窮遊必瞓:網吧$100蚊一晚有找!

成日都聽到d朋友話好想去日本睇演唱會、去握手會、去簽名會,但就係驚唔夠錢,結果都係得個「諗」字。
大家係咪身同感受呢?係咪好想去日本睇AKB,睇ARASHI呢?

喇喇喇!好多野唔試過係唔知嘅,凡事都有第一次架嘛!
所以呢,等我分享下我一條友仔孭背囊去日本既經驗俾大家啦~

機票,真係上廉航到搶機票啦!唔好即刻彈句「這些機會不是屬於我的」俾我呀你!
因為我真係試過搶到$1蚊機票架,計埋行李費同燃油附加費,都係$500咋!

好喇,KO咗機票方面,就到住宿問題喇。D錢梗係留返黎買周邊啦!
住宿方面,有地方俾我訓同沖涼就「大丈夫」架喇。
所以呢,我選擇咗訓!網!吧!

唔好以為訓網吧係咩奇怪既事呀,因為有唔少日本人唔想交貴租而長居網吧架!
究竟日本網吧有咩咁好呢?同香港網吧又有咩分別呢?

你睇,網吧包你上網睇漫畫之餘,仲要有得沖涼,汽水咖啡任飲,
仲要有得整埋Gel甲!問你服未?哈哈哈!

呢間網吧就同7仔一樣,總有一間係你附近,隣近車站,好易搵。
我第一次去呢,就係去位於新宿區歌舞伎町既分店。

一個女仔去網吧過夜唔驚咩?唔洗驚喎,有得揀特設女性專用區,仲要係獨立房!
由於我唔食煙同埋有哮喘既關係,我仲揀埋非吸煙區!

個流程是咁的,一入去間店,架仔店員就會俾張menu你睇,你揀定要邊個package。

填張表格申請埋做會員,交passport俾佢對資料,
之後就會出張會員卡俾你方便下次用,同埋俾條key你。

基本上,揀1400円8小時過夜( $ 91HKD),
或者2100円12小時( $136.5HKD)嘅package就夠。當然,假日會貴少少啦。
而我呢,就揀前者比較多,因為多數玩到夜晚10點幾11點。
差唔多12點時check-in,第二朝8點左右就check-out。
半個鐘上下網睇下漫畫飲下野,半個鐘沖涼,半個鐘執下行李,
6個鐘俾我訓覺,都仲有半個鐘俾我朝早刷牙洗面。
唔洗$100蚊就搞掂一晚!

記得諗清楚先好揀package呀!因為揀左就無得轉架喇……如果一揀錯左,就變成……

大大張梳化椅俾你坐足成晚扮腦細,但一定無覺好訓,而且行李都唔知放係邊好……
識揀一定揀「フラットブース」,姐係一打開門入去就訓得,
有厚厚既軟墊俾你,唔洗驚訓到背脊痛,個樣係禁……

大約有6x3呎左右(每間分店不同),已經準備埋枕頭俾你訓。
唔想咁快訓嘅話,房內有部電腦,可以上陣網先,或者出去外面拎漫畫睇。
如果口渴,可以出去拎汽水咖啡飲,係免費任飲架!
但肚餓呢?真係「舒咪媽腥」,小食係要俾錢。
所以我入店之前,就會去便利店買炸雞,偷偷運入去……(細聲)

值得一讚嘅係浴室方面,除咗無限時沖涼之外,
提供埋風筒俾你吹頭,又提供埋牙膏牙刷俾你第二朝起身用。
係女性專用區,仲會提供埋剃!毛!刀!
你無睇錯!係剃毛刀!真係好貼心呀~

仲有呀!千其唔好遲check-out呀!每遲15分鐘就多收110円架!
至於Gel甲呢,我未試過,下次試完話你知啦!

店名︰まんが喫茶マンボー
網址︰http://manboo.co.jp/

 

回覆

新東方不敗的圖片

房係好細,但洗手間同浴室都好大,俾我係入面慢慢扮靚靚。
如果你都去,記得整埋Gel甲返黎,哈哈哈(^w^)/