膽量挑機12之受詛咒嘅東京鐵塔

又到咗星期六晚嘅膽量挑機時間~
 
今次去日本,我睇咗三次東京鐵塔~
夜晚睇,真係幾浪漫㗎~當然,要睇對象啦~
不過,你又知唔知道呢個咁浪漫嘅地方,同時都係一個好恐怖嘅地方呢?
 
 
先同大家講講東京鐵塔嘅背景先啦~
 
東京鐵塔於1958年建成,高333米,係日本嘅廣播電視電波塔。
係大樓入面嘅「FootTown」有蠟像館、水族館、特產店、餐廳。
 
係第二次世界大戰時,無數嘅死難者被埋葬於塔下位置。
末期時,日本軍係死前落下詛咒!
要世世代代嘅日本人都記得呢件事,要為佢地報仇!!!
 
 
後黎,果到變成增上寺嘅墓地。
無數嘅遺體並無被掘起遷移,就咁拆去墓碑,然後就興建東京鐵塔。
而東京鐵塔有部分係由朝鮮戰爭中所使用嘅90部戰車溶咗嘅鐵所做成。
 
而當時有個新興起嘅宗教,就要鐵塔以紅色為主,而且稱為「神之血柱」!
東京鐵塔吸取埋係地底死去嘅日本軍同國民嘅血,而染上血紅色!
 
 
網上傳聞,因為興建晴空塔,令日本人都衝去晴空塔,無再去東京鐵塔,因而觸怒咗天神。
於是,就發生地震……
話係天神懲罰日本人喎…嘛…真定假…真係無人知…
不過,我希望地震中死去嘅人能得到安息。
 
多次係網上傳出鬧鬼事件,當情侶係夜深時到東京鐵塔時…
都會係鐵塔下見到少女嘅鬼魂係到徘徊……
其實,我都唔明,點解次次都係女鬼!?d男鬼去哂邊!?
 
唔知有無巴打絲打曾經係鐵塔下行過呢!?
我就只係遠望喇~所以,咩都見唔到~
如果有「經歷」嘅話,不妨留言同我分享吖!