真心推!表參道 麒麟一番搾り啤酒園

 
去日本,食居酒屋就最能夠體驗日式嘅又飲又食文化。今次係日本stay咗一個月,去居酒屋去到厭喇,但呢次去麒麟嘅Beer Garden竟然有驚喜!經過今次之後,麒麟已經成為我心目中嘅number 1啤酒添呀!真心唔係hard sell,而係呢個beer garden入面所有嘢都有水準。睇埋片都唔信?等我好好介紹下啦!
 
 
位於南青山嘅麒麟啤酒園喺正地鐵表參道站嘅B1出口。以淺色木材同白色貨櫃為主題,有一番小清新嘅感覺。呢度除咗啤酒外仲有好多好嘢食(西式下酒菜、pizza、炸物、甚至甜品都有),天氣好時露天飲嘢食嘢,鍾意企又得坐又得,勁好氣氛。我見到好似有收埋咗嘅帳篷,落雨的話應該都有得遮下嘅。

 

睇下個menu幾齊全!

 

我就事不宜遲點咗個樣好得意嘅麒麟Frozen生啤~(正常size 一杯750yen,¾ Size一杯650yen)
勁凍喎,而且上面果層泡感覺似思樂冰個種沙冰,完全唔怕攤長嚟飲啊!不過論好飲,就真係麒麟Premium好飲啲喇。

 

麒麟Premium,正常size一杯800yen,¾ 一杯650yen。啤酒味道就各花入各眼,但呢杯已經成功俘虜我的心。可能Frozen生啤始終唔夠味。聽店員講Premium唔係度度有得飲,難得來到千祈唔好錯過!

 

我仲試咗水果味嘅Frozen生啤,其實有四種口味,包括蕃茄、黑加侖子、橙同柚子味,各650
yen,我就試咗黑加倫子,即係Cassis!其實Cassis係日本真係好紅,但好少見到香港有得飲。我幾鍾意佢類似提子味但唔算太甜,有水果味得嚟又真係有啤酒味。唔係特別好啤酒嘅朋友都可以一試嘅~(就真係唔敢試蕃茄,試咗嘅朋友歡迎分享感想XD)
 

 

呢個厚切燒火腿亦都係店員推薦我食嘅。1000yen一碟八粒,每粒都好邪惡!肉就真係非常之香但偏肥,送啤酒就一流。不過我覺得其他野食(例如pizza)都一樣好吸引,好食但未去到必食不可嘅地步嘅。
 
東京牛乳布丁真係好食到飛起。本身我仲問個店員係咪真係咁特別,心諗牛奶布甸邊度都有,使乜一定要係beer garden食。但我真係低估咗佢。佢真係好香滑好好食!雖然300yen有少少貴(7仔個d賣160yen,但真係冇咁滑),同埋唔係特別識合配酒,但以一個甜品黎講,佢係非常之值得推薦嘅。
 
食完仲有得影相留念,係一個幾歡愉嘅飯後活動。去咗咁多次居酒屋,畀面麒麟一次嚟下呢個麒麟beer garden享受下日本人放工飲啤酒嘅快樂氣氛~而且當日我去嘅所有店員都係顏值有番咁上下嘅年青男女,都幾養眼架呢~~
 
店鋪資料:
麒麟一番搾り啤酒園
地址:東京都港区南青山5-6-20
營業日期:2016年6月15日~9月30日 (預定)
營業時間:平日16:00 ~ 23:00 (Last order 22:30) ,星期六、日及假期12:00 ~ 23:00 (Last order 22:30)