【細膽啲都畀佢嚇一跳!】4間古靈精怪日本餐廳

香港有間餐廳出哂名食野唔準玩電話又唔準食剩野,老闆娘鬧人鬧到街知巷聞,仲上哂報紙添!不過並冇因為咁而鬧走哂啲客, 大家反而覺得老闆娘好似阿媽咁鬧佢地好親切,好多人都為咗想畀佢鬧吓而特登去添。
 
類似嘅餐廳,原來日本都有,奇怪嘅規矩反而成為咗餐廳賣點,好似以下幾間,唔做定心理準備入到去可能真係會嚇一跳!
 
1. 唔準講野唔準講電話@牛丼専門サンボ
 
 
呢間專食牛肉飯嘅Sanbo已經有成30年歷史,上網一查佢個名,第一時間出現嘅並唔係話佢好好食嘅食評,而係話個老闆娘好惡,入去食野好多規矩,好似個袋要放地下、食野唔準用電話、唔準大聲講野、唔準喺店入面飲樽裝飲品、食完要即刻走等等,一犯規老闆娘就會大聲鬧人。不過老闆娘鬧唔鬧人都幾睇佢當日心情,因為有人試過大聲咗少少講野就畀佢鬧爆,但有人喺佢視線範圍喪玩電話都冇事。
 
叫得做牛肉丼專門店,牛肉飯嘅質素當然有返咁上下!牛肉整得好入味,白飯亦吸哂牛肉汁精華,加上份量都幾大,食完一碗超滿足。
 
店入面大大張紙寫明話唔準用電話,仲要求大家熄機添,好嚴格啊!
 
呢位就係傳說中嘅老闆娘,好多人見到佢都會莫名地緊張。
 
牛丼専門サンボ
地址:東京都千代田区外神田3-14-4 国際ビル 1F
營業時間:星期一至五11:30~19:00、星期六、日及公眾假期 11:30~17:00
休息:不定休
 
=================
2. 叫炒飯送炒飯@チャーミングチャーハン
 
 
呢間叫「Charming炒飯」嘅餐廳淨係睇個名都知道係主打炒飯,所以無論叫拉麵又好咩野食都好,都可以揀加多¥200跟炒飯,包括叫炒飯!好多人就係因為好奇係咪真係叫炒飯都可以跟炒飯,同埋原本嘅炒飯同跟餐嘅炒飯有咩分別而特登走嚟八掛吓,結果大家得到嘅答案都係一致嘅「冇分別」......
 
呢碟係正常嘅炒飯。
 
兩個炒飯放埋一齊係咪分唔到邊個係跟餐炒飯呢。想分清楚仲有個好好嘅方法,就係直接問店員,佢地真係會好認真咁話畀你聽邊個係跟餐邊個唔係。
 
試食之後大家都話無論係賣相定味道,兩個炒飯都係一模一樣嘅。(點解真係會有人咁認真去試!?)
 
チャーミングチャーハン
地址:京都府京都市中京区丸太町通り油小路西入ル丸太町27 高陽院ハイツ 1F
電話:075-211-0229
營業時間:11:00~14:45、17:00~21:00
休息:星期一
 
=================
3. 成碗得兩條烏冬@京都北野たわらや
 
 
食店嘅外表好古色古香,以為入面食嘅野都係比較經典冇咩驚喜,點知見到碗特製烏冬真係嚇一嚇,嗰種震撼係要現場去睇先會Feel到!
 
成碗烏冬得兩條,不過並唔係因為偷工減料搞成咁,而係啲烏冬大條到個碗只裝得落兩條,每條有成50cm咁長,足足有成人手指咁粗,食呢個烏冬完全冇辦法可以好似平時咁成條啜入口!
 
驟眼睇以為碗烏冬用咗個好細嘅碗先有呢個視覺效果,但當你睇埋隔離碗丼飯就會對比到其實係啲烏冬大到唔正常!
 
呢個烏冬喺當地好受歡迎,除咗造型夠爆之外,味道同口感都唔錯,食落口非常煙韌,仲有好香嘅小麥味。
 
たわらや
地址:京都府京都市上京区御前通今小路下ル馬喰町918
電話:075-463-4974
營業時間:11:00~16:00
休息:星期二
 
=================
4. RAMEN ON FIRE!!@めん馬鹿 一代
 
 
睇唔出呢間野舖仔細細,但整碗拉麵都好似玩緊雜技咁!好多人入嚟就係為咗碗燃燒拉麵「燃えるラーメン」 ,明明事前都做哂research有哂心理準備,但都係會畀佢嚇一跳!
 
當老闆放低碗拉麵,佢會講到明要大家將雙手放喺身後唔準郁,仲要大家承諾跟住落嚟就算見到啲咩都唔可以大叫同唔準擅自離開座位,講到咁煞有介事,搞到全場嘅食客都好鬼緊張。就喺呢個時侯,老闆就會突然將極高溫嘅油倒入碗拉麵度,拉麵瞬間著火,火勢大到燒到上天花板,嗰種熱力同壓迫感,拍得住 USJ個Backdraft!
 
啲火大到好似爆炸咁,差啲連個廚房都燒著埋,反應慢少少真係會嚇到三魂唔見七魄,食完碗拉麵快啲去收收驚先!
 
呢碗就係燒完之後嘅拉麵!由於用猛火燒嘅關係,啲蔥好香好香,最神奇係啲麵咁燒法都唔會變腍,千零円就有視覺同味覺雙重享受,唔怪得咁多人慕名而去!
 
要食燃燒拉麵只可以坐counter位,燒嘅時候counter位附近會舖哂毛巾做好哂防火措施,所以應該好安全,so far到而家好似未發生過意外。
 
めん馬鹿 一代
地址:京都府京都市上京区南伊勢屋町757-2 佐々木ビル
電話:075-812-5818
營業時間:11:30~14:15、18:00~23:00
休息:星期二