留有遺憾嘅世界記錄王者,JR西日本500系新幹線

超超長文注意!!!火車文注意!!!
JR西日本500系新幹線,喺日本内無人不知嘅子弾火車,擁有戰鬥機嘅流線外型,世界記錄嘅速度,喺世紀90年代初,JNR(國鐵)分社後,山陽新幹線納咗入JR西日本(西日本旅客鉄道)内,但同JR東海嘅東海道新幹線唔同,面對日本航空、全日空,仲有日本佳速航空嘅強大競爭,JR西日本需要新嘅服務先有能力同航空公司對抗。
 
0系
 
100系
JR西日本最初將舊有嘅新幹線0系及100系改良,提供更好嘅服務,但係速度上都喺輸咗畀飛機,雖然可以將100系提升速度上270KM/H,但喺因為過唔到日本嚴例嘅噪音法。所以喺1990年,JR西日本提出了新幹線高速化報告,目的在於開發可以喺350KM/H嘅時速上載客運行,取得所需嘅科技而製作試験列車。
 
300系
在1992年,300系正式投入服務嘅同年,目指時速350KM/H嘅500系原型試作列車,500系900番台正式登場,一共六卡一列,由日立和川崎重工制作,名為Win350(West Japan Railway's Innovation for the operation at 350km/h)。Win350在6月8日開始試験,並喺8月8日成功上到350.4KM/H,成為日本最快嘅火車,並確認喺時速350KM/H運行上無安全上嘅問題。即使試験上可以跑上350KM/H,但發現都係過唔到日本嚴例嘅噪音法,噪音來自車上嘅集電裝置,同時都解決唔到係時速350KM/H過灣時産生嘅強大離心力。喺1995年阪神大地震發生之後,新幹線嘅刹車距離更加需要縮短,所以500系嘅大量生産型嘅最高運行時速將下降至320KM/H。
 
Win350
喺1996年,500系嘅大量生産型正式登場,外観由方型嘅500系900番台改成圓型,列車嘅外型由德國Alexander Neumeister設計兼係Win350上改良,登場時就吸引咗全日本嘅視線,非常有型嘅戰鬥機外型,擁有非一般嘅速度感,時速為日本最高嘅320KM/H,喺長時間試験後,喺1997年3月22日正式以300KM/H載客運行,喺山陽新幹線上由新大阪至博多間只需2小時17分鐘,而喺廣島至小倉間站間平均時速亦成為咗世界記錄,平均速度是261.8KM/H,歐州要喺24年後先搶返個世界記錄。500系都同時喺當年拎咗通商産業省嘅最好設計奬(Good Design),亦喺1998年拎咗日本鐵道會嘅藍絲帶獎(Blue Ribbon Award)。
 
但係呢個世界記録王者,只生産咗9列編成共144卡,相比起100系及300系嘅千多卡車算是好小規模,亦都得唔到JR東海嘅歡心。原因係直通嘅東海道新幹線因為線路嘅問題,根本行唔到時速300KM/H,仲有由於設計上問題,500系和前代嘅300系毎一卡車嘅座位個數都唔同咗,唔方便臨時改用其他嘅300系和後代嘅700系。為左追求速度,圓型嘅車身令到車内空間減小,頭尾2卡更因為流線型嘅設計,令到車内有好強嘅壓迫感。經濟上,1列16卡嘅500系制作費高達50億日圓,相比起300系和700系嘅造價貴咗約10億日圓,喺JR西日本同JR東海商討下,東海道新幹線同山陽新幹線嘅直通只得16班,其中JR西日本同JR東海各負擔一半,JR西日本決定將8個班次都用500系,再加上後備—列編成列車,一共需要9列編成,所以喺制作9列編成後就中止咗生產。生產同JR東海合作開發嘅700系新幹線。
 
700系
 
但喺呢個王者嘅未來只係歩向黑暗,喺登場後6年嘅2003年,JR東海嘅新幹線品川站開業,JR東海借呢個機會,一口氣將成個列車運行制度改變,將主力嘅光號改成希望號,更令到主力列車全部行到270KM/H,再將希望號由全車指定座位改成咗1至3號車卡為自由座位,吸引咗以往坐光號嘅乗客,但喺喺500系上希望號就出現咗大問題,由於流線型嘅設計,令到500系嘅車頭比300系及700系小咗一對車門,特別喺名古屋,京都,新大阪及岡山站上落客時間比其他列車長,JR東海對此甚有微言。
 
N700系
喺2007年,第5代新幹線N700系登場,不單只擁有500系嘅速度及700系嘅舒適,仲有最新嘅技術,以前嘅列車係東海道新幹線嘅急彎需要減速至255KM/H,但係N700就可以用時速270KM/H行過急彎,原因喺有咗第一次用在新幹線上嘅車體傾斜過彎技術,車體在轉彎時可以側向擺動,當車輛行左彎時,車體就會向左傾擺,以減小離心力,相反亦然。由於東海道新幹線嘅急彎達三分之一,所以呢個技術令到N700系喺東海道新幹線上快上10分鐘,令到東海道新幹線車程第一次可以係2小時30分内完成。所以JR東海漸漸地將500系希望號改為N700系行駛,500系亦慢慢地開始由東京站消失咗。喺同年JR西日本公佈,500系將會取代長年在山陽新幹線回響號服務嘅0系和100系新幹線,由於16卡嘅500系載客量太過大,所以會減小成為8卡一編成,留下嘅8卡將會廢車!500系嘅希望號班次將會在2010年引退,而最後生産嘅500系車卡只係運用咗10年,喺新幹線中最短命嘅,呢個消息震撼咗全日本。
 
喺2008年3月,第一列縮短咗嘅500系從九州嘅博多開出,正式開始回響號服務,由於將16卡減小咗成為8卡一編成,車上嘅機器要改變咗位置,令到短短嘅500系唔可能再以時速300KM/H行駛,只能以285KM/H行駛,但喺就出現咗500系追越500系嘅場面。
 
 
喺2010年2月28日,500系希望號班次最後一次出現喺東京,並引起咗500系引退熱潮。喺500系希望號引退嘅幾日前,沿線車站月台巳出現咗唔少相機,唔單只有鐵道迷,仲有家長帶同小朋友將500系嘅英姿影低。喺引退當日,JR東日本同JR東海、仲有JR西日本都發報咗延遅嘅警報,喺沿線嘅車站月台,天橋,可以睇到東海道新幹線嘅地方都企滿咗人、由於月台嘅人因為太多、所以出現咗危險,令到其他列車延遅。喺12時20分500系希望號最後一次駛入東京站,人群迫滿咗月台,大量嘅鐵道警察都阻唔到人群嘅熱情,希望睇到500系最後東京嘅英姿。到咗12時30分,500系希望號發出長長嘅按號,由東京站開出,從此喺東京駅都再睇唔到呢個世界記録王者,多謝同辛苦晒嘅聲音無停過,直至月台上再睇唔到500系。喺東京至品川嘅一段路,喺可以係東海道線同京濱東北線、仲有山手線嘅月台睇到東海道新幹線,都企滿了人群,影相嘅快門聲同向500系新幹線道別嘅聲音都喺500系經過時響起。喺離開品川站後,500系新幹線正式離開東京,為係關東嘅人留下一個深深嘅記憶。
而沿東海道新幹線,不單只車站月台,沿線嘅拍撮景點都企左唔小人夾道歡送500系。希望29號到達博多個陣,JR西日本特別舉行咗道別儀式,送別500系希望號,為咗安全JR西日本和JR九州更特別安850名鐵道警察維持秩序。喺道別儀式後,500系慢慢地開往博多總合車輌所,從始只能喺博多南站望向博多總合車輌先睇到500系16卡嘅W1篇成,直至2012年1月31日500系16卡編成正式除名,只留下兩邊車頭,中間14輌車卡都拆毀咗。
 
 
而仲喺山陽新幹線努力嘅500系8卡編篇成,不單只人氣無減少,仲得到咗JR西日本嘅一個機會,製作咗特別嘅服裝,畀職員著上後,再去教育機構宣傳交通安全。亦喺其中一列500系貼上500系英雄嘅外型,吸引咗唔少嘅人氣,特別係小童之間。
 
然後JR西日本在一列500系喺車上加上畀小童玩嘅擬似運轉駕駛台
 
還仲同Takata Tomy合作,喺其中一列500系上安裝咗兒童玩嘅鐵道模型Plarail,更設有遊玩區給小童玩Plarail。
 
 
 
JR西日本同機械人動畫作品新世紀福音戰士合作,喺山陽新幹線40週年記念推出咗EVA初號機500系,將EVA初號機嘅顔色貼上500系,列車喺未登場巳吸引咗大量人氣,因為發表咗嘅500系外型,實在太靚太有型,而列車内更加上喺新世紀福音戰士嘅展覽,及機械人嘅駕駛台。
 
車内
 
車内展覽
 
機械人嘅駕駛台
列車會一直行駛到下年、大家要去坐下喇!
仲有今年開嘅京都鉄道博物館展示咗500系W1嘅車頭,大家可以近距離同500系影相㗎!
 
 
500系近距離有幾撼?下面Youtube可以感受下!!!