[胃食日本] 試食三大便利店幾款不同口味飯糰第一彈~

日本便利店嘅飯糰多不勝數,為左多D人買,
佢地都出好多限定又或者特別嘅飯糰,
因為實在太多,所以決定每隔一段時間就介紹一次俾大家(笑)
 
首先係FAMILY MART
 
燒牛肉飯糰(138Yen 新發售)
紫菜有特別調味過,雖然牛嘅量唔係話好多,
但係同堆D飯嘅味道平衡啱啱好
燒肉嘅醬汁加埋牛肉幾好食~
 
 
日本叉燒蛋飯糰(150Yen)
簡單D黎講姐係將拉麵嘅配菜變成飯糰,
再加上一D芥辣,飯有調味過,味道幾好食,偏飽
但係好似食唔到有叉燒
可以好清楚見到隻蛋,但係說好的叉燒呢
 

 

 
最後嘅就係我親愛嘅原隻流心蛋飯糰(200Yen)
我相信有食過依個飯糰嘅朋友有好多食完都會好感動,
咬開一半流心蛋嘅蛋黃就流哂出黎,再配埋調味飯,完勝~
 
之後要介紹嘅係LAWSON~
甜辣豬肉卷飯糰(399Yen 新發售)
喺便利店黎講算係貴價,用九洲嘅甜辣醬油加上豬肉~
比起其他飯糰黎講似食肉多過食飯,好有肉感,一包有兩個
好啱SHARE食
不過買之前有個注意點就係佢係要叮過先好食,同埋係用手食唔到
所以想邊行邊食嘅話依個會比較難小小
 
醬油生蛋飯糰 (120Yen)
日本好多人好鍾意用生蛋加醬油撈飯,簡單又平又好食
LAWSON就將佢變成飯糰
用嘅係醬油飯,紫菜有調味過,再加上蛋黃,好好食~
如果怕頭先FAMILY MART個個流心蛋太飽嘅話
依一個都係一個幾好嘅選擇~
 

 

LAWSON有一系列比較貴小小但係用料比較靚嘅飯糰
依個係其中一個高級三文魚子飯糰(175Yen)
料好足~新瀉嘅飯同分量啱啱好嘅魚子,加埋唔會太咸,
可以食到魚子嘅鮮味~有小小餓個陣食都好滿足

 

最後係7ELEVEN
三文魚親子飯糰(150Yen)
同頭先LAWSON個個唔一樣,除左三文魚子之外仲有三文魚肉,
用嘅係調味飯,一入口會食到好重三文魚子香,
淡淡地調味過嘅三文魚飯加埋魚子Good~

 

最後都係半熟蛋系列嘅
豬骨拉麵半熟蛋飯糰(140Yen)
入面有加埋少少沙律醬,配上調味過嘅飯同半熟蛋~
當然就冇FAMILY MART個個咁流心,
但係蛋都係好入味,而且冇流心蛋個個咁飽架~
 
 
不過如果話俾我揀,就一定係非流心蛋莫屬
我試個成個星期早餐都係佢
有機會黎日本嘅朋友一定要試下
 
 
 
 
真心的。