箱根中嘅b612小行星 小王子博物館

講起小王子實景,唔少人都會馬上諗起韓國嘅法國村(唔洗問都知道係因為《來自星星的你》啦)。
 
不過其實喺東京近郊箱根,都有一間非常出名嘅小王子博物館,如果你鍾意小王子嘅話就一定要嚟潮聖喇!
 
由箱根湯本車站搭箱根登山巴士(T)喺「川向・星之王子博物館前」站落車,一落車就到小王子博物館㗎啦!
 
一入去就見到最經典嘅插畫場景銅像,梗係要打個卡啦!
 
門口大大舊雕塑寫住小王子餐廳~餐廳食物係精緻同好食嘅,不過大家唔好諗多咗以為有小王子公仔嘅料理……係冇嘅!
 
入到去行兩步,嘩靚到吖!淨係為咗個庭園已經值得嚟啦!
 
如果咁啱6、7月嚟到,仲會見到真玫瑰?!
 
呢到就係買飛嘅地方:
成人1600円;學生(大學生、大專生都包)1100円;如果你買左箱根Free Pass都會有優惠!
小王子博物館係有預先買飛優惠嘅,大人預先購票係1400円,如果想買定飛先,可以上佢哋個官網度買,不過記得一定要Print出嚟!佢哋講到明唔可以就咁Show電話畀佢哋睇㗎!
 
 
左邊係入場票,右邊係案內小冊子,大家唔好急急腳收埋本小冊子啊!一陣會有用㗎!
 
天啊!連塊牆都咁靚啊!如果間房有咁靚嘅牆紙就好啦~
 
歡迎進入來自星星嘅世界!
 
 
一入去就見到成條法國村!
 
法國街真係冇得頂地靚啊!差啲以為自己喺法國,哈哈~~~
 
當然唔小得有小王子嘅雕像啦!個個都排晒隊係到影相。
 
另外一邊係一個小教堂~
 
影完入面熱熱地,就去室內嘆冷氣順便睇展覽……呀唔係,係睇展覽順便嘆冷氣先啱~
故事入面架飛機模型啊!超級大!勁有型!
 
有個影院仔可以睇短片~不過淨係得日文w
 
展覽入面講咗好多關於小王子作者Antoine嘅人生大小事,又展示咗佢細細個生活嘅房、工作枱等等~
同埋仲搭咗好多故事入面嘅場景?!
 
 
故事中嘅飛機內部原來係咁樣嘅!
 
當然唔少得小王子嘅手稿啦~
 
啱啱咪話唔好收埋本小冊子嘅,因為展覽廳入面有好多地方都可以吸印仔!
本身小冊子上面嘅畫只係畫咗一半,要將啲印仔吸落幅畫到,先能夠完成張畫!成個設計真係好正啊~
 
睇完展覽出來又係另一個影相位~
 
 
 
 
我去個日落大雨,影唔到藍天白雲~畀大家睇下,官方影出嚟嘅係咁靚㗎!
 
最後,就當然唔少得購物課金嘅環節啦!小王子精品多到不得了,有毛巾呀、手巾啊、信封信紙啊諸如此類,仲有啲係全世界得呢到先有嘅文具等等!
 
總之一句,如果你鍾意小王子/法國庭園嘅話,就一定唔可以錯過呢個小王子博物館啦!
提提大家,由於小王子博物館6點就關門,最後入場時間係5點,所以大家唔好預到啲時間咁忟啦~~~
仲有仲有,小王子嘅日文唔係「小王子」,而係「星の王子さま」,如果大家問路寫漢字比其他人睇,就記得寫「星の王子」啦!
 
拜拜~~~