【男人的浪漫】第一神拳-熱血感人的拳擊奮鬥故事!

「所謂的強...到底是什麼呢?」

相信各位就算前日無睇神奇小子Rex既比賽都好,都至少睇過Rocky又或者激戰等以拳擊為題材既作品!拳擊呢類運動真係非常熱血,唔單只台上打個位,就令觀眾一樣感到熱血沸騰,簡直就係男人既浪漫!而我今次推介呢套《第一神拳》,當然就係想大家再次感受呢份熱血既感覺,同埋藉住作品更加了解拳擊手既艱辛,繼續為Rex加油!

追夢的熱誠 
故事既展開平凡不過,只係一個被欺凌既男高中生被拳手所救,從而發現到自己既興趣同潛能,改變左佢日日毒男般既生活 。無錯,簡單係簡單,但卻又出奇地引人入勝 …主角一開始並唔受睇好,由捉十片樹葉開始,不斷訓練,到主角慢慢受人睇好,過程之中令讀者完全感受到一個人專注自己,想變強而沉醉當中既熱血! 

 
雖則好似風馬牛不相及,但令我回想起《櫻花庄》當中真白頭幾集對畫畫既專注-到底我地一生人之中有幾可真係可以將自己既時間,精力,心機放曬係一樣事情度呢?
 
深刻人物刻劃 
一般運動動漫都專注係主角本身,好少係對手方面做一整個故事既描述 ,作者係呢個位絕對不馬虎!不論開頭右拳威力強大既二打六,到黑人拳人,都有一段令人感動既故事,令到讀者一路睇一路為雙方加油,無論邊邊輸都唔想睇到,而當中最能夠體現男人浪漫當然係千堂啦 !

男人之間拳頭與拳頭之間力既比賽,透過與強手比賽而得到快感,只要仲有意識仲會繼續攻擊,無錯,作者筆下既千堂就係一個絕絕對對既真漢子!而熱血背後竟然係來自死去爸爸,想保護別人既個份溫柔…為左回應大家既期待,千堂走上擂台,靠力量一個一個力倒對手,令人佩服

 
 
 
另外青木雖然唔算大角色,但最近一集令我對佢大有改觀;相信唔少人同青木一樣,即使好努力都不能成功,但佢無放棄,每日堅持訓練,相信自己被冷嘲熱諷既青蛙拳,靠住愛人既支持,打出一埸對得住自己對得住支持者既比賽 

每一個人物都有佢奮鬥故事,各位巴打放棄時不妨問一問: 
「自己當初係為咩野而努力呢? 」

 
 
 
令人憧憬的兄弟情 
故事只有數個主要人物,眾人之間好似無乜關係,但其實一個都不能少!主角同拳館師兄既關係老友鬼鬼,但唔似老土番咁講啲漂亮說話,而係好似銀魂咁,大家之間唔需要多講,平時盡情玩勁你,但你有難就會默默支持你,心照既感覺
 
當中我最鍾意鷹村呢一個人物,佢其實都算半個主角,實際上佢係眾人既中心,由故事最初展開-青木,木村對佢個種「口裡說不身體誠實」、打從心裡既尊敬,加上主角一步對佢強悍既憧憬,不知不覺間連繫住整個故事,令節奏控制得恰好,每次大戰緊張過後又可以輕鬆笑返下!
 

拳擊漫畫何止友情,師徒,後輩既關係亦都令人為之感動。不得不提就係會長既傲嬌屬性,對徒兄十分嚴格,比人一個硬朗既型象,不過鐵漢柔情,實情最關心人既就係佢自己…當然徒兄都對佢有尊敬既心,但從來唔會講出聲,可能呢啲就係男人既浪漫啦! 最令我印象深刻既係鷹村係台上話 要證明老頭既Boxing係全世界都用得到既,真係打左個冷震~

賺人熱淚既音樂 

不得不讚既就係令呢套作品加曬分既OP同ED,每次OP播放既時間都會好熱血,令人好想跟主角一樣搖擺身體!ED就有如未聞花名片尾曲般催淚,每次鐺聲響起,結束比賽總會神插入 …一方面帶出勝考辛苦所得勝既感動;另一方面帶出敗者盡全力卻又未如己意既不甘!好多時候對手都係靠毅力,勇氣支持自己,猶記得一幕敗者失去意識,卻亦擺出攻擊姿態,只因佢心裡既決戰仲未完,只可惜身體不能支持 
 
拳擊作品固然給予台下觀眾熱血無比既感覺,但一套好既拳擊作品更加能夠表達每一位台下選手台下時既辛酸!台上你一拳我一拳看似簡單無比既攻擊實際上係別人經過千錘百鍊既訓練成果-其實做任何一樣野都一樣,所謂「你必須十分努力,才能看起來毫不費力」,看看一步,看看昨晚的Rex。佢地唔係無辛苦過,只係透過不斷堅持直到自己達成目達,既然佢地做到,我地又點會有藉口唔係自己人生舞台上揮出盡力既一拳呢?