換季,又係時候去日本買夏天衫,由其是去澀谷109到「濕平」!
好多時都鍾意周圍行,但原來以下呢個地方好猛鬼…唔可以亂去㗎……
 
千駄ヶ谷トンネル(せんだがやトンネル)
 
 
由「国立競技場」向南行去「外苑西通り」,左邊會見到「明治公園」,喺「仙寿院」位置向右轉就到呢個猛鬼隧道。
 
 
話說,唔少人喺深夜時份揸車,喺出入口頂部位置,會見到長髮女鬼倒吊咁望住你。
唔知點解,我聽到嘅第一反應係「點解又係長髮女鬼!?d男鬼去哂邊?」
同埋,我又諗,揸車d人見到前面有鬼,點解仲可以揸車入去!?
俾著係你,你都應該停車,即刻調頭走啦!係咪!?
 
 
又有人話試過揸車瞌眼訓,突然聽到敲窗聲,本能反應望過去,原來係長髮女鬼敲窗!!!
咁樣嚇一嚇,成個人當堂精神哂,咁就唔會發生「唔小心訓著咗而撞車死」嘅意外啦~
咁樣諗落,其實女鬼都幾熱心幫人喎~
 
 
咁又有人話試過夜晚行隧道時,行行吓,聽到後面傳嚟腳步聲。
一擰轉頭望,見到長髮女鬼係咁追住自己,咁唯有係咁跑跑跑,好快衝出隧道!!!
話衝出隧道之後,再回頭望,女鬼就喺隧道口到消失咗!
唔…長髮女鬼同你一齊跑吓步,做吓運動姐~都係為你健康著想咋~
 
舒咪媽腥,我係咁惡搞XDDD
 
喇~呢個隧道並唔係因為發生交通意外死人先傳出撞鬼事件,亦都唔係因為發生兇殺案喎。
咦!?咁點解d人成日都撞鬼嘅?
原來,隧道上面係墳場!!!
我唔係講笑,講堅㗎!有圖有真相!!!
 
 
我諗極都唔明,咁多地方唔起隧道,係都要響墳場下面!?
個隧道仲要係人又行,車又行,嘈到阿媽都唔認得!
成日係咁嘈嘈嘈、震震震,真係死咗都激到彈返起身啦!
日本政府真係「卡嘩依呢」,同d先人開個咁大嘅笑話!
 
後日,我就出發去日本喇!
上星期,我話過今次去日本會再去靈探!
去唔去呢個地方靈探,就睇你地喇!
你要識做呢~哈哈哈~
 
下星期六晚同樣時間22時59分,繼續有膽量挑機!
記得繼續支持我呀!