【粉紅VS淺藍】東京勁浪漫冬季燈飾

有時去旅行食到飽飽地,好想搵個地方散吓步消化吓,最好就係靜靜地加有景睇,可以順便影吓相唔好浪費去旅行寶貴嘅每分每秒嘛~
 
如果大家要求要有浪漫氣氛,極度推介大家去呢兩個位於東京市內可以睇到勁靚燈飾嘅地方,拖住另一半慢慢行,真係前所未有嘅浪漫!
 
1. 冬之櫻@目黒川沿道
 
 
呢度嘅燈飾以櫻花做主題,42萬個粉紅色燈泡掛滿沿途樹木,好靚好浪漫。呢個燈飾活動由2011年起每一年都會搞,到今年話咁快就已經到咗第6年喇,入面嘅所有燈泡都係由附近民居同食店用剩嘅廢食油去推動發電,夠哂環保。
 
大家行的話可以由黑川沿道行,到品川區立五反田FUREAI水邊廣場全程大概1.1公里,十零分鐘就會行完,完全唔會覺得辛苦。
 
目黒川みんなのイルミネーション2016
地點:品川区立五反田ふれあい水辺広場(東京都品川区東五反田2-9)、及目黒川沿道
點燈期間:2016年11月18日(星期五) ~ 1月9日(星期一)
點燈時間:17:00~22:00
 
================
2. 青の洞窟 SHIBUYA@渋谷
 
 
事隔2年,青之洞窟嘅燈飾終於返嚟啦! 「青の洞窟」係沖繩一個好出名嘅潛水地點,以360°藍色美景見稱,而呢個燈飾就重現咗當地嘅感覺,以55萬個藍色LED燈喺渋谷至代代木公園範圍舖天蓋地咁整咗條全長750米嘅燈路出嚟,整條路都被燈光染成淺藍色,勁靚!
 
青の洞窟 SHIBUYA
地點:渋谷公園至代代木公園一帶
點燈期間:2016年11月22日(星期二)~1月9日(星期一)
點燈時間:17:00~23:00