【真心推!!】日本汽水機超正飲品

去親日本,攞完行李第一件事就最鐘意走去汽水機睇吓有咩好飲,因為有好多時都會搵到香港冇嘅飲品,有啲更加會話係汽水機限定款式,唔怪得好似喺便利店同超市都未見過啦!伏就唔多唔少一定有,不過有啲都真係唔錯㗎,如果下次經過汽水機見到下面幾款,不妨買嚟試吓~
 
 
1.朝摘提子天然水
 
 
我係一個好怕飲提子汁嘅人,因為覺得嗰種甜到上喉嚨椗嘅甜味好假,做得唔好一定會變藥水味,仲會越飲越唔解渴,所以喺汽水機買野飲一般都唔會揀提子味嘅野,除咗呢一支!呢支提子水味道勁清淡,飲完之後唔會有甜味留喺個口,清清地又飲到提子獨特嘅果香味,唔錯!
 
====================
2. Bitter Orange Sparkling
 
 
日本啲果汁味飲品好神奇,有時只係得1%果汁噝入面,但我地又會飲得好開心覺得好好味。如果你同我有同一個諗法,而你咁啱行過汽水機見到呢罐野,建議大家一定買罐嚟飲,特別係夏天!呢罐野嘅橙汁比例係同廠出品橙汁飲品嘅2倍,有成24%咁多,一入口啲橙味就湧哂出嚟,飲到尾帶少少苦味,喺夏天好解渴!
 
====================
3. 粟米濃湯
 
 
第一次飲粟米濃湯都幾誤打誤撞,純粹只係因為冬天去日本覺得隻手好凍想揸住啲熱野而買,點知後來開嚟飲又覺得幾味,入口杰杰哋,仲有一粒粒嘅粟米,都幾似超市買到嗰啲罐一粟米湯。唔使自己加熱就有熱辣辣粟米湯飲,喺天寒地凍之下真係好幸福,係飲到尾要食埋啲粟米有啲難度。
 
====================
4. 芒果乳酸飲品
 
 
芒果汁一做得唔好就好易有陣垃圾味,呢支試落就好似冇,味道仲幾香甜。因為用咗熟成芒果嚟整,所以飲落有好濃郁嘅芒果香,同埋佢地加咗乳酸菌入去,感覺好似比齋飲果汁更健康,對於去親旅行就喪食嘅人嚟講啱哂!
 
====================

5. 黑松露香菇湯

 
呢個完全被個名同個樣吸引咗,成個感覺出嚟好高級,令人勁好奇罐裝飲品可以做到幾好味。呢罐野寫明用咗意大利產嘅黑松露去整,一打開罐野,即刻聞到好香嘅黑松露味道,入口有啲菇味同牛奶香,雖然整體唔算太surprise,但¥200就可以飲到黑松露湯,一試無妨~