《百圓之戀》:負能量更有正能量!

《百圓之戀》近排喺香港上咗,其實佢去年喺亞洲電影節同《真實魔鬼遊戲》、《愛的成人式》等等已經上過,不過當然係得好少場,今次公映小妹就再睇多次,雖然共鳴感唔係話好大,但還是覺得好值得推介的。
 

故事好簡單,係講一個又肥又髒嘅超級廢中女一子,有日同家姐嗌交離家出走,從來無做過野嘅佢去咗100Yen便利店打工,後來被污辱、又遇上種種奇怪人,然後愛上咗個鍾意打拳嘅男人。男人上過一子幾次後就消失咗,一子就自己去咗玩拳撃,好努力一直練習,最後啱啱趕得及喺32歲(女人打拳年齡限制)未過去前上台打比賽,結果係好快就打輸咗,但也無悔了。 


喺講個題材同故仔前,先講吓女主角:安藤櫻。佢就拍戲拍咗好多年,之前都有代表作例如《愛的曝光》,又試過喺同一年內以唔同電影拎到女主角同女配角嘅獎項,夠哂堅!但係話題性好似都不及今次,但梗係啦,拍親拳擊,都好似有個「潛規則」:將身形好似變幻球咁變大變細、變肥變瘦,肚腩變肌肉,安藤櫻都唔例外。佢喺訪問入面都有講到:先練肌肉、再食肥自己,隨後在10日內減哂啲脂肪,期間每日都只食雞胸肉,隔絕脂肪同糖類,加瘋做運動!
真係佩服~~~
 
拳撃絕對唔係新題材(甚至係好濫嘅題材),遠至經典嘅《Rocky洛基》、奇連依士活嘅《撃情》、然後華仔都拍過《阿虎》,近期就一定係《激戰》或者係Jake Gyllenhaal嘅《再戰撃情》!好喇但講咗咁多套,今次嘅分別就好明顯,係由女人做主角,女人去打拳,呢個嘗試就真係好少有。
 
不過其實有趣嘅係,女主角都係因為心儀嘅男人鍾意拳撃,佢先產生咗興趣。當然後來嘅發展,都見到主角內心嘅自主抬頭,但去到最後一刻,其實打拳係真係為咗自己,定deep down都係因為個衰男人?無答案。呢個令我諗到,我總相信每個人做每件事,都有個埋藏在心底嘅理由,有時可能連自己都唔知係咩,佢會化做咗一種潛在意識去支撐自己做一啲自己都估唔到自己做到嘅事。
 

咁喺台上打拳賽究竟係咪一子嘅夢想呢?老實講「夢想」呢個詞實在好濫,近年喺唔同電影入面講得太多,太煽情;而《百圓之戀》就係唔會emphasize呢方面,只係描述一子嘅專注同心無旁騖,直頭有種佢自己都唔知自己點解要咁搏嘅感覺。但我地人生唔係就係咁咩?最特別嘅係去到最後,一子在台上係被人一拳KO嘅,同過往好多勵志電影嘅「勵志方法」好唔同,用「輸」去鼓勵你做!原來負能量係可以更有正能量!拿,並唔係話「人地拍嬴你就拍輸所以你好特別」,而係佢訴說緊一個無法達到、或者達到目的原來都係無(他人眼中嘅)成功意義嘅故事。
 
講到好似好深,又或者淺白啲咁講,如果同你講,你可以無經濟壓力、無家庭壓力咁去追求你所謂夢想,做你想做嘅野,但係,但係,你係一定唔會得到「成功」,你每一次嘅嘗試都會失敗-如果夢想跑步做跑手嘅會一世跑第尾、如果夢想唱歌嘅會一世人都唱唔到一首無走音嘅歌(嘩好毒)等等,你仲會唔會去追逐呢啲夢想?當一切都與「成功」無關,「夢想」、「目標」究竟係啲咩?睇《百圓之戀》可能有答案。