【箱根】溫泉旅館(附露台私人風呂)推介

箱根係東京近郊地方,亦係出咗名浸溫泉嘅勝地!去得箱根,通常都會住返晚嘆下嘅,咁到底箱根有啲咩溫泉旅館值得一住呢?如果你都鍾意附有私人風呂嘅溫泉旅館,咁呢篇blog就啱晒你啦!一間附有露台私人風呂嘅房間,除咗適合一家人去,仲好啱情侶𠻹!今次就揀咗6間溫泉旅館,即刻一齊睇下啦!
 
01|箱根吟遊
 
呢間旅館評價十分高,旅館位於420米高處,環抱河谷及箱根連山,仲有隨住四季而變嘅壯麗景色,有靚景之餘仲有十分好嘅服務!我哋之前都有篇blog詳盡介紹㗎,有興趣嘅朋友去睇下啦:箱根吟遊  雖然小編仲未有機會去住,但睇相一樣feel到房間望到嘅景色十分靚!
 
 
箱根吟遊
地址:神奈川県足柄下郡箱根町宮ノ下100−1
電話:0460-82-3355
房價:雙人房 ¥29,000起/人
 
 
02|季之湯 雪月花
 
呢間係呢篇blog入面唯一一間小編入住過嘅,十分美好嘅回憶啊~ 呢度每間房入面都有露台風呂,而旅館底層除咗有大眾湯之外,仲有3間私人露天風呂,只要開放時間內入面冇人就可以用,真係好嘆!嚟得溫泉旅館,都預咗成日時間會留喺館內,所以記得book埋早餐晚餐,度個靚假啦!
 
 
季之湯 雪月花
地址:神奈川県足柄下郡箱根町強羅1300-34 
電話:0460-86-1222
房價:雙人房 42,000円 ~  42,000円/1室
 
 
03|強羅花壇日式旅館
 
強羅花壇係傳統日式旅館,佢嘅建築同設施坐落喺皇室家族成員嘅前夏季別墅地面上,設計獲得高度讚揚㗎!旅館十分重視服務質素,亦係5星級旅館,希望帶到最好嘅服務俾客人。對傳統建築有興趣嘅朋友就可以試住呢間旅館啦!見到佢嘅房內嘅私人風呂,望到出面嘅和式靚景,好想入住啊!不過呢間價錢就貴啲,想住嘅朋友不妨上網對比下價錢先訂房。
 
 
強羅花壇日式旅館
地址:1300 Gora, Hakone, Ashigarashimo District, Kanagawa Prefecture
電話:+81-460-82-3331
房價:雙人房(配有私人風呂) ¥65,000/1人
 
 
04|金乃竹塔之澤旅館
 
金乃竹塔之澤旅館位置處於水同竹林環繞之間,酒店嘅概念係基於國家著名故事《竹取物語》而建成嘅,睇相真係靚到暈。望住咁靚嘅竹林浸溫泉,真係非一般享受啊!而旅館內嘅設計都係以簡單為主,以木為題,俾客人一個大自然般嘅環境慢慢享受。
 
 
金乃竹塔之澤旅館
地址:神奈川県足柄下郡箱根町塔ノ沢191
電話:(0460)85-9800
房價:雙人房(配有私人風呂) ¥30,000円/1人
 
 
05|箱根湯本溫泉靜觀莊
 
講難book嘅旅館呢間都算係其中一間啦,事關呢間旅館加埋得9間房,鍾意嘅朋友記得一確認咗旅行日子就要book啦。呢度每一間房間都有自己所屬嘅風呂,有分半露天同露天風呂房,設計比較現代!同樣面向大自然森林美景,俾客人一次難以忘懷嘅住宿經驗啊!
 
 
箱根湯本溫泉靜觀莊
地址:19 Yumotochaya, Hakone, Ashigarashimo District, Kanagawa Prefecture
電話:+81 460-85-5795
房價:雙人房(配有私人風呂) ¥22,500円/1人
 
06|強羅漢吉馬多卡之森日式旅館
 
以日式設計建成嘅呢間旅館,位置喺箱根森林入面,所以環境特別寧靜㗎。旅館只有20間客房,有森林景同山景房選擇,同樣望住靚景浸溫泉啊~ 
 
 
格拉漢吉馬多卡之森日式酒店
地址:Hakone Machi Gora 1320-862, Ashigarashimo-gun, Kanagawa
電話:+81-460-82-4100
房價:雙人房(配有私人風呂) ¥35,000円/1人
 
 
睇完咁多間溫泉旅館,係咪心思思想去日本度個假呢?記得去之前做定功課,去箱根仲可以去埋大涌谷同雕刻之森美術館㗎!下次見啦,Bye Bye!
 
(*以上價錢只供參考。)