【石垣跳島遊】竹富島單車遊島樂

上回提到而家HK Express開咗條新線可以直飛沖繩石垣島。而係石垣島附近其實仲有好多大大小小嘅島嶼,合稱「八重山群島」
 
黎到石垣,識玩嘅一定會玩埋跳島。今日就同大家去到其中一個小島,「竹富島」
 
▼首先到石垣港離島碼頭 (石垣港離島ターミナル)買船飛。去竹富島嘅價錢係單程600円來回1,150円
 
 
▼認住碼頭編號唔好行錯呀。由石垣島去竹富島船程只需15分鐘,非常快捷。
 
 
▼一落船就見到有「水牛車」標記嘅Van仔等緊我地。
 
 
▼落車之後,首先迎接我地嘅係呢隻充滿「Rock & Roll」風味嘅吉祥物。
 
 
▼入面有好大嘅休憩同商店區域。而我地第一樣要體驗嘅係坐「水牛車」
 
 
▼買好飛就可以等出發啦。整個水牛車遊覽大約30分鐘,價錢為大人1,200円小童600円
 
 
▼竹富島被日本政府指定為重要傳統建築保護區。係日本唯一,由全島建築物至文化傳統,耕作收成,甚至連人,貓,狗,牛數量都被立法保護。
 
 
▼水牛久經訓練,已經記得遊覽嘅路線,唔駛指示已經知道幾時轉彎。不過好笑嘅係,水牛腸胃極佳,成日走到一半要停低大小便。而我地就近距離感受到呢種「大自然」嘅風味。
 
 
▼去到尾聲,職員仲會邊彈三味線邊唱出當地民謠,再加埋周圍嘅園林景色,感覺非常寫意。
 
 
▼坐完水牛車,我地就試埋當地另一種熱門玩意「踩單車」。呢度有普通單車同電動單車出租。首小時價錢分別為300円同600円。超出一小時後,會每30分鐘收費分別150円同300円
 
 
▼睇番地圖,可能你會覺得點與點之間好遠,但其實整個島面積唔大,要踩單車環島遊都無難度。
 
 
▼最重要係島上人少,連車都比較少,好不自在。
 
 
▼首先我地黎到嘅係「星砂浜」。呢度嘅特色係有好多星星形狀嘅沙粒。
 
 
▼不過當日我去到嘅時侯,已經搵唔到星沙,聽講係近年多咗遊客,好多星沙都被帶走。如果要搵到星沙就要行到較遠嘅沙灘位置先搵到。唯有睇下之前被拍下過嘅星沙相大家睇下先,你地搵唔搵到星星呢?
 
 
▼旁邊亦有一個小攤位可以俾你一睹星沙。而係一開始,觀光中心都送咗一小包星沙俾我地做紀念。
 
 
▼下一站我地就黎到「西桟橋」
 
 
▼沿住橋嘅方向直行可以到達淺灘位置。
 
 
▼沿住一直行可以行到去海中心,水位大概係膝蓋位置。藍天白雲加埋翠綠海水,真係影相影到手軟。聽講呢度睇日落仲非常靚添,可惜我地無時間,如果唔係可以係呢度悠閒咁享受微風迎接日落。
 
 
後記:由於趕飛機嘅關係,我係竹富島只係逗留咗幾個鐘頭就離開,仲有好多景點都未去到。如果時間許可嘅話,其實建議大家可以一朝早搭頭班船開始玩,然後搭尾班船返石垣島(大約6:15)。咁樣嘅話,基本上都可以走訪晒島上嘅景點。不過如果你想更加悠閒地體驗竹富島的話,都可以選擇係呢度留番一晚。島上亦有不少民宿可以選擇,咁你就可以靜待日出或者日落嘅時份,享受一下寧靜平和嘅氛圍。
 
而島上其實仲有好多唔同嘅觀光公司同活動。好似浮潛或者坐玻璃船出海等等。有需要嘅話都可以先上網查詢想遊玩嘅項目同時間 
 
 
 
【竹富観光センター】
 
地址:沖縄県八重山郡竹富町竹富441
電話:0980-85-2998
時間:9:00~17:15
 
特別嗚謝:HK Express 和 Visit Okinawa hk 沖繩觀光會議局