膽量挑機14之猛鬼尾班車

又到咗星期六晚嘅膽量挑機時間!
 
上星期同大家講山手線月台撞鬼事件,有巴打留言話親眼目擊過有人跳軌自殺!
真係不得不佩服果位巴打夠膽講返出嚟!
 
有時候,玩夜咗,無論幾迫都要迫上架電車,趕尾班車返屋企。
真係迫到阿媽都唔認得!
但係,又點會諗到,咁多人,咁重陽氣,都會撞鬼呢?
 
今晚我就同大家講喺電車撞鬼嘅靈異事件~
 
 
話說7年前……
 
有個日本男仔佢開OT開到好夜,唔知算係好彩定唔好彩,俾佢趕到山手線尾班車。
當時,車廂已經好多人,佢只好企喺座位前,希望有人落車時,佢可以有位坐。
坐係佢前面嘅喺一個年約30歲嘅媽媽,手抱住個BB,而隔離仲有個5歲左右嘅細路女。
 
電車由品川開始行,經過五反田、目黑、惠比壽……
期間,個媽媽一直同懷中嘅BB係到玩。
細路女望望個媽媽,再同個BB對望咗一陣,之後BB就開始喊。
細路女好細聲咁講
「做咩喊呀?」
「係咪肚餓喇?」
媽媽好似聽唔到細路女講野,搖搖個BB,然後又講返同一句「係咪肚餓喇?」
無耐,個BB就無再喊,媽媽又繼續同BB玩。
 
當電車去到澀谷站時,上落車嘅人都好多。
個男仔見到有空位,即刻坐落去,當覺得自己好好彩有位坐時,就唔小心跌咗部手機落地下。
當佢伸手去執返部電話時,就有隻手仔伸咗出嚟,指住佢掛喺手機個堆電話繩。
「呢個係咪米妮呀?」
本能反應望過去,原來係頭先果個細路女。
個男仔笑笑口答「無錯!」
之後細路女又伸出手指仔指住電話繩
「呢個係咪Chip 'n Dale呀?」
「呢個係咪人形公仔呀?」
 
個男仔就同細路女好似玩遊戲咁不停你問我答。
「呢個係咩嚟㗎?」
個男仔唔出聲,之後細路女再問
「呢個係咩嚟㗎?」
個男仔都係唔肯答,細路女抬起頭望住佢問
「呢個係咩嚟㗎?」
對望果一刻,個男仔嚇咗一跳!個細路女對眼係全黑㗎!
 
電車突然急停,放喺大脾上嘅袋跌咗落地,個男仔即刻彎腰執返個袋。
但當個男仔坐返起身時,發現原本坐係隔離嘅細路女唔見咗!
變咗一個上班族西裝友好靜咁坐係到!
 
電車終於到咗池袋,個男仔就唔理咁多落車。
正當佢行緊樓梯落去時,見到頭先個細路女企係佢面前,伸手指住佢!
「哥哥,呢個咩嚟㗎?」
個男仔嚇咗一跳,就同個細路女講「小妹妹,你快d返屋企啦!」
個細路女就「hehehe」咁笑幾聲,之後就消失咗……
 
原來兩年前,曾經有小朋友因意外墜軌而慘死……
 
呢件靈異事件,令我聯想起《見鬼》其中一幕。
「姐姐,有無見過我張成績表呀?」
 
希望「鬼妹」「鬼仔」能夠早日往生!脫離一切苦難!
 
如果你都有類似嘅靈異經驗,留言話我吖!