[胃食日本] 7月原宿新開、必試焦糖燉蛋可麗餅

原宿竹下通最近出現左間同一般唔太一樣嘅可麗餅店
「Comcrepe」
 
佢地最特別嘅招牌焦糖燉蛋可麗餅
好耐之前喺日本已經成為左話題,
只係當初只有富山県先有(我個陣真係好失望
但係7月1日!竟然喺原宿開左新店!!!
 
佢係喺原宿竹下通後街,
一去到已經見到有人排隊,
「人唔係好多咋喎...」  
 
錯覺

 

去排個陣STAFF會俾MENU同店鋪介紹張紙你,
之後會帶你去到鋪頭後面到排.. 就會發現..

 

除左招牌焦糖燉蛋可麗餅(600Yen)之外,
仲有有士多啤梨焦糖燉蛋可麗餅(650Yen),
朱古力焦糖燉蛋可麗餅(650Yen),
芝士焦糖燉蛋可麗餅(650Yen),
冰凍雪糕焦糖燉蛋可麗餅(600Yen)
同埋一般嘅可麗餅至到冰凍飲品都有架

 

最特別嘅係MENU所有嘅可麗餅都可以TAKE OUT拎返屋企
佢地有專用包裝俾你拎返去慢慢食,
又或者放入雪櫃,第二日食都得架!
(只可以KEEP到第二日)
當然買完即食都OK~

 

因為天氣真係太熱,
所以我揀左佢地嘅冰凍雪糕焦糖燉蛋可麗餅拎返去食
依個冰凍雪糕焦糖燉蛋可麗餅可以拎返去
放入冰格雪30日都得架(要係冰格)

 

依個就係佢地嘅專用TAKE OUT包裝,
會有乾冰俾你
佢地話1個鐘至2個鐘都OK
但係最近天氣太熱,當然預早少少會好D~
 

 

我帶返去個陣唔小心撞左撞,所以個樣有D樣衰左

 

個焦糖面燒得好香好脆,
焦糖下面係濃厚雲呢嗱雪糕,
好夠凍好好食~ (而且本身我好鍾意食焦糖燉蛋)
最緊要係唔係太甜,又可以一路行一路食~~
而且加上大熱天,食依D真係好幸福~

 

唯一係佢個皮唔知係咪因為要KEEP住D雪糕,
有少少厚(或者因為係冰左),
所以如果有機會試嘅朋友可以試一試
佢最簡單嘅焦糖燉蛋可麗餅可能個皮唔會太厚

 

同埋冰凍雪糕焦糖燉蛋可麗餅可以等佢解凍左一陣先食都得,
因為太早食個雪糕會有少少硬架~
 
 
佢地開10:00~20:00,逢星期三休息(有時星期三都會開)
有興趣嘅朋友記得去原宿行街街之餘
去試下佢地嘅焦糖燉蛋可麗餅幸福下~消下暑~
仲有要飲多D水,小心中暑阿