[胃食日本]食慾的秋天又到~介紹10款期間限定蕃薯食品~

話咁快秋天又就黎到,而秋天就當然係栗子,
南瓜同蕃薯/紫薯嘅生產旺季,
所以日本喺未到秋天之前已經瘋狂地出咗一大堆紫薯零食同甜品,
今日就同大家介紹同試食幾個新嘅俾大家啦~

零食篇
 

さつまりこ 燒蕃薯口味

 

依個係卡樂B Jagariko嘅燒蕃薯口味,
2001年已經開始有出
每年都革新到今年2016年~

 

打開已經聞到甜甜地嘅蕃薯香味,
味道甜甜地,好重燒蕃薯味,
真係會唔覺意就食咗成盒

 

まるdeおさつ(Maru de Osatsu)

初初我以為係曲奇餅...

 

獨立包裝,一共有9塊,
外表似係曲奇,食落去係似鬆餅
一D都唔脆,蕃薯味再加上面頭嘅黑芝麻好香,
食完芝麻味仲要留喺口入面,不過偏甜,
所以係配茶或者配咖啡都係一個幾好嘅選擇~

 

LOOK 紫薯羊羹&甘露和栗朱古力
好多人都會睇圖見到係紫著同栗子就走去買
但係依個要小心佢係「紫薯羊羹」同「甘露和栗」
本身已經係甜品嘅兩樣野變成朱古力就真係....
 
 
好甜。我要分成個星期先食得完
不過紫薯同和栗味好夠,我自己就比較鐘意和栗多D

 

Mike Popcorn 蕃薯牛油口味
一打開就可以聞到淡淡嘅蕃薯同牛油香,
食落甜甜咸咸咁,一放口有小小蕃薯味但係好快無咗
感覺可以再濃D,鐘意食濃口味嘅朋友可能會覺得唔夠喉~

 

濃厚さつまいも ブランチェールミニ
依個係蕃薯夾心朱古力~
用蕃薯曲奇加蕃薯味朱古力
除左蕃薯之外咩味都食唔到
曲奇好鬆脆但係

 

……..
好好好甜
就咁食可能食幾粒就皮已收

 

最後就係PRETZ おさつ
亦都係我嘅最愛
拎一條聞下都可以聞到蕃薯香,
味道亦好夠,再加上佢面頭灑嘅砂糖,
甜甜地都又唔會過甜而且唔會蓋過蕃薯味,
又係唔覺唔覺就會食哂

 

甜品篇

 

唔洗我多講嘅Haagen-Daz紫薯雪糕
一食落去已經係
「嘩~~~紫薯阿~~」
而紫薯雪糕加上紫薯醬同軟滑口感,
夠哂濃郁~
 
 
ファッミマプレミアム安納芋のタルト
Family Mart出品嘅蕃薯撻,
係用蕃薯蓉同吉士醬加埋黑芝麻去整
蕃薯味濃郁,黑芝麻同蕃薯夠Match
可以用到微波爐嘅朋友可以叮熱小小會更加好食~
 
安納芋と黒ごまのベイクドケーキ
同樣係FamilyMart出品
係蕃薯黑芝麻蛋糕
蕃薯口感好滑夠濃郁,最底係用曲奇餅底,
加埋黑芝麻可以食到3個唔同口感架~

 

最後係紫薯同栗子布丁~
其實我見到個色有猶豫左一陣買唔買

佢上面係栗子下面係紫薯,
比我想像中好食好多,
栗子同紫薯加上牛奶咁嘅感覺,
唔太甜,口感軟滑而且易入口~
 
 
 
雖然秋天未正式到,
但已經都出咗好多同埋仲會出更多秋天味覺食品,
秋天嚟日本玩嘅朋友
記得有時間就去便利店睇下有冇新口味同試下佢地啦~